6 Tena Magnampe vao ty Vavake

ASEHO ty Baiboly fa tena magnampe ty mpanompon’Andrianagnahare tsy mivalike o vavakeo. (Lioka 22:40; Jakoba 5:13) Andrambesantikagne soa maro ka io, amy ty ara-pagnahy, ara-pihetseham-po naho ara-batagne. Faie amy ty fomba manao akore?

Dineho zao: Naho misy ndaty magnomey raha ty ana’o, le toko’e hisaotse i ndatỳ vao reke? Sa hankasitrake i ndatỳ am-po’e ao avao? Tena mahasoa ty mirehake ze am-pontikagne ao. Naho manao izay tikagne, le ho fantantikagne ze am-pontikagne ao sady vao mainke hitombo ty fihetseham-po tsapantikagne. Hoe izay ka ty raha miseho naho fa mivavake. Andao hangalake ohatse.

Vavake fisaoragne. Naho fa misaotse i Raentikagney tika noho ty raha soa azontikagne, le hanjare hifantoke amy i raha soa rey ty saintikagne. Hanjare hankasitrake tikagne, sady ho sambatse naho hahay hagnente lafesoan-draha avao ka.—Filipianina 4:6.

Ohatse: Nisaotse an-dRae’e ty Jesosy naho fa nijanjigne sady namale ty vavake natao’e reke.—Jaona 11:41.

Vavake fangatahagne famelan-keloke. Naho mangatake famelan-keloke aman’Andrianagnahare tikagne, le hiasa soa ty feo ty fieretseretantikagne sady vao mainke hanegnegne tikagne amy ty raha nataontikagne. Vao mainke ho tsapantikagne ka fa tena raty o fahotagneo. Tsy hahatsiaro tegna ho meloke sasa tikagne.

Ohatse: Nivavake ty Davida mba hampisehoa’e fa nibebake naho nanegnegne reke.—Salamo 51.

Vavake fangatahagne tari-dalagne naho fahendreagne. Hagnampe antikagne hiambane ty fangatahagne tari-dalagne naho fahendreagne amy i Jehovah naho fa hanapa-kevetse. Maniahy antikagne ka zay fa voafetra avao ty raha vitantikagne, le mila miantehetse amy i Raentikagne an-dagnitse agney tikagne.—Ohabolana 3:5, 6.

Ohatse: Niambane ty Solomona, le nangatake tari-dalagne naho fahendreagne mba hindesa’e o Israelitao.—1 Mpanjaka 3:5-12.

Vavake amy ty fotoan-kaoreagne. Hahatsiaro ho maivamaivagne tikagne naho mamorake ty haoreantikagne aman’Andrianagnahare. Tsy hanao ze saim-patantikagne avao tikagne amy izay fa hiantehetse amy i Jehovah.—Salamo 62:8.

Ohatse: Nivavake ty Asa Mpanjaka naho fa hialy tamy i fahavalo nampatahotse azey.—2 Tantara 14:11.

Vavake hoahy ze mipay fagnampeagne. Magnampe antikagne tsy ho tea tegna ty vavake hoe izay, sady mahavy antikagne hanagne fo miferenaigne vaho hiharo fihetseham-po amo o ndatio.

Ohatse: Nivavake hoahy ze mpanonjohy ty lia’e ty Jesosy.—Jaona 17:9-17.

Vavake fideragne. Hanjare hagnaja naho hankasitrake i Jehovah tikagne, naho midera aze noho ty asa’e naho ty toetse’e mahaveregne. Hagnampe antikagne ka zay mba hifandrambe marine amy i Andrianagnaharentikagney sady Raentikagney.

Ohatse: Nidera an’Andrianagnahare aman-kafanam-po ty Davida noho ty raha finoro’e.—Salamo 8.

Naho fa mivavake ka tikagne, le hahazo “ty fiadanan’Andrianagnahare ambone ze kila eretseretse.” (Filipianina 4:7) Mahasoa ty vatantikagne o fiadanagne iohoe, sady tsy le fitrea amy ty tontolo mikorontagne toy. (Ohabolana 14:30) Faie tsy boake amy ty kezake ataontikagne raike avao ty ahazoagne io. Izay ty horehafegne magnarake.