Akore ty azo Ampiasagne o Taratasy Milimpio mba Hanombohan-drehake?

Nanomboke tamy Janvie 2018, le nisiagne hevetse azo rehafegne ty amy ty fogno i Tari-dalagne ho ahy ty Fivoriagney ao. Ty hirehake amo o ndatio ro asaegne ifantohantika amy izao, fa tsy ty hanolotse boke ndra gazete avao. Mba hagnampeagne o mpitorio hahay hanao izay, le atoro amy ty video misy hevetse azo rehafegne ty fomba ampiasagne o Baibolio naho fa mitory. Midika vao zay fa tsy toko’e hanolotse boke ndra gazete sasa tikagne naho fa mitory isan-tragno? Aha’a. Tena magnampe mba hanombohan-drehake zao ohatse, o taratasy milimpio. Azontikagne ampiasaegne ty soso-kevetse ambane retoagne naho fa mampiasa o fitaovagne iohoe tikagne:

1. Apetraho i fagnonteneagne amy i fogno’ey eoy sady ampifiliano amy i vale’e rey i ndatỳ.

2. Atorò aze ty vale’e mey ty Baiboly amy peje faharoe ao. Naho mbe ampe i fotoagney, le vakio naho iharò midineke ty fagnazavagne ila’e amy i taratasy milimpỳ ao.

3. Meo i ndatỳ i taratasy milimpỳ, le risiho reke hamaky aze naho fa malalake.

4. Aloha ty handehana’o, le atorò aze i manao tihoey “Dineho Heike Toy” sady manoa fotoagne ama’e handinehagne ty vale’e mey ty Baiboly.

Amy ty fiheregna’o magnarake, le iharò midineke ty vale i fagnonteneagne amy i manao tihoey “Dineho Heike Toy.” Afara izay, le mametraha fagnonteneagne hovaleagne amy ty magnarake. Afake mifily fagnonteneagne boake amy jw.org ao rehe, ndra boake amy ty bokekele amy ty peje fara’e amy i taratasy milimpỳ ao. Manolora bokekele Talily Soa Boake Aman’Andrianagnahare! ndra Fitaovagne Fampianaragne Baiboly hafa naho trea’o tie izay ty mete.