Ombia i Fanjakàn’Andrianagnaharey ro Nanomboke Nanjaka?​—FIZARÀGNE 2

FAMINTIGNAGNE I NOFY I NEBOKADNEZARAY

Solofo: Fale indraike raho mahatrea azo Jaona! Manao akore ty fahasalama’o?

Jaona: Tsy magnahy avao raho fa misaotse e!

Solofo: Soa zay. Fale raho fa afake mianatse indraike tikagne tie androany. Tamy iraho tatoy fara’ey, le nirehake tikagne tie nagnino o Vavolombelo i Jehovah-o ro mirehake fa nanomboke nanjaka tamy 1914 i Fanjakàn’Andrianagnaharey.a Treantikagne tamy izay fa misy porofo miomba izay ty amy i faminaniagne amy Daniela toko faha-​4 aoy. Tsiaro’o vao tie ino ty nirehafegne tao?

Jaona: Tie nagninofy nahatrea hatae jabajaba ty Nebokadnezara Mpanjaka.

Solofo: Tena izay. Nahatrea hatae jabajaba nagnakatse i lagnitsey reke, le naho fa niavy eo naharey anjely nandily tihoe tapahegne i hataey, fa ty foto’e avao ro engagne amy i taney eo. Hiheregne hitiry indraike i hataey, naho fa afake “fe-potoagne fito.”b Nirehafentikagne ka tie nagnino ro tanterake indroe i faminaniagne ignehoe. Tsiaro’o vao tie akore ty nahatanteraha’e voaloha’e?

Jaona: Tamy i Nebokadnezara ninegne tagnate ty fito taogney moa?

Solofo: Tena izay. Noho ireke ninegney, le tsy nanjaka elaela heike. Faie tanterake fagnindroe’e i faminaniagney, satria azo rehafegne tie tsy nanjaka heike ty Andrianagnahare, naho fa tsy nisy mpanjaka nisolo tegna aze sasa ty an-tane etoy tagnate ty fe-potoagne fito. Nitreantikagne fa nanomboke tamy ty taogne 607 T.K. i fe-potoagne fitoy, tamy i Jerosalema niravagney. Tamy izay le nanomboke tsy nisy mpanjaka nitondra ty vahoan’Andrianagnahare sasa ty an-tane etoy. Naho fa tapetse o fe-potoagne iohoe, le hanendre Mpitondra vaovao hanjaka amy ty vahoa’e reke, sady an-dagnitse agne o Mpitondra iohoe. Naho boriboriegne le izao, naho fa tapetse i fe-potoagne fitoy, le hanomboke hanjaka ty Fanjakàn’Andrianagnahare an-dagnitse agne. Fa nitreantikagne tie ombia ro nanomboke i fe-potoagne fitoy. Naho haintikagne areke tie manao akore ty fahareta’e, le ho haintikagne tie ombia ro nanomboke nanjaka ty Fanjakàn’Andrianagnahare. Azo’o vao hatreto?

Jaona: Ie! Tadidiko iaby amy izay i raha nirehafentikagne fara’ey.

Solofo: Andao areke tikagne handineke aze amy ty pitsopitso’e, le hohenteantikagne ty halava i fe-potoagne fitoy. Vaho boake namaky io raho satria teako ho tadidiegne ty hevetse lahibey. Ao fa hikezake hagnazava aze soa raho.

Jaona: Ndao areke.

TAPETSE I FE-POTOAGNE FITOY, NANOMBOKE TY ANDRO FARA’E

Solofo: Fito taogne ara-bakiteny i fe-potoagne fitoy, tamy ireke nitanterake tamy i Nebokadnezaray. Faie tsy maintsy haharetse ela noho izay reke naho fa tanterake amy ty Fanjakàn’Andrianagnahare.

Jaona: Ino ty anto’e?

Solofo: Fa nirehafentikagne teo tie nanomboke i fe-potoagne fitoy naho fa nirava tamy 607 T.K. ty Jerosalema. Naho magnisake fito taogne boake eo tikagne, le ho avy amy ty taogne 600 T.K. Faie tsy nisy ndra ino ndra ino miambake niseho tamo o taogne iohoe, mifandrambe amy ty fitondran’Andrianagnahare. Arake i nirehafentikagney, tamy i Jesosy tan-tane etoỳ, ty dika izay taonjato maro tafara tatoy, le trea tamy ty reha’e fa mbe tsy tapetse i fe-potoagne fitoy.

Jaona: Ie, tadidiko igne!

Solofo: Tsy fito taogne ara-bakiteny areke i fe-potoagne fitoy, fa tena naharetse ela bey.

Jaona: Naharetse hatrake ombia zane?

Solofo: Magnampe antikagne hahafantatse izay ty boke Apokalypsy, fa tena mifampiankigne amy ty boke i Daniela io. Rehafegne ao fa 1 260 andro ty fe-potoagne telo naho tapa’e.c Naho ampitomboegne roe areke i fe-potoagne telo naho tapa’ey, le hagnomey fe-potoagne fito, ty dika izay 2 520 andro. Azo’o hey vao hatreto?

Jaona: Ie azoko. Faie tsy treako tie aia ho aia amy izay ty ahatreavagne fa nanomboke nanjaka tamy 1914 i Fanjakàn’Andrianagnaharey.

Solofo: ‘Ndao fa hohenteantikagne amy izay ty fifandrambesa’e. Kindraike ty faminaniagne amy Baiboly ao, ty andro raike mira herentaogne.d Naho ampiharegne zay, le ho 2 520 taogne i fe-potoagne fitoy. Naho magniake 2 520 taogne manomboke amy 607 T.K. tikagne eo, le ho avy amy ty taogne 1914 A.K.e. Izay ty nahafantara’ay tie nifaragne tamy 1914 i fe-potoagne fitoy, sady tamy io ro nanjare Mpanjaka ty Fanjakàn’Andrianagnahare ty Jesosy. Mahagaga fa nanomboke tamy 1914 ro niseho magneran-tane ty raha fa nirehafe ty Baiboly fa hiseho amy ty andro fara’e.

Jaona: Ino ohatse?

Solofo: Ohatse zao ty Matio 24:7 toy. Nirehafe i Jesosy ao ty raha hiseho naho fa hanomboke hanjaka an-dagnitse agne reke. Hoe reke: “Hisy firenena hialy amy ty firenena, hisy ka fanjakagne hialy amy ty fanjakagne ila’e. Hisy keré naho horohoron-tane amy ty toeragne sambe hafa.” Nirehake ty Jesosy tie hisy keré naho horohoron-tane amo o fotoagne iohoe. Naho ty heve’o, tsy vao mainke nihamaro vao zay magneran-tane tagnate ze 100 taogne zay?

Jaona: Ie maregne zay.

Solofo: Nirehake ka ty Jesosy amo o andinin-teny iohoe fa hisy aly naho fa hanjare Mpanjaka ty Fanjakàn’Andrianagnahare reke. Magnamafe izay ty boke Apokalypsy. Rehafegne ao fa hisy aly agnate ty fotoa i fara’ey, sady aly tsy an-tragno avao fa aly magneran-tane.f Tsiaro’o vao tie ombia ro nisy aly magneran-tane?

Jaona: Tamy 1914, i taogne rehafegne fa nanomboha i Jesosy nanjakay! Tsy mba nitsikariko ka igne.

Solofo: Naho fa ampifandrambesegne i faminaniagne miomba ty fe-potoagne fitoy naho ty faminaniagne hafa amy Baiboly ao miomba ty fotoa ty fara’e, le tena mazava. Rese lahatse zahay Vavolombelo i Jehovah fa nanjare Mpanjaka ty Fanjakàn’Andrianagnahare ty Jesosy tamy 1914, sady nanomboke tamo o taogne io ty andro fara’e.g

Jaona: Mbe sarotsarotse amako aloha reke hatreto!

Solofo: Ara-dalàna zay. Ndra iraho aza elaela vaho nahazo soa io, arake i fa nirehafeko tama’oy. Lonike abey mba ho azo’o amy i rehantikagne igne fa ndra tie tsy misy 1914 aza ty amy Baiboly ao, le tena boake amy Baiboly ao ty raha inoa ty Vavolombelo i Jehovah miomba o taogne iohoe.

Jaona: Fa ela raho ro nahavoamareke izay tama’areo. Naho fa mirehake raha nareo le tsy ty heve’areo avao ty rehafe’areo, fa tohagna’areo amy ty andinin-teny avao. Faie mampieretseretse ahy tie nagnino ty Andrianagnahare ro tsy le avy le nisaontsy tamy Baiboly ao tie amy 1914 ty Jesosy ro hanomboke hanjaka an-dagnitse agne. Ino ty anto’e nanoa’e aze sarotseo?

Solofo: Tena soa ze fagnontenea’o zay. Maro vata’e ty raha tsy rehafe ty Baiboly mivantagne. Fa naho tea’o, le horehafentikagne amy ty magnarake tie magnino ro nataon’Andrianagnahare sarotse takaregne ty hevetse amy Baiboly ao.

Jaona: Tena teako zay.