Taratasy Voaloha’e Hoahy i Timoty
6 Ze ambane ty bao ty fagnandevozagne, le toko’e hihevetse lognandro tie, fagneva ty hohajaegne tanterake ty tompo iareo, amy izay tsy hisy hagnaraty ty tahinan’Agnahare naho i fampianaragney. 2 Ze managne tompo mpino ka, le tsy toko’e hieretseretse tie, tsy toko’e hohajaegne iareo satria rahalahy. Iareo aza vao mainke toko’e hazoto hiasa mafe, satria mpino sady teagne ro mandrambe soa amy ty asa soa atao iareo.
Ampianaro lognandro o raha rehoe, sady risiho iareo mba hagnorike aze. 3 Naho misy ndaty mampianatse fampianaragne hafa sady tsy magneke i fampianaragne mahasoa boake amy i Jesosy Kristy Tompontikagney, ndra i fampianaragne mifagnarake amy ty fahafoezan-tegna ho an’Agnaharey, 4 le feno fireharehagne reke sady tsy mahatakatse ndra inogn’ino. Tea mialy hevetse naho mialy miomba ty rehake reke. O raha rehoe le miterake fialognagne, aly, fagnaratiratiagne, tsy fatokisagne ty hafa, 5 naho aly hevetse tsy misy fara’e miomba ty raha tsy misy dika’e atao o ndaty raty saigne naho tsy mahatakatse ty hamaregnagne sasao. Tsy ia zay, fa o ndaty mieretseretse tie fomba ahazoagne tombo’e ty fahafoezan-tegna ho an’Agnahareo. 6 Toe tsy diso zay, satria ahazoagne tombo’e lahibey vata’e ty fahafoezan-tegna ho an’Agnahare naho ampiarahegne amy ty fahaiagne mionogne. 7 Tsy ninday ndra inogn’ino tamy ty tontolo toy eto tika, le tsy ho afake hinday ndra inogn’ino ka. 8 Naho itika areke managne hanegne naho akanjo, le toko’e hionogne amo o raha rehoe.
9 Fa ze tapa-kevetse ty ho mpagnarivo, le poke agnate ty tsapa hevetse naho ty fandrike vaho ty fagniriagne maro tsy misy dika’e sady manimba, i mampilenteke o ndatio mbamy i famonovonoagney naho mbamy i fahasimbagney mbeoy. 10 Ty anto’e, o hatea volao ty foto o karazan-draha ratio iaby, sady niala tamy ty finoagne naho nitomboke ty vata’e tamy ty raha maro mampanaintaigne ze nikezake nagnatanterake ze fagniriagne zay.
11 Fa irehe, amy ty maha ndatin’Agnahare azo, le ilaiso o raha rehoe. Mikezaha lognandro mba hanagne ty toetse retoa: Hamaregnagne, fahafoezan-tegna ho an’Agnahare, finoagne, hatea, fiaretagne naho fahalemem-pagnahy. 12 Mialia i aly fanjaka ty finoagney. Tano mafe i havelogne nainai’ey, satria noho io ty nitokavagne azo, sady fa nanao fagnambaragne fanjaka tagnatreha ty ndaty maro eo miomba io rehe.
13 Agnatrehan’Andrianagnahare, i miaro ty fiay ze kila rahay, naho agnatreha i Kristy Jesosy eo, i vavolombelogne nanao fagnambaragne fanjaka tagnatreha i Pontio Pilato eoy, ro andiliako azo mba 14 hagnoriha’o i lilỳ amy ty fomba malio naho tsy misy hokiagnegne, amparake ty hampibaribariagne i Jesosy Kristy Tompontikagne, 15 i falefale naho Tompom-pahefagne tokagne hampibaribary ty vata’e amy ty fotoagne fa tinondro’ey. Ireke ty Mpanjaka ze mpanjaka naho Tompo ze tompo. 16 Ireke avao ro tsy mete mate naho mipetrake amy ty hazavagne tsy hay harineagne, i mbe tsy nisy nahatrea ndra tsy vita o ndaty ty magnente azey. Ho aze nainai’e abey ty voninahitse naho ty hery. Amena.
17 Anaro o mpagnarivo amy ty tontolo toy etò mba tsy hirehareha naho tsy hametrake ty fanantena iareo amy ty harena tsy azo antoke, fa aman’Agnahare. Ze hene raha mea’e antika mba hankamamientikagne, le atao’e maro. 18 Rehafo iareo mba hanao asa soa, hanankarena amy ty asa fanjaka, hatarike naho hovognogne hizara. 19 Ty fanoa iareo izay, le hoe mitamiry harena sarobily hoahy ty tegna iareo, ndra i fototse fanjaka amy ty hoavỳ, amy izay iareo hitagne mafe i tena fiaignagney.
20 O Timoty, ambeno soa ze raha nankinegne tama’o, le isintaho o rehake tsy misy dika’e manivetive raha masigneo vaho ty hevetse mifanohetse amy ze rehafegne tihoe “fahalalagne”, ie amy izao diso. 21 Noho ty fagnorihagne ty fahalalagne hoe izay ro nahavy ty ila’e niala amy ty finoagne.
Ho ama’areo abey i hasoa fagnahy miambakey.