Taratasy Faharoe Hoahy i Timoty
3 Faie fantaro zao: Amy ty andro fara’e, le hisy fotoan-tsarotse tsy mora atrehegne. 2 Ty anto’e, o ndatio hotea tegna, hotea vola, hibohaboha, hagnambone tegna, ho mpanivetive, tsy hankatò rae aman-drene, tsy hahay hisaotse, tsy ho megnatse mivalike, 3 tsy hotea ty keleia’e, tsy hoazo ifagnarahagne, ho mpagnaratiraty, tsy hahafehe tegna, hasiake, tsy hotea ty soa, 4 ho mpifotetse, ho mafe loha, hirehareha, ze raha mahafinaritse aze avao ro atao’e, fa tsy hotea an’Agnahare, 5 hanao ty vata’e ho mpivavake aman’Agnahare, faie tsy trea amy ty fomba fiaigna iareo zay.* Isintaho ty ndaty hoe ireo. 6 Boake amy ireo ty hiavia i lahilahy hizilike an-tragno ao am-pitakey, le mangalake ho babo o ampela mora vereveregne milogologo ota, tarihe ty fagniriagne sambe karaza’eo. 7 Lava miana-draha avao o ampela rehoe, faie tsy mete mahay soa ty hamaregnagne.
8 Manahake ty fomba nanohera i Jana naho i Jambra i Mosesy ro hanohera iareo ka i hamaregnagney. Tena raty saigne ty ndaty hoe izay, le tsy ankasitrahagne naho ty finoagne ro rehafegne. 9 Faie ndra tie eo zay, le tsy ho avy aia iareo, satria hibaribary amy ty ndaty iaby ty hagegea iareo, nanahake ty hagegea i roe lahy rey. 10 Fa ihe, fa nagnorike soa ty fampianarako, ty fomba fiaignako, ty tanjoko, ty finoako, ty faharetako, ty hateako, ty fiaretako, 11 ty fagnenjehagne naho ty haoreagne manahake ty natreheko ta Antiokia agne, ta Ikonioma agne naho ta Listra agne. Niatreke o fagnenjehagne rehoe raho, le nagnafake ahy tamo o raha rehoe iaby ty Tompo. 12 Naho ty maregne aza, le henjehegne ka ze te hiaigne agnate ty fahafoezan-tegna ho an’Agnahare naho tafaharo amy i Kristy Jesosy. 13 Fa o ndaty raty naho mpisandokeo vao mainke hiharaty, le mamitake iareo sady voafitake.
14 Fa irehe, oriho avao i raha nianara’o sady naharese lahatse azo le ninoa’o rey, satria hai’o tie boake amy ia ty nianara’o i raha rey. 15 Mbe nikedekede ka rehe, le fa nahay ty Soratse Masigne, i nampahilala azo le hahazoa’o fagnavotagne amy ty alala ty finoagne i Kristy Jesosỳ. 16 Ty Soratse Masigne iaby, le boake amy ty hery ty fagnahy masin’Agnahare sady mahasoa mba hampianaragne, hagnanaragne, hagnitsiagne ze tsy mete, naho hagnohagne mifagnarake amy ty hamaregnagne, 17 amy izay o ndatin’Agnahareo tena hahay naho ho ampe fitaovagne hanoagne ty asa soa iaby.