Nino ty Rahaba fa Misy ty Jehovah

Nitoboke tamy ty tanàgne atao tihoeke Jeriko ty Rahaba. Ta Kanana agne ty nisy o Jeriko zao. Tsy nanompo i Jehovah ty ndaty nitoboke ao.

Nisy tantara nirey i Rahaba tamy tie mbe niajaja. Vinaky i Mosesy roe zao hoe i Riake Menay, le nidese’e nisintake boake Ejipita agne o Isiraelitao. Nampea i Jehovah zao ka hoe iareo, le nirese iareo ze fahavalo’e. Amy izao ka reke maharey tie nijanogne marine i Jeriko o Isiraelitao.

Tamy ty hariva indraike nisy Isiraelita roe lahy niavy ta Jeriko ao hagnente i tanàgney. Nimban-tragno i Rahaba mbeo iareo, le nampizilihe’e. Tamy i halegne igne hoeke avao ty nahareiza i mpanjakay tie nisy ndaty raty lia nimban-tanà iareo mbeo. Nizilike amy i Rahaba ao i ndaty rey. Nagnirake ndaty i mpanjaka i Jerikooy hitsepake iareo. Nampietahe i Rahaba amy ty tragno’e fara’e ambone agne iareo. Izao ty nirehafe’e tamy i ndaty nirahe i mpanjakay rey: ‘Teto vata’e iareo, faie fa nandeha mbeo hoeke inge. Heagno’areo fa mbe ho tra’areo rey!’ Inogne ty anto’e niarova i Rahaba i ndaty mpagnente tane rey?... Nino ty Rahaba fa misy vata’e ty Jehovah. Nifanta’e ka fa homey i Jehovah o Isiraelitao ty tane atao tihoeke Kanana.

Nirehake tamy i Rahaba i ndaty mpagnente tane rey fa tsy ho mate iareo mirofoko naho fa ho ravagne ty Jeriko. Fanta’o vao ty raha nampanoe iareo i Rahaba?... Izao ty raha rineha iareo: ‘Araviravio mbam-boho i lafinete’oy ao ty taly menamena toy, amy izay avotse iaby ze agnate tragno’ o ao.’ Nanoe i Rahaba iaby ze nampanoe iareo aze. Fanta’o vao ty raha niseho tafara izay?...

Naho fa tafara izay, le nikarioke i Jeriko o Isiraelita reo. Tsy nikorakorake iareo fa nitsìgne avao. Nikarioke i tanàgney indraike sanandro tagnate ty enegne andro iareo. Faie naho fa nifeno faha fito andro’e, le kinario iareo impito i tanàgney. Vaho sambe nikorakorake amy izay iareo. Nakoroma i Jehovah ty manda nafahetse i tanàgney. I tragno nisy taly menamenay avao ro tsy nikoromake. Ty aia amo sareo ty manoro izay?... Tsy nimate ty Rahaba mirofoko!

Inogne ty raha soa nanoe i Rahaba toko’e hianara’o?... Nino ty Rahaba fa misy ty Jehovah naho fa naharey ty raha soa nanoe’e. Maro ka ty raha nianara’o miomba i Jehovah. Manahake i Rahaba ka vao rehe mino fa misy vata’e ty Jehovah?... Fanta’ay fa mino aze ka rehe!