Hoahy o Kolosianao
2 Teako hohai’areo, fa mikezake mafe raho mba hagnampeagne anareo naho ze a Laodikia agne, vaho ze mbe lia’e naho nahatrea ahy mivantagne.* 2 Mirehake izay raho, amy izay mahazo fampionognagne ty fo iareo sady ho tafakambagne soa iareo noho ty hatea. Amy izay ka iareo hahazo ze harena iaby, noho i fahatakaran-draha tena azo antokey naho i fahalalagne maregne ty raha mietake masin’Agnaharey, le i Kristy. 3 Natao’e soa haja ama’e ao ze harena i hilalay naho i fahalalagney. 4 Mirehake izay raho, amy izay tsy hisy ndaty hamitake anareo amy ty hevetse maharese lahatse. 5 Ndra tie tsy ama’areo agne aza raho, le ama’areo agne ty saiko. Fale raho mahafantatse tie, milamigne soa nareo sady mafe oregne ty finoa’areo i Kristy.
6 Satria nareo fa nagneke i Kristy Jesosy Tompo, le miharoa lia ama’e lognandro. 7 Mamahara ka sady mioregna ama’e ao, le ko mete hozongozognegne amy ty finoagne, manahake ty nampianaregne anareo sady misaora an’Agnahare lognandro amy ze kila raha.
8 Mitaoa nareo tsy mone hisy ndaty hagnandevo* anareo, amy ty alala ty filozofia naho ty famitahagne poakate, arake ty fampianaragne nifandova o ndatio naho ty raha fototse amy ty tontolo toy eto, fa tsy arake ty fampianara i Kristy. 9 Satria mitoetse ama’e ao ze hene toetsen’Agnahare. 10 Tamy ty alala’e areke ty namenoagne anareo. Ireke ty loha ze hene fanjakagne naho fahefagne. 11 Nitapahegne ka nareo noho inareo mifandrambe ama’e, faie tsy tamy ty alala ty tagnagne ty nagnafahagne i vatagne mpanotay, fa tamy ty alala ty fanapaha i Kristy. 12 Ty anto’e, niarake nalevegne tama’e tamy i badisa’ey ao nareo, sady noho ty fifandrambesa’areo ama’e ro nahavy anareo niarake nivelomegne ama’e, tamy ty alala ty finoa’areo ty fiasa ty herin’Agnahare, i namelogne aze tamy ty matey.
13 Ankoatse izay, ndra tie nimate noho ty raha tsy mete natao’areo aza nareo sady tsy nitapake ka ty nofo’areo, le nivelomen’Agnahare niarake tamy i Jesosy nareo. Namela ty hadisoantika iaby taman-kasoa fagnahy ty Andrianagnahare. 14 Nifafà’e ka i lalàna nisorategne tagnagne misy lily maroy sady manohetse antikagney. Fa nifoagna’e io, satria fa nipehe’e tamy i hazo fijaleagney eo. 15 Tamy ty alala’e ty nampiboridagna’e o fanjakagneo naho o fahefagneo vaho ty nampibaribaria’e aze tagnatreha o ndatio eo, satria nirese’e iareo. Ie ty nitarike iareo tamy ty filahara ty mpandrese eo.
16 Ao areke tsy hisy ndaty hitsara anareo miomba ty raha hane’areo ndra inome’areo, ndra miomba ty fankalazagne fete, ndra pea-bolagne, ndra miomba ty fitandremagne sabata. 17 Ty anto’e, o raha rehoe le talinjo ty raha ho avy, fa ty tena ie le i Kristy. 18 Ao tsy hisy ndaty hikalagne anareo tsy hahazo i lokay, le o ndaty fale amy ty fiambaneagne saretsare’e naho manompo anjely* sady “mizizo” amy ty raha nitrea’eo. Mirehareha iareo, faie tsisy dika’e ty anto’e irehareha iareo, satria arake ty nofotse ty fisaigna iareo, 19 sady tsy mipiteke mafe amy i lohay. Ie amy izao ireke ty magnomey ze raha ilae i vatagney iaby, mba hahavy aze ho tafakambagne soa, amy ty alala o fiforeta-taolagneo naho o ozatseo. Ie ka ty mampitombo aze noho i fitomboagne boake aman’Agnaharey.
20 Naho nimate miarake amy i Kristy nareo sady nafahagne tamy ty raha fototse tamy ty tontolo toy eto, le nagnino ty fomba fiaigna’areo ro manahake tihoe mbe agnisa ty tontolo toy? Nagnino nareo ro mbe magnorike ty lily tihoe: 21 “Ko mandrambe, ko magnandragne, ko mikasike?” 22 O lily rehoe le mirehake miomba i raha holevogne naho fa boake nampiasaegne rey sady lily o ndaty naho fampianara o ndaty. 23 Hoe magnomey hilala o raha rehoe, faie tsy magnampe iareo amy i aly atao iareo amy ty fagniria ty nofotsey, satria iareo avao ro mamorogne ty fomba tea iareo hanompoagne an’Agnahare, sady sare miambane naho mampijale ty vata iareo.