Hoahy i Titosy
3 Tiahivo lognandro iareo mba hagneke naho hankatò o fanjakagneo naho o manam-pahefagneo, ho vognogne hanao ze hene asa soa, 2 tsy hagnaraty ndra ia ndra ia, tsy hotea aly fa hahay hanahatsahatse naho haneho fahalemem-pagnahy amy ty ndaty iaby. 3 Ty anto’e, ndra itikagne ka tie taloha, le tsy nisaigne soa, tsy nankatò, nivoafitake, nandevoze ty karazam-pagniriagne naho ty fahafinaretagne, nanao raha raty avao naho nialogne, nampangorigne vaho nifankalaigne.
4 Faie naho fa naseho ty hasoa fagnahy i Andrianagnahare Mpagnavotse antikagney naho ty hatea’e o ndatio, 5 (tsy noho ty raha soa nataontikagne, fa noho ty famindram-po’e), le nagnavotse antika reke tamy ty alala i fiandroagne mitarike antika mbamy i fiaignagney mbeoy naho ty nanoa’e antika ho ndaty vaovao tamy ty alala i fagnahy masigney. 6 Maro ty fagnahy masigne naili’e tamantikagne tamy ty alala i Jesosy Kristy Mpagnavotse antika, 7 amy izay tika naho fa avy nambara ho maregne amy ty alala i hasoa fagnahi’e miambakey, le hanjare mpandova, arake i fampitamagne havelogne nainai’ey.
8 Azo atokisagne o rehake rehoe, sady teako hohamafese’o avao ka o raha rehoe, amy izay o ndaty mino an’Agnahareo hifantoke avao amy ty fanoagne asa fanjaka. Fanjaka o raha rehoe sady mahasoa o ndatio.
9 Fa irehe, ko mizilike amo o aly hevetse gegegegeo, amo o tantaran-drazagneo, amo o fandiendieragneo naho amo o aly hevetse miomba i Lalànaio, satria tsy misy ilagne aze rey sady tsy misy vokatsoa’e. 10 Naho misy ndaty raike mamorogne sekta, le ialao reke naho fa boake nanaregne indraike ndra indroe, 11 satria ty ndaty hoe izay le fa niala tamy i lalagney, manota, sady manao ze hahavy ty tegna’e homelohegne.
12 Naho fa iraheko ama’o agne ty Artema ndra i Tikiko, le anò ze azo’o atao mba hiaviagne amako a Nikopolia agne, satria fa nanapa-kevetse raho tie agne ty handaniako i asotrỳ. 13 Anò ze azo’o atao mba hagnomeagne i Zena, i mpahay i Lalànay, naho i Apolosy ze raha paliae iareo amy i lia iareoy, amy izay tsy hisy raha hahaore iareo. 14 Fa o mpiharo finoagne amantikagneo ka ampianaro hazoto hanao asa fanjaka avao, mba hahafaha iareo hagnampe ze mipay fagnampeagne tampoke, amy izay iareo hamokatse.
15 Mampamangy azo iareo iaby amako atoio. Mampamangy amy ze tea anay amy ty finoagne ao.
Ho ama’areo iaby abey i hasoa fagnahy miambakey.