Talily Soa Nisorate i Matio
28 Tafara i Sabatay, ndra tamy i andro voaloha’e* amy i heregnandroy, naho fa nihanazava i androy, le niavy ty Maria Magdalena naho i Maria raikey mba hagnente i kiborỳ.
2 Le nisy horohoron-tane mafe tampoke ty tamy i toeragney eo, satria nisy anjely i Jehovah nizotso boake an-dagnitse agne. Navarimbari’e i vato hily i kiborỳ, le nitoboke tambone’e ey reke. 3 Namilepiletse manahake o helatseo reke, le ty akanjo’e foty bey. 4 Le nititike noho ty taho’e i mpiambegne rey sady tsy nahahetseke manahake o ndaty mateo.
5 Faie hoe i anjelỳ tamy i ampela rey: “Ko matahotse nareo. Haiko fa i Jesosy nivonoegne tamy i boda-kataey eoy paliae’areò. 6 Faie fa tsy ato reke, satria fa nivelomegne, arake i fa nirehafe’ey. Avia moa nareo hagnente i toeragne nisy i fate’eỳ. 7 Akia nareo mandehana malaky hitalily amo o mpiana’eo tie, fa nivelomegne amy ty mate reke, le fa an-dalagne ho a Galelia agne reke zao. Agne ty hahatreava’areo aze. Hirehake izay ama’areo o niaviakò.”
8 Le avy le niala ty an-kibory eo areke i ampela rey. Natahotse iareo, faie tena nifale ka. Le nilay iareo mba hitalily i mpiana i Jesosy rey. 9 Le nifankatrea tamy i Jesosy iareo. Hoe ty Jesosy tamy iareo: “Akore nareo!” Le nimbamy i Jesosy mbeo iareo, le nitagne i tombo’ey naho niankohoke tama’e eo. 10 Hoe ty Jesosy tamy iareo: “Ko matahotse nareo. Akia rehafo’areo i rahalahiko rey mba handeha a Galelia agne fa agne zahay ro hifankatrea.”
11 Tamy i ampela rey mbe tan-dalagneỳ, le nandeha an-tanàgne ao ty ila’e amy i mpiambegne rey, mba hirehake amo o lahibey ty mpisorogneo ze raha iaby niseho zay. 12 Le niarake nivory o lahibey ty mpisorogneo naho o androanavio mba handineke ty hatao. Ie tafara izay, le nimea iareo vola bey i maramila rey 13 sady hoe iareo: “Rehafo’areo tie: ‘Niavy ao halegne i mpiana’e rey, le nangalatse aze tamy izahay niroroy.’ 14 Naho ohatse rey i Pilato governora zay, le ko matahotse nareo fa mbe ho izahay ro hagnazava aze ama’e.” 15 Nalae i maramila rey areke i volay, le norihe iareo i raha nirehafegne tamy iareoy. Le nalaza tamo o Jiosio eo iaby ze raha zay hatrake androany.
16 Faie i mpianatse 11 rey nandeha a Galelia agne, amy i vohitse nirehafe i Jesosy tie hifankatreava iareoy. 17 Naho fa nahatrea aze iareo, le niankohoke tagnatreha’e eo. Faie ty ila’e nisalasala. 18 Le nimbamy iareo mbeo ty Jesosy sady nirehake tie: “Fa nimeigne ahy iaby ty fahefagne an-dagnitse agne naho an-tane etoy. 19 Mandehana areke ampianaro ty ndaty amy ty firenena iaby mba hanjare ho mpanonjohy ty liako, le anò badisa amy ty tahina* i Rae naho amy ty agnara i Anakey vaho amy ty agnara i fagnahy masigney, 20 sady ampianaro mba hagnorike ze raha nandiliako anareo. Tadidio’areo avao ka zao: Hiarake ama’areo avao raho isan’andro, amparake ty hiavia ty fara ty tontolo toy.”