Mpitarike Vaovao Naho Ampela Roe Bey Herim-po

An-tao’e maro ty nitariha i Josoa o Israelitao, le nimate reke naho fa 110 taogne. Nanompo i Jehovah avao o Israelitao tamy i reke mbe nivelogney, faie naho fa nimate ty Josoa, le nanompo sampy manahake o Kananitao ka iareo. Nengà i Jehovah hampijale iareo ty Jabina mpanjaka o Kananitao, satria tsy nanompo i Jehovah sasa iareo. Nangatake fagnampeagne tamy i Jehovah iareo, le nimea’e mpitarike vaovao atao tihoe Baraka. Ie ty nagnampe o Israelio hiheregne tamy i Jehovah.

Nanagne hafatse boake amy i Jehovah ty Debora mpaminany, le nagnirake mbamy i Baraka mbeo tie: ‘Mindesa lahilahy 10 000, le akia hialy amy ty maramila i Jabina amy ty Renerano i Kisona ao. Ao ty handresea’o i Sisera, mpitarike ty maramila i Jabina.’ Hoe ty Baraka tamy i Debora: ‘Handeha raho naho miarake amako rehe.’ Le hoe ty Debora: ‘Handeha raho, faie tsy i rehe ty hamono i Sisera, satria fa nisaontsy ty Jehovah tie ampela ty hamono aze.’

Le nimbamy i Vohy i Tabara mbeo ty Debora, i Baraka naho i maramila’e rey. Naho vaho naharey izay ty Sisera, le navori’e tamy ty vavasaka ambaney ty maramila’e naho ty galesa findese’e mialy. Hoe ty Debora tamy i Baraka: ‘Atao i Jehovah mandrese rehe ty androany.’ Le niavy mba hialy amy ry Sisera ty Baraka naho i maramila’e rey.

Nampitomboe i Jehovah ty Renerano i Kisona naho fa niavy eo. Le tsy afake nandeha ty galesa ry Sisera satria feno fotake. Nizotso boake amy i galesa’ey ao amy izay ty Sisera, le nilay mafe. Rese i Baraka ty maramila i Sisera. Faie niavotse ty Sisera, le nenga’e eo i galesa’ey sady nietake tamy ty tragno ty ampela raike atao tihoe Jaela reke. Nimea i Jaela ronono reke, sady nirakofa’e bodo, le niazon-droro. Nipiapia amy izay ty Jaela, le natsato’e tan-doha i Sisera eo ty fantsibigne bey raike, le nimate reke.

Avy hipay i Sisera amy izay ty Baraka. Le niakatse boake ao ty Jaela sady hoe reke: ‘Avia fa hatoroko azo o ndaty paliae’o zao.’ Le trea’e fa mate ty Sisera. Fale ty Baraka naho i Debora, le nanao hira fideragne hoahy i Jehovah, satria nampea’e handrese ty fahavalo’e o Israelitao. Nilamigne indraike ty ta Israely agne tagnate ty 40 taogne tafara izay.