Hoahy o Galatianao
6 Ry rahalahy, naho misy ndaty manao fahadisoagne faie tsy fanta’e, le ao ze ndaty matotse ara-pagnahy ama’areo eo hikezake hagnitsy aze am-pahalemem-pagnahy. Faie mitaoa avao ka nareo, tsy mone ho azo ty tsapa hevetse. 2 Mifagnampea nareo naho fa misy raha magnavesatse, satria naho manao izay nareo, le magnatanterake i lalà i Kristỳ. 3 Naho misy ndaty mihevetse ty vata’e ho miambake, ie amy izao reke tsy misy dika’e, le mamitake ty vata’e. 4 Toko’e handineke ty raha atao’e ty tsikiraidraike, fa tsy hampitaha ty vata’e amy ty hafa, amy izay reke hanagne anto’e hifaleagne amy ty vata’e. 5 Ty anto’e, sambe hinday ty enta’e ty tsikiraidraike.
6 Fagnampe izay, ao ze ndaty nampianaregne ty saontsin’Agnahare hizara ze raha soa iaby amy i ndaty mampianatse azey.
7 Ko magneke ho fitahegne nareo: Tsy azo vereveregne ty Andrianagnahare, satria ze raha tongise o ndatio avao ro hovokare’e. 8 Ze mitongy hoahy ty nofo’e, le hamokatse fahasimbagne boake amy i nofo’ey, fa ze mitongy hoahy ty fagnahy, le hamokatse havelogne nainai’e boake amy i fagnahỳ. 9 Ao areke tikagne tsy ho rokake manao ty soa, satria amy ty fotoagne fa tinondro tika, le hahazo vokatse naho tsy rokake. 10 Andao areke tikagne hanao soa amy ty ndaty iaby, lohotsie fa o mpiharo finoagne amantikagneo, isake tie managne fahafahagne hanao izay.
11 Henteo’areo moa ty habey ty soratse amy ty taratasy nisorateko ho anareo toy.
12 O ndaty te hisengesenge amy ty raha ivela’eo* o mikezake manere anareo hotapahegneo, amy izay iareo tsy enjehegne noho i hazo fijalea i Kristỳ. 13 Fa ndra iareo mitapakeo aza, tsy raha magnorike i Lalànay, fa tea iareo hotapahegne avao nareo, amy izay iareo hanagne anto’e hireharehagne miomba anareo.* 14 Fa iraho, tsy hirehareha naho tsy amy i Jesosy Kristy Tompontikagne, i nivonoegne tamy i hazo fijaleagney eoy. Naho ty amako, le tamy ty alala’e ro nahavy ty tontolo toy ho voaheloke hovonoegne. Fa naho amy ty tontolo toy, le tamy ty alala’e ro nahavy ahy ho voaheloke hovonoegne. 15 Tsy tihoe mitapake ndra tsy mitapake ro raha lahibey, fa tihoe raha finorogne vaovao. 16 Lonike abey ho amy ze miaigne mifagnarake amy ze fitsipike zay, ndra o Israelin’Agnahareo, ty fiadagnagne naho ty famindram-po!
17 Ao tsy hisy ndaty hitrobo ahy sasa manomboke amy izao, satria fa misy mareke ty amy ty vatako magnamaregne tie, mpanompo i Jesosy raho.
18 Ry rahalahy, ho amy ty toe-tsaigne aseho’areo abey ty hasoa fagnahy miambake aseho i Jesosy Kristy Tompontikagne! Amena.