Fihetseham-po Naho Olagne Sambe Hafa

Mirehake ty manam-pahaiagne ila’e fa mitovy ty fihetse o ndatio naho fa zoen-kaoreagne sady miseho tsikede zay. Faie sambe managne ty fomba anehoa’e ty alahelo’e ty tsikiraidraike. Midika vao zay tie tsy tena malahelo ty ndaty raike naho tana’e am-po’e ao avao ty alahelo’e? Tsy voatere. Va’e tsy halahelo bey sasa ty ndaty raike naho magneke ty raha misy sady mamorake ty fihetseham-po’e. Faie tsy misy afake mirehake tie, ino ty fomba tena mete hiatrehagne haoreagne. Miankigne amy ty kolontsay i ndatỳ naho ty toetse’e vaho ty raha niaigna’e zay. Eo ka ty fomba nimateza i ndaty nimatey.

VA’E TSY MORA ZAY!

Va’e tsy ho hay ty ndaty raike tie hanao akore ty fihetseham-po’e naho mate ty ndaty raike maifitse aze sady inogne ty olagne hatrehe’e. Faie fa ampoizegne ty ila’e amy izay. Andao tikagne hagnente ty ila’e:

Malahelo mafe. Izao ty raha va’e hiseho: Tomagny mafe rehe, mahatsiaro i ndaty tsy foe’oy, sady miovaova bey ty fihetseham-po’o. Malahelo ka rehe naho fa mahatsiaro ty taloha ndra magninofy ty miomba izay. Tena tsekake rehe amy ty voaloha’e, sady tsy mino tie mate reke. Nimate tampoke ohatse ty Timoty. Hoe ty Tina vali’e: “Tsy naharehake raho tamy ty voaloha’e. Ndra tagny aza tsy nivitako. Misy fotoagne raho tsy mahavita miaigne, satria tena malahelo loatse. Tsy mino raho tie nimate reke!”

Mivali-doha loatse, boseke, magnamelo-tegna. Hoe ty Liva: “Nimate ty Eric ana-dahi’ay tamy reke ni-24 taogne. Boseke avao zahay amy i Hary valiko tafara izay, faie tsy mba nitsiela boseke zao zahay tie taloha izay. Nagnamelo-tegna ka zahay satria nieretseretse tie toko’e ho nanao ze fara’e vita’ay mba hialagne nenegne.” Nagnamelo-tegna hoe izay ka ty Alex naho fa nimate ty vali’e. Hoe reke: “Nieretseretse raho tie va’e raty fagnahy raho kanao engàn’Andrianagnahare hijale bey hoe izao. Nanegnegne raho naho fa niavy eo satria hoe raha nagnomey tsiny an’Andrianagnahare zay.” Hoe ka ty Kostas, i nirehafegne taloha teoy: “Nisy fotoagne aza raho niboseke tamy i Sophia tie nagnino reke ro nimate. Nagnamelo-tegna raho naho fa niavy eo satria tsy fidi’e i rahay.”

Tsy misaigne soa. Va’e misy fotoagne tsy mitombegne ty raha eretserete’o. Mieretseretse ohatse rehe tie mbe trea’o i ndaty nimatey ndra mirehake ama’o. Tsy mahavita mifantoke ka rehe sady manjare mora magnaligno. Hoe ty Tina: “Misy fotoagne raho tena tsy mahavita mifantoke naho fa mirehake ama o ndaty. Nieretseretse i fotoagne nimateza i Timotỳ avao raho. Tena nahasoregne ahy zay.”

Te hivibìke. Va’e ho soregne rehe ndra tsy mahazo aigne naho fa miarake amy ty hafa. Hoe ty Kostas: “Tena tsy nahazo aigne raho naho fa miarake amo o mpivalio. Faie tsy azoko ka ty aiko naho fa miarake amo o tsy manambalio raho.” Hoe ka ty Hary: “Tena tsy zaka’ay naho fa misy ndaty mitaraigne miomba ty olagne mahazo aze, ie amy izaò tsy misy dika’e naho oharegne amy i nahazo anaỳ. Ty ila’e ka tena fale naho fa mirehake miomba ty ana’e. Tena soa aloha zay! Tsy zaka’ay avao i raha zay. Azo’ay mirovaly tie, tsy maintsy mitohy o fiaignagneo faie tsy vita’ay ty mitsanogne ty rehake hoe izay.”

Managne olagne ara-pahasalamagne. Va’e hihamahia rehe, tsy mazoto homagne ndra va’e tsy ho azon-droro soa. Tsy niazondroro soa ty Njaka tagnate ty herentaogne, tafara ty nimateza i baba’e. Hoe reke: “Naho fa avy i leray isake halegne, le tsekake avao raho sady mieretseretse i baba.”

Hoe ty Alex: “Mateteke mandeha amo o dokoterao agne raho satria mahatsiaro ho tsy metemete avao. Faie nirehake avao reke tie salama soa raho. Va’e iraho nalahelo beỳ varagne ty nahavy izay.” Afake avao i rahay naho fa tafara tatoy. Faie soa ty mamonje dokotera manahake ty natao i Alex. Va’e hihegne ty hery fagnefetse amantikagne ao naho fa malahelo bey tikagne. Va’e hihetseke ka ty aretegne mpahazo antikagne ndra va’e hahazo aretegne hafa tikagne.

Tsy maintsy mamita adidy maro. Hoe ty Liva: “Tsy ty longo’ay naho ty nama’ay avao ty nampahafantaregne tie mate ty Eric, fa teo ka i sefo’ey, i tompon-tragno’ey vaho ty maro hafa. Nila nikarakara taratasy maro ka zahay, le avy eo nikarakara ty enta i Eric. Tsy maintsy nifantoke soa zahay naho fa nanao izay ie amy izao zahay tena rerake, mivali-doha, sady nalahelo.”

Ty hafa ka tsy zatse manao raha ila’e, fa i longo’ey ndra i vali’e fa nimatey ty nimpanao i rahay tie taloha. Nagnazava ty Tina tie: “I Timoty avao ty mpandeha amy i banke agne naho nikarakara ty asa fiveloma’e. Faie tsy maintsy iraho ty nanao izay. Vao mainke nivali-doha raho. Natahotse raho kera tsisy handeha amy ty lala’e iaby ze raha ataoko.”

Tena mafe tihoe zoen-kaoreagne naho henteagne o raha rehoe. Va’e tena halahelo rehe. Faie hahavita hiatreke izay rehe naho fanta’o mialoha tie, ino ty va’e ho tsapa’o sady inogne ty olagne va’e hatrehe’o. Tadidio avao ka fa tsy voatere hiseho amy ze ndaty azon-kaoreagne iaby o raha reo. Ko kivy naho malahelo bey rehe satria tena ara-dalàna zay.

MBE HO FALEFALE INDRAIKE VAO RAHO?

Ino ty raha azo’o tamaegne? Tsy halahelo bey nainai’e rehe. Faie tsy midika zay tie tsy halahelo sasa rehe ndra hagnaligno i ndaty tsy foe’oy. Hihamaivagne ty haorea’o naho fa mandeha ty fotoagne. Va’e mbe halahelo bey avao rehe kindraike, agnisa izay ohatse naho fa miheregne i date mariaze’areoy, ndra i date nimateza’ey. Faie mahavita mifehe ty fihetseham-po’e avao i ndaty azon-kaoreagne rey naho fa ela ty ela. Afake mifantoke amy ty fiaignagne andavanandro indraike iareo ty amy izay. Hahavita izay reke naho mikezake sady ampea ty keleia’e naho ty nama’e.

Hatrake ombia rehe ro halahelo bey? Va’e ho am-bola’e zay amy ty ndaty ila’e. Ty ahy ty hafa ka va’e agnate ty tao’e raike ndra roe tao ndra mihoatse izay.a Hoe ty Alex: “Nalahelo bey tagnate ty telo taogne teo ho eo raho.”

Manàgna faharetagne. Ty andro tsikiraidraike hey aloha ro atrehegne, sady tadidio fa tsy haharetse nainai’e ty alahelo’o. Ino areke ty azo’o atao mba hagnamaivagne ty alahelo’o ndra mba hahavy aze tsy haharetse ela loatse?