Asa o Apostolio
26 Hoe ty Agripa tamy i Paoly: “Afake mirehake ty fiarovan-tegna’o rehe.” Le nampahitsie i Paoly ty tagna’e sady izao ty nirehafe’e mba ho fiarovan-tegna’e:
2 “Fale raho Agripa Mpanjaka fa agnatreha’o eto ty irehafako ty fiarovan-tegnako androany, miomba i raha raty rehafe o Jiosio tie nao nataoko rey. 3 Tena fale ka raho satria rehe mahay ty fombafomba o Jiosio naho ty aly hevetse misy amy iareo eo. Mihalale ama’o areke raho mba hijanjigne ahy hatrak’ampara’e.
4 “Hay o Jiosio iaby soa ty fomba fiaignako tamo o firenekò eo naho ta Jerosalema agne amparake ty naha ajaja ahy. 5 Ze Jiosy niara-niaigne tamako mahay izay. Azo iareo hamaregnegne aza naho tea iareo tie ni-Fariseo raho. Hai’o soa fa tena sarote’e amy ty fagnorihagne i Lalànay o sekta o Fariseò naho ampitahaegne amy ty Jiosy hafa. 6 Faie miomba ty fampitamagne nataon’Andrianagnahare tamy ty razambeintikagne o itsanganako eto hinaneo mba hitsaragne ahy. 7 Mitama hahatrea ty fahatanteraha ze fampitamagne zay o foko 12 amantikagne eo reo. Izay ty mahavy iareo mikezake mafe manao fanompoagne masigne ho an’Andrianagnahare ndra handro ndra halegne. Miomba ze fampitamagne zay Mpanjaka o anoa o Jiosio kitomboke ahio.
8 “Nagnino nareo ro mihevetse* fa tsy azo inoagne tie mahavita mamelogne ty mate ty Andrianagnahare? 9 Taloha raho, le nirese lahatse fa toko’e hanao ze azoko atao mba hanoheragne ty agnara i Jesosy te Nazareta. 10 Le izay vata’e ty raha nataoko ta Jerosalema agne. Maro ty ndaty masigne ginadrako, satria fa nahazo alalagne boake amo o lahibey ty mpisorogneo raho. Naho fa ho vinono ka iareo, le nandatsa-bato raho mba hanohagnagne izay. 11 Nitsoeheko ze hene sinagoga, le nisazeako iareo sady niforesevako mba hiala’e amy ty finoa’e. Tena niboseke tamy iareo raho, hafaràko nandeha tamy ty tanàgne hafa agne mba hagnenjehagne iareo avao.
12 “Ie raho nandeha a Damaskosy agne mba hanao izay satria nahazo fahefagne naho fahazahoan-dalagne boake amo o lahibey ty mpisorogneo, 13 le nahatrea hazavagne boake an-dagnitse agne mihoatse ty hazava i masoandroy raho Mpanjaka. Namilepiletse nagnodidigne ahy naho i ndaty niarake tamako rey i hazavagney. Tamy i dizera menay ty nisehoa izay tamy iraho tan-dalagneỳ. 14 Naho fa nitonta an-tane eo zahay iaby, le naharey feo nirehake tamako tamy ty rehake hebreo raho tie: ‘O Saoly, Saoly, nagnino rehe ro magnenjeke ahy? Ihe avao anio ro haratse naho lava midaka i tsiogney!’* 15 Faie hoe raho: ‘Ia iheo ragnandria?’ Le hoe ty Tompo: ‘Iraho o Jesosy enjehe’ò. 16 Faie miarena rehe, le mitsangana. Miseho ama’o raho, satria jinoboko mba ho mpanompoko rehe sady ho vavolombelogne hagnambara ze raha nitrea’o naho ze raha hatoroko azo miomba ahy. 17 Havotako amy ty vahoake toy naho amy ze firenena hagnirahako azo rehe. 18 Hiraheko rehe mba hanokake ty maso iareo, amy izay iareo miala amy i iegney ao, le handeha amy i mazavay sady hiala amy ty fahefà i Satana, le ho ambane fahefàn’Agnahare. Soa tie hahazo famelan-keloke iareo sady hahazo lova miarake amy i ndaty nihamasignegne noho ty finoa’e ahike rey.’
19 “Akore areke Agripa Mpanjaka ty tsy hagnorihako o fahitagne boake an-dagnitse agne iohoe? 20 Faie tamy ze ndaty nitoboke ta Damaskosy agne hey ty nandehanako voaloha’e, le avy eo ta Jerosalema agne naho tamy ty faritse nagneneke i Jodia, vaho izay tamo o ndaty boake amy ty firenena hafao agne. Ty hafatse nirehafeko tamy iareo le tihoe, toko’e hibebake naho hiheregne aman’Agnahare iareo sady hanao raha mba hanoroa iareo tie mibebake vata’e. 21 Izay o raha nitsepaha o Jiosio ahy tamy i tempolỳ aò naho ho namonoa iareo ahio. 22 Faie noho ty fagnampean’Agnahare, le mbe afake mitory amo o ndatio raho hatrake amy izao, ndra bey ndra kede. Ze raha nambara o Mpaminanio naho i Mosesy tie hiseho avao ro rehafeko. 23 Tsy ino zay fa tihoe, tsy maintsy hijale ty Kristy, le ireke ka ty voaloha’e hovelomegne amy ty mate sady hitory miomba i hazavagney amy ty vahoake toy naho amo o ndaty boake amy ty firenena hafao.”
24 Naho fa nirehake o raha rehoe mba ho fiarovan-tegna’e ty Paoly, le nirehake mafe hoe izao ty Festosy: “Nivalike gege rehe Paoly! O fianara’o losotse loatseo o maha gege azò!” 25 Faie hoe ty Paoly: “Tsy nanjare gege zao raho Festosy Governora Hajaegne fa tena maregne o raha rehafeko zao sady misaigne soa raho. 26 Naho ty maregne aza, ndra i mpanjaka irehafako o raha rezaò, le mahay aze soa, izay ahavaniako mirehake azeo. Matoky raho fa hai’e soa iaby o raha rehoe, satria tsy naetaketake ty nanoagne aze. 27 Mino o mpaminanio vao rehe Agripa Mpanjaka? Haiko fa mino iareo rehe.” 28 Faie hoe ty Agripa tamy i Paoly: “Kede avao ty tsy naharesea’o lahatse ahy hanjare ho Kristiana.” 29 Le hoe ty Paoly: “Mangatake aman’Agnahare raho mba tsy ho ihe avao ty hanjare hanahake ahy, fa o ndaty mitsanogne ahio iaby ka ndra ho ela zay ndra halaky. Faie tsy irieko hirohy seny manahake ahy zao nareo.”
30 Le nitsangagne i mpanjakay naho i governoray naho i Berenika vaho i lahilahy niarake nitoboke tamy iareo teo rey. 31 Faie naho fa nandeha iareo, le nifampirehake hoe izao: “Tsy nanao raha raty o lahilahy iohoe, le tsy fagneva ty hovonoegne ndra horohizagne am-pirizò.” 32 Le hoe ty Agripa tamy i Festosy: “Naho tsy nampiakare o lahilahy iohoe tamy i Kaisara agne ty raharaha toy, le fa toko’e ho navotsotse reke.”