Hoahy o Kolosianao
1 Ty taratasy toy le boake amy i Paoly, apostoly i Kristy Jesosy noho ty zoton’arofon’Agnahare, naho i Timoty rahalahintikagne. 2 Hoahy o ndaty masigne naho o rahalahy tsy mivalike tafaharo amy i Kristy a Kolosia agneo:
Lonike abey ty Andrianagnahare Raentikagne mba haneho hasoa fagnahy miambake ama’areo naho hagnomey fiadagnagne anareo!
3 Misaotse i Andrianagnahare Rae i Jesosy Kristy Tompontikagney lognandro zahay, naho fa mivavake ho anareo. 4 Ty anto’e, nirei’ay ty finoa’areo i Kristy Jesosy naho ty hatea’areo o ndaty masigneo iaby, 5 noho i fanantenagne nitamiriegne ho anareo an-dagnitse agney. Naharey ty miomba o fanantenagne iohoe nareo, naho fa nagnambaragne i hamaregnagney, ndra i talily soa 6 fa niavy tama’areo agney. Mamokatse naho miparitake magneran-tane i talily soay, le hoe izay ka ty atao’e ama’areo eo, nanomboke tamy i andro nahareiza’areo aze naho nahaia’areo maregne soa i hasoa fagnahy miambake asehon’Agnahareỳ. 7 Izay ty nianara’areo tamy i Epafra, i mpiara-manompo teantika sady mpanompo i Kristy tsy mivalike, nanao ty raha toko’e ho natao’aỳ. 8 Nampahafantare’e anay ka fa managne hatea nareo, noho ty fagnampea i fagnahỳ.
9 Izay ka ty nahavy anay nivavake ho anareo lognandro, nanomboke tamy ty andro nahareiza’ay izay. Nangatake* lognandro avao ka zahay mba hanagna’areo iaby ty fahalalagne maregne miomba ty zoton’arofo’e naho ty hilala iaby vaho ty fahatakaragne raha ara-pagnahy. 10 Amy izay nareo hanagne fomba fiaignagne fagneva ty hanagna ty mpanompo i Jehovah, le hampifale aze tanterake, naho fa mamoa amy ty asa soa sambe karaza’e, sady mitombo ty fahalala’areo maregne soa miomba an’Agnahare. 11 Lonike ka abey hagnatanjake anareo i heri’e lahibeỳ, amy izay nareo hahavita hiaretse tanterake sady hanam-paharetagne naho ho falefale. 12 Misaora ka i Rae, i nagnampe anareo mba hahafeno fepetse hahazo lova miarake amo o ndaty masigne, agnate i fahazavagney aoy.
13 Nagnafake antika boake amy ty fahefà i iegney ao reke, le namindra antika amy i fanjakà i Ana-dahi’e tea’ey ao. 14 Tamy ty alala i solovoigney ro nagnafahagne antika, ndra namelàgne ty fahotantika. 15 Ireke ty vinta i Andrianagnahare tsy trea masoy sady ireke ty talen’anake amy ze raha finorogne iaby. 16 Satria tamy ty alala’e ty namorognagne ty raha hafa iaby an-dagnitse agne naho an-tane etoy, ty raha trea naho ty raha tsy trea, ndra sezan-droandriagne zay ndra tompo, ndra fanjakagne, ndra fahefagne. Tamy ty alala’e ty namorognagne ze kila raha sady ho aze. 17 Nisy taloha ze kila raha hafa ka reke sady tamy ty alala’e ty nampisy ze kila raha hafa iaby. 18 Ie ty loha i vatagney ndra i fiangonagney. Ie ty fanombohagne sady talen’anake boake amo o mateo, amy izay ireke ty ho voaloha’e amy ze kila raha. 19 Satria tean’Agnahare ho ama’e ao iaby ze hene fahafenoagne, 20 sady tamy ty alala’e ro nampilongoagne taman’Agnahare ze kila raha hafa iaby, ndra an-dagnitse agne zay ndra an-tane etoy. Tamy ty alala i lio’e nate’e tamy i hazo fijaleagne eoy ty nampisy ze filongoagne zay.
21 Nitafasarake taman’Agnahare naho nifahavalo’e nareo tie taloha, satria nifantoke tamy ty asa raty ty sai’areo. 22 Faie fa nampilongoen’Agnahare ama’e nareo hinane zao, tamy ty alala ty nimateza i ndaty nanao sorogne ty vata’e ara-nofoy. Amy izay nareo ho masigne naho tsy hisy tsiko’e vaho tsy hisy tsiny, naho fa miseho agnatreha’e eo. 23 Mazava hoaze, fa mila mijanogne amy ty finoagne ao avao nareo, le mioregna soa amy i fototsey eo sady ko mete hozongozognegne. Ko miala ka amy i fanantenagne nanagna’areo, boake tamy ty nahareiza’areo i talily soaỳ, i nitoriegne tamy ze hene raha finorogne ambane lagnitse etoỳ. Nanjare mpanompo o talily soa iohoe, izaho Paoly.
24 Fale raho tie amy izao, satria noho inareo ty mahavy ahy hijale. Miaretse i haorea i Kristỳ, i mbe tsy ampe amy i nofokoy ka raho tie amy izao, mba hahasoa i vata’ey ndra i fiangonagney. 25 Nanjare mpanompo o fiangonagne iohoe raho, mifagnarake amy i fanendreagne nankignen’Agnahare tamako mba hahasoa anareoy. Izay ty mahavy ahy hamita soa ty fitoriagne ty saontsin’Agnahare. 26 Tsy ino zay, fa i raha mietake masigne naetake tamy ty tontolo taloha naho tamy ty taranake talohay. Faie amy izao reke, le fa nabaribary amo o ndati’e masigneo. 27 Tean’Agnahare hampahafantaregne o firenenao ka o harena bey voninahitse iohoe, ndra o raha mietake masigne iohoe. Tsy ino ze raha mietake masigne zay fa inareo tafaharo amy i Kristy sady mitama ty hahazo voninahitse miarake ama’ey. 28 Ireke o torie’ay io. Magnanatse ze kila ndaty aman-kilala zahay, amy izay ho matotse ze ndaty tafaharo amy i Kristy, hatolo’ay an’Agnahare. 29 Izay ty mahavy ahy miasa mafe naho mifofotse mafe, noho i heri’e miasa mafe amako aoy.