Engao Handrisike Azo Hanao Raha “ty Lalà ty Hasoa Fagnahy”
“TENA nisy voka’e lahibey tamako ty hasoa fagnahy o rahalahio naho o rahavaveo”, hoe ty Lisa.a Te hirehake reke tie izay ty nahavy aze ho liagne amy ty hamarenagne. Mitovy amy izay ka ty raha nirehafe i Anne. Hoe reke: “Ty hasoa fagnahy o Vavolombelo i Jehovah-o ro tena nahavy ahy ho liagne amy ty hamarenagne fa tsy ty fampianara iareo.” Sambe tea mamaky Baiboly naho misaintsaigne ze raha vakie iareo ao o rahavave rehoe tie amy izao, faie ty hasoa fagnahy naseho tamy iareo ro tena nanohigne ty fo iareo.
Akore ty azontika anoroagne hasoa fagnahy mba hampaherezagne ty ndaty magnodidigne antikagne? Andao tika handineke fomba roe: Amy ty raha rehafentikagne ty raike, le amy ty raha ataontika ty faharoe. Afara izay tika handineke tie ia ro toko’e hanehoantika hasoa fagnahy.
ANÒ AM-BAVA’O EO “TY LALÀ TY HASOA FAGNAHY”
Nanagne “ty lalà ty hasoa fagnahy” tam-bava’e eo i ampela valy fanjaka rehafegne amy Ohabolana toko faha-31 aoy. (Ohab. 31:26) Nenga’e hisy voka’e amy ty raha rehafe’e naho ty fomba fireha’e o ‘lalàna’ iohoe. Toko’e hanagne o ‘lalàna’ iohoe am-bava’eo ka ty lahilahy manambaly naho o raeo. Maro ty rae aman-drene magneke tie misy voka’e raty amy ty ana iareo o fasiakeo. Va’e tsy hitsanogne ty raha rehafe i rae aman-drene’e rey iareo. Naho tea’areo hitsanogne naho hagnorike ty raha rehafe’areo areke ty ana’areo, le toko’e hikezake hirehake amy iareo aman-kasoa fagnahy nareo.
Faie ndra managne anake rehe ndra tsy managne, le toko’e hikezake mba ho soa fagnahy naho fa mirehake. Mirehake raha raike hagnampe antika hahavita izay ty tapa’e voaloha’e amy i Ohabolana 31:26 teoy. Hoe reke: “Trea amy ty raha rehafe’e tie hendre reke.” Midika zay tie mila jobognentika soa ty rehake horehafentikagne naho ty fomba hirehafantikagne aze. Hagnampe antika amy izay ty fisaintsaignagne tie: ‘Hahavy ty ndaty mitsanogne ahy ho boseke vao ty raha horehafeko toy sa hampikepake habosehagne?’ (Ohab. 15:1) Mandineha heike areke aloha ty hirehake.
Hoe ka ty Ohabolana 12:18: “Misy manao rehake tsy ampiheveragne, le hoe tinombo ty mesa ty azo’e.” Naho itika misaintsaigne ty ho voka ty raha rehafentika naho ty fomba irehafantika aze amy ty hafa, le ho mora amantika ty hifehe ty raha rehafentika. Tsy hanao rehake mamparare fo naho tsy ampiheveragne areke tika naho magnorike “ty lalà ty hasoa fagnahy” naho fa mirehake. (Efes. 4:31, 32) Io ty hagnampe antika tsy hieretsere-draty miomba ty hafa naho hirehake aman-kasoa fagnahy sady hirehake raha mampahery. Modely soa ho antika amy izay ty Jehovah. Naho fa nampahery i Elia mpanompo’e tamy ireke natahotsey Reke, le nirehake tamy “ty feo malefake naho moramora” i anjely nisolo-tegna Azey. (1 Mpanj. 19:12) Faie tsy amy ty raha rehafentika avao tika ro toko’e hanoro tie soa fagnahy. Mila atorontika amy ty raha ataontikagne ka zay. Amy ty fomba akore?
MANDRISIKE TY HAFA HIOVA TY HASOA FAGNAHY ASEHO AMA’E
Naho itika mitsikombe i Jehovah, le hotrea amy ty raha rehafentika naho ataontika fa soa fagnahy tikagne. (Efes. 4:32; 5:1, 2) Izao ty nirehafe i Lisa, i nirehafegne taloha tagney, miomba ty hasoa fagnahy naseho o Vavolombelo i Jehovah-o tamy iareo: “Tsy maintsy nifindra tragno tampoke zahay tie indraike zay, le nangatake andro tsy hiasagne ze mpivaly roe tamy i fiangonagneo zay mba hagnampe anay hangorogne ty enta’ay. Mbe tsy nianatse Baiboly raho tamy izay.” Nandrisike i Lisa handineke soa ty hamarenagne ze raha natao o mpivaly rehoe zay.
Nankasitrake ty hasoa fagnahy naseho ty Vavolombelogne tama’e ka ty Anne, i nirehafegne taloha tagney. Hoe reke: “Miharaty avao ty tontolo toy hafarako lava nimahimahigne avao. Sarotse tamako ty natoky ndaty.” Hoe ka reke: “Nigagagaga raho naho fa nahita o Vavolombelo i Jehovah-o nanao raha ho ahy. Hoe raho: ‘Nagnino iareo ro manao izao amako?’ Faie nahavy ahy hatoky iareo ty hasoa fagnahy naseho i rahavave nampianatse Baiboly ahỳ tamako.” Inogne ty nivoka’e? Hoe ty Anne: “Nanjare nifantoke tamy ty raha nianarako raho.”
Mareho fa ty hasoa fagnahy naseho ty ndaty tsikiraidraike tamo o fiangonagneo eo ro tena nanohigne ty fo i Lisa naho i Anne naho nandrisike iareo hianatse ty hamarenagne. Ze hasoa fagnahy o fiangonagneo zay ka ty nagnampe iareo hatoky i Jehovah naho o vahoa’eo.
TSIKOMBEO TY JEHOVAH LE MANEHOA HASOA FAGNAHY AMY TY HAFA
Mora amy ty ndaty ila’e ty mirehake am-pahalalam-pomba naho somilake noho ty kolontsay iareo. Soa aloha naho mandrisike ty ndaty halala fomba ty kolontsay iareo ndra ty toetse maha ie iareo. Faie ndra tie managne ze kolontsaigne zay aza tika, le tsy midika zay tie managne i hasoa fagnahy boake aman’Andrianagnaharey.—Ampitahao amy ty Asan’ny Apostoly 28:2.
Agnisa ty voka i fagnahỳ ty hasoa fagnahy. (Gal. 5:22, 23) Naho te hanagne o toetse iohoe areke tika, le mila engantika hisy voka’e amy ty toe-tsaintikagne naho ty raha ataontikagne i fagnahy masigney. Hanahake i Jehovah naho i Jesosy tika naho manao izay. Trea amy izay tie teantika ty Jehovah. Mihevetse ze hahasoa ty hafa manahake i Jesosy ka tika, amy ty maha Kristiana antika. Ty hateantika i Jehovah Andrianagnahare naho o namantikagneo ro mandrisike antika ho soa fagnahy. Tena ho avy am-pontikagne ao ty fanehoagne o toetse iohoe amy izay sady tena hankasitraha i Jehovah ka tika.
IA RO TOKO’E HANEHOANTIKA HASOA FAGNAHY?
Va’e ho mora amantika ty maneho hasoa fagnahy amy ze ndaty nisoa fagnahy tamantikagne ndra fantantikagne. (2 Sam. 2:6) Fomba raike anoagne izay ty fisaoragne iareo. (Kol. 3:15) Faie akore naho hoe tsy fagneva ty hanehoagne hasoa fagnahy ty fiheverantika ty ndaty raike?
Dineho zao: Tena modely miambake amy ty fanehoagne hasoa fagnahy ty Jehovah, sady mampianatse lesogne lahibey ho antika miomba ty fanehoagne o toetse iohoe ty Saontsi’e. Miherenkeregne amy ty Soratse Grike Kristiana ao ty rehake tihoe “hasoa fagnahy miambake.” Akore ty anoroan’Andrianagnahare fa soa fagnahy amantika reke?
Eretsereto fa ty ndaty iaby magneran-tane ro nanehoa’e hasoa fagnahy. Nanao izay reke naho fa nagnomey ze raha paliae iareo mba hahavelogne iareo. (Mat. 5:45) Mbe tsy nahafantatse aze tika, le fa naneho hasoa fagnahy tamantika reke. (Efes. 2:4, 5, 8) Nimei’e ohatse i Ana-dahi’e bakotokagne sady ikokoa’ey mba hisolovoigne o ndatio. Nisorate i apostoly Paoly tie ‘tena lahibey ty hasoa fagnahy miambake’ anagna i Jehovah, le izay ty nahavy aze nagnomey i solovoigney. (Efes. 1:7) Ankoatse izay, le mbe tarihe i Jehovah naho ampianare’e avao tika ndra tie manota naho mandiso tamà aze aza. Faie manahake o “erekeo” ty fagnanara’e naho ty raha saontsie’e. (Deot. 32:2) Tsy ho vitantika ty hamale ze hasoa fagnahy naseho i Jehovah tamantika iaby. Naho ty maregne aza, le mbe noho ty hasoa fagnahy i Jehovah ro mahavy antika hanagne raha tamaegne amy ty hoavy.—Ampitahao amy ty 1 Petera 1:13.
Mahavy antika ho tea i Jehovah naho mampahery antika ty hasoa fagnahi’e. Toko’e hikezake areke tika haneho hasoa fagnahy amy ty ndaty iaby isan’andro, fa tsy ze ndaty teateantika avao. (1 Tes. 5:15) Naho manao hoe izay lognandro tika, le hanahake o afo amindroagne amo o andro manintsiò. Ty anto’e, hampahery ty keleiantikagne, ty mpiharo finoagne amantika, ty mpiara-miasa naho ty mpiara-mianatse amantika, vaho ty mpiharo tanàgne amantikagne tika.
Dineho tie ia amy ty keleia’o ndra ty ndaty amy i fiangonagneo ro trea’o tie handrambe soa naho anehoa’o hasoa fagnahy amy ty reha’o naho ty raha atao’o. Va’e hisy ndaty amy ty fiangona’areo eo ohatse tena mipay fagnampeagne amy ty fikarakaragne ty tragno’e, ndra amy ty tolon-draha’e isan’andro, agnisa izay ty manao bezara. Naho misy ndaty ka trea’o tie mipay fagnampeagne amy i fanompoagney ey, nagnino naho manao raha mba hagnampeagne aze?
Lonike areke tika mba hanahake i Jehovah, le hengantikagne hisy voka’e amy ty raha rehafentika naho ataontika “ty lalà ty hasoa fagnahy.”
a Novagne ty agnaragne ila’e ato.