Natao i Petera Sare Tsy Fantatse ty Jesosy

Hoe ty Jesosy tamy i apostoli’e rey, tamy iareo mbe tamy i efetse ambone aoy tie: ‘Hienga ahike iaby nareo ty androany.’ Hoe ty Petera: ‘Aỳ! Ndra tie mienga azo iaby iareo, izaho tsy hienga azo.’ Faie hoe ty Jesosy tama’e: ‘Mbe tsy mikekeo i akohoy, le hanao sare tsy mahafantatse ahy intelo rehe.’

Nilay vata’e i apostoly rey, naho fa nandese i maramila rey tamy i Kaiafa mpisorom-bey agne ty Jesosy. Fa ty raike amy iareo naho i Petera ro nagnorike i vahoakey. Nilitse tan-kiririsa i Kaiafa tao ty Petera, le namindro tamy i afoy teo. Ie naho fa nihalegne, le nisy ampela raike nirehake tama’e tie: ‘Niarake tamy i Jesosy ka rehe!’

Hoe ty Petera: ‘Aỳ! Tsy izaho zay! Tsy fantako o Jesosy zao!’ Nimbamy i vavahadỳ mbeo reke, faie mbe nisy ajaja ampela raike nirehake tie: ‘Ty lahilahy tia ka niarake tamy i Jesosy!’ Le hoe ty Petera: ‘Tsy fantako o Jesosy rehafe’areo zao!’ Le hoe i ajajay: ‘Ndaty raike amy iareo rehe! Firehake Galiliana manahake ty ahy i Jesosy o fireha’o zao.’ Nandietse mafe ty Petera tie: ‘Tsy fantako vata’e o Jesosy zao!’

Tamy izay, le nisy akoho nikekeo. Talake i Petera nitolike aze ty Jesosy, le nahatsiaro i reha i Jesosỳ reke. Niakatse tambalike agne reke sady nitagny mafe.

Nifagnarake ka ty Fitsaràgne Ambone Jiosy tie hampijalegne an-kiririsa i Kaiafa agne ty Jesosy. Toe fa te hamono i Jesosy avao iareo, le nipay tali’e hamonoagne aze. Faie tsy nahatrea porofo iareo, hafara’e nagnontane i Jesosy ty Kaiafa tie: ‘Ihe o Anak’Andrianagnahareo?’ Hoe ty Jesosy: ‘Ie, Ana’e raho.’ Hoe ty Kaiafa: ‘Mbe ino ka ty hipaliantika porofo? O lahio fa mireha-draty!’ Nagneke i fitsaràgney tie hovonoegne reke. Tinakapy iareo naho nandrorà iareo ty Jesosy sady finehe iareo ty maso’e. Jinera iareo reke, le hoe iareo: ‘Naho toe mpaminany vata’e rehe, ia nijera azò?’

Nandese iareo tamy i tragno fitsaràgney agne ty Jesosy naho fa nimaraindraigne, le nagnontenea iareo indraike tie: ‘Ihe o Anak’Andrianagnahareo?’ Hoe ty Jesosy: ‘Fa rinehako tie Ana’e raho!’ Nandese iareo amy i Pontio Pilato, governora romana agne reke fa nao nirehake raty. Ino ty raha niseho tafara izay? Handineke izay tikagne!