Talily Soa Nisorate i Lioka

17 Hoe ka reke tamy i mpiana’e rey naho fa niavy eo: “Tsy maintsy hisy raha hahavy o ndatio ho voafingagne.* Faie hoazon-doza ze ndaty manao ze raha zay! 2 Tena soa hoahy ze ndaty zay ty agnantognagne vato bey figosam-bare ty ambozo’ey, le atorake an-driake agne ta tie manao raha mba hahavy ty raike amy i kidikidy rey hanota. 3 Mitaoa nareo. Naho manota ama’o ty rahalahi’o, le anaro reke. Naho mibebake reke, le avelao ty fahadisoa’e. 4 Ndra tie manota ama’o impito aza reke agnate ty andro raike, le avy ama’o eo impito, sady mirehake tie: ‘Mifogne raho,’ le tsy maintsy mamela aze rehe.”

5 Le hoe i apostoly rey tamy i Tompo: “Ampitombò ty finoa’ay.” 6 Le hoe ty Tompo tamy iareo: “Naho manam-pinoagne nareo, ndra tie kidikidy manahake o voan-tsinapio* aza, le mirehake amy ty hatae* tia tie: ‘Miombota, le mitiria an-driake agne’, le hagnorike i raha rehafe’areo zay reke.

7 “Ia ama’areo ty hirehake amy ty mpiava’e ndra ty mpiarak’agnondri’e naho fa boake an-teteke agne reke tie: ‘Avia hihinagne miarake amako an-databatse etoa.’ 8 Tsy hisy hanao izay nareo. Fa ty horehafe’areo, le tihoe: ‘Akia agnisio i tabilié’oy, le ahandrò hanegne raho, le arosò mbamako mbetoa i hanegney. Ie vita ty fihinako vaho izay ka rehe homana.’ 9 Tsy hoderae i tompo’ey areke i mpanompo’ey satria ze raha toko’e ho natao’e avao o natao’eo. 10 Hoe izay ka fa naho fa vita’areo ze raha ampanoegne anareo, le mirehafa tihoe: ‘Mpanompo tsy fagneva* ty hoderaegne zahay. Ze raha toko’e ho natao’ay avao o natao’aio.’”

11 Tamy ie nandeha ho a Jerosalema agney, le nandalo tamy i efe-tane i Samaria naho i Galeliay eo. 12 Naho fa nizilike tamy ze tanàgne raike zay ao reke, le nisy lahilahy folo nivoa ty habokagne* rezay nahatrea aze. Faie nitsangagne lavidavitse tey avao iareo. 13 Le nitoka mafe iareo tie: “O Jesosy Mpagnanatse, mba iferegneso zahay!” 14 Naho fa nahatrea iareo ty Jesosy, le nirehake tamy iareo tie: “Akia nareo mandehana miseho amo o mpisorogneo agne.” Le nandeha iareo. Tamy iareo mbe tan-dalagne eỳ, le nanjare nalio ty vata iareo. 15 Naho fa nitrea ty raike amy iareo tie nisitragne reke, le niheregne reke, sady nagnomey voninahitse an’Andrianagnahare tagnatreha o ndatio eo. 16 Niankohoke tan-tombo i Jesosy eo reke sady nisaotse aze. Samaritana o lahilahy iohoe. 17 Le hoe ty Jesosy: “Tsy fa malio iaby vao iareo folo? Nimbaia areke ty sive amy iareo? 18 Le tsy mba nisy tamy iareo niheregne hagnomey voninahitse an’Agnahare naho tsy ty lahilahy boake amy ty firenena hafa tiagne avao?” 19 Le hoe reke tamy i lahilahỳ: “Mitsangana, le akia mandehana. Ty finoa’o ro nahasitragne azo.”

20 Naho fa nagnontane aze o Fariseò tie ombia i Fanjakàn’Andrianagnaharey ro ho avy, le izao ty navale’e iareo: “Tsy hiambake bey ty fiavia i Fanjakàn’Andrianagnaharey, 21 ndra hisy ndaty hirehake tie: ‘Avia hagnente aze fa intia reke!’ ndra, ‘Aroy reke!’ Ty anto’e, ama’areo* eo i Fanjakàn’Andrianagnaharey.”

22 Le hoe reke tamy i mpiana’e rey: “Ho avy ty andro hagniria’areo i Ana o ndatỳ mba ho ama’areo eo, faie tsy hotrea’areo reke. 23 Hirehake ama’areo ka o ndatio tie: ‘Aroy reke!’ ndra, ‘Atoy reke!’ Faie ao nareo tsy handeha ndra hagnorike iareo. 24 Manahake o helatse ahandrefagne agne, faie trea hatrake atignanagne agneo, le hanao hoe izay ka ty andro i Ana o ndatỳ. 25 Faie aloha ty hiavia izay, le tsy maintsy hampijaléjalégne naho holiere ty taranake toy reke. 26 Ankoatse izay, le hitovy amy ty raha nisy tamy ty andro i Noa, ty raha hisy amy ty andro i Ana o ndatỳ. 27 Nihinagne naho ninogne o ndatio, nagnengavao naho nengaem-bao amparake ty niavia i andro nidira i Noa tagnate i sambobeỳ* aoy. Niavy i Ranobeỳ tafara izay, le namonovono iareo iaby. 28 Hanahake ty raha nisy tamy ty andro i Lota ka ze andro zay. Nihinagne o ndatio, ninogne, nivily, namarotse, nambole naho namboatse tragno. 29 Faie tamy i andro nialà i Lota boake a Sodoma aoy, le nisy afo naho solifara nipoke ty boake an-dagnitse agne, manahake ty fiavy o oragneo namonovono iareo iaby. 30 Hoe izay ka ty raha hisy amy i andro hampibaribariagne i Ana o ndatỳ.

31 “Amy ze andro zay, le ao ze ndaty ambone tafo-tragno ao, tsy hangalake ty fanagna’e an-tragno’e ao naho fa mizotso. Hoe izay ka ze ndaty an-teteke agne. Ao reke tsy hiheregne mba hangalake raha an-tragno’e agne. 32 Tsiarovo ty raha nanjò i valy i Lotay. 33 Ze te hiaro ty fiai’e, le hamoe aze. Fa ze mamoe ty fiai’e ro miaro aze. 34 Rehafeko ama’areo, fa amy ze halegne zay, le hisy ndaty roe handre amy ty fandreagne raike. Faie ty raike handesegne, le ty raike hengagne. 35 Hisy ampela roe ka hiarake hampigosa vare amy ty vato figosam-bare raike. Faie ty raike handesegne, le ty raike hengagne.” 36* —— 37 Le nagnontane aze i mpiana’e rey tie: “Aia ty hisehoa ze raha zay Tompo?” Le hoe ty navale’e iareo: “Amy ze misy nofotse lo ro hivoria o voromaherio.”