Miambanea le Ekeo tie Misy Raha Tsy Fanta’o

1. Ino ty fahaiagne nimea i Jehovah antikagne, le nagnino reke ro nagnomey izay?

NIFOROGNE i Jehovah hahay hisaigne, handrambe naho hampitombo fahalalagne vaho hampiseho fahendreagne tikagne. Nagnino tika ro niforogne’e hoe izay? Tea’e “hahatrea ty fahalalagne an’Agnahare” tikagne sady hampiasa soa ty saintika naho fa manompo aze.​—Ohab. 2:1-5; Rom. 12:1.

2. a) Ino ty toko’e ho ekentikagne? (Joba 37:23, 24) (Henteo ka i sarey.) b) Nagnino ro mahasoa antikagne zay?

² Ndra tie afake miana-draha aza tika, le voafetra avao ty raha azontika fantaregne. (Vakio ty Joba 37:23, 24.) Dineho moa ty Joba. Trea boake amy i fagnonteneagne mifanesesese napetrake tama’ey fa mbe maro ty raha tsy fanta’e. Nagnampe aze hiambane naho hagnitsy ty fomba fisaigna’e zay. (Joba 42:3-6) Handrambe soa ka tika naho miambane, le magneke tie tsy mahafantatse ze kila raha. Ze fiambaneagne zay le hahavy antika hatoky tie, hampahafantare i Jehovah antikagne ze raha tena mila fantantikagne, amy izay tika mandrambe fanapahan-kevetse aman-kilala.​—Ohab. 2:6.

3. Ino ty hodinehentikagne amy ty lahatsoratse toy?

³ Amy ty lahatsoratse toy tikagne, le handineke ty raha ila’e tsy fantantikagne naho ty olagne va’e hatrehentikagne boake amy izay. Hodinehentikagne ka tie, nagnino ro mahasoa antikagne ty tsy fahafantarantika ty raha ila’e. Ty fandinehagne o hevetse rehoe, le hagnampe antika hatoky tie hampahafantare i Jehovah, “I fara tampo’e amy ty fahalalagney” antika ze raha iaby mila fantantikagne.​—Joba 37:16.

TSY FANTANTIKAGNE TY HIAVIA I FARA’EY

4. Ino ty raha raike hiseho tsy haintika, arake ty Matio 24:36?

⁴ Vakio ty Matio 24:36. Tsy fantantika tie ombia ty hifaragna ty tontolo toy. Ndra i Jesosy mbe tan-tane etoỳ aza tsy nahafantatse ty “andro naho ty lera”a hiavia izay. Nirehake tamo o apostoli’eo ty Jesosy naho fa tafara tatoy tie, i Jehovah ty “mamaritse” ty fotoagne hisehoa ty raha ila’e. Managne fahefagne amo o fotoagneo reke satria tompo’e sady mpagnaja fotoagne. (Asa. 1:6, 7) Fa nifarite i Jehovah ty fotoagne hifaragna ty tontolo toy, faie tsy anjarantika ty mamaritse tie ombia ty hisehoa izay.

5. Ino ty va’e ho voka ty tsy fahafantarantika ty andro hiavia i fara’ey?

⁵ Naho henteagne ty raha nirehafe i Jesosy, le tsy haintikagne tie hatrake ombia ty handignasantika ty hiavia i fara’ey. Ty voka’e, va’e hanjare tsy hanam-paharetagne tika ndra ho kivy, lohotsie naho fa ela ty nandignasantika i andro i Jehovah-y. Va’e tsy mora amantika ty miaretse ty tsikike atao ty longontika ndra ty ndaty hafa. (2 Pet. 3:3, 4) Va’e hieretseretse tika tie naho fantantikagne mazava soa ty andro hiavia i fara’ey, le tena hanam-paharetagne sady hahavita hiaretse tsikike tika.

6. Nagnino ro mahasoa antika ty tsy fahafantarantikagne ty fotoagne hiavia i fara’ey?

⁶ Noho i Jehovah tsy misaontsy amantika ty date hiavia i fara’ey, le afake mampiseho tika tie ty hatea naho ty fatokisantikagne aze ty mahavy antika manompo aze. Tsy tihoe manompo i Jehovah tika satria misy date lignasantikagne, le lany date ty finoantika naho fa avy zay. Ty raha hiseho amy i “andro i Jehovah-y” ty toko’e hifantohantikagne fa tsy ty date hiavia’e. Naho manao izay tika, le vao mainke hahafoe tegna ho an’Andrianagnahare sady hanao ze azontika atao mba hampifaleagne aze.​—2 Pet. 3:11, 12.

7. Ino ty raha fantantika?

⁷ Tena soa naho mifantoke amy ty raha fa fantatse tikagne. Fa haintika zao tie nanomboke tamy 1914 i andro fara’ey. Tsy tihoe mba hahafantaragne o taogne iohoe avao ty nagnomeza i Jehovah i faminaniagne agnate Baiboly ao rey, fa mirehake amy ty pitsopitso’e ty raha niseho tambone tane etoy nanomboke tamo o taogne io ka. Voka’e, rese lahatse tika tie tena fa “marine i andro lahibey i Jehovah-y.” (Zef. 1:14) Fantantikagne ka ty asa tea i Jehovah hataontikagne, le ty hitory amy ty ndaty maro arake ze azo atao ty “talily soa miomba i Fanjakagney.” (Mat. 24:14) Toriegne amy ty tane 240 eo ho eo sady amy ty firehake losotse ty 1 000 o hafatse iohoe. Tsy voatere hahafantatse i ‘andro naho i leray’ tika vaho izay hazoto hanao o asa lahibey iohoe.

TSY FANTANTIKA TY RAHA VA’E HATAO I JEHOVAH

8. Ino ty dika tihoe “ty asa i Andrianagnahare maregney”? (Mpitoriteny 11:5)

⁸ Tsy voatere ho fantantikagne “ty asa i Andrianagnahare maregney.” (Vakio ty Mpitoriteny 11:5.) Manondro ty raha atao i Jehovah ndra ty raha enga’e hiseho mba hagnatanterahagne ty fikasa’e o rehake iohoe. Tsy takantikagne amy ty fomba feno ty anto’e va’e mahavy i Jehovah magnenga ty raha ila’e hiseho ndra ty raha atao’e mba hagnampeagne antikagne. (Sal. 37:5) Tsy taka ty saintika ty raha hoe izay, manahake ty tsy fahatakara ty manam-pahaiagne amy ty fomba feno ty fitomboa ty ajaja an-tron-drene’e ao.

9. Ino ty raha sarotse va’e hatrehentikagne noho itika tsy mahay ty raha hatao i Jehovah?

⁹ Mahavy antika hisalasala ty hanapa-kevetse amy ty raha ila’e, ty tsy fahafantarantika ty raha atao i Jehovah mba hagnampeagne antikagne. Va’e hisalasala ty hampitombo fanompoagne tikagne, agnisa izay tihoe magnatsotra fiaignagne ndra mifindra amy ty toeragne mila ty mpitory i Fanjakagney maro. Naho tsy tratsentika ka ty tanjontika ara-pagnahy, le va’e hieretseretse tika tie tsy hahazo ty fankasitraha i Jehovah. Hoe izay avao ka naho fa tsy mahita vokatse amy i fanompoagney ey ie amy izao fa nikezake tika, ndra naho fa miatreke raha sarotse amy ty fanendreagne nimeagne antika.

10. Inogne iaby ty toetse lahibey manjare anagnantika noho itikagne tsy mahafantatse soa ty raha hatao i Jehovah?

¹⁰ Hagnampe antikagne vao mainke hanagne ze toetse tena ilaegne, agnisa izay ty fiambaneagne naho hahavy antika hahay ty fetra ty vitantika, ty tsy fahafantarantika ty raha hatao i Jehovah. Ekentika tie ambone noho ty antika ty fomba fiheve i Jehovah naho ty lala’e. (Isaia 55:8, 9) Afake mianatse miantehetse tanterake amy i Jehovah ka tikagne, amy izay tomombagne ze raha ataontikagne. Rare’e areke naho i Jehovah ty deraentikagne naho fa mahatrea vokatse amy i fanompoagney ey tika ndra mahavita soa ze asa nanendreagne antikagne. (Sal. 127:1; 1 Kor. 3:7) Naho tsy ampoizentika ty raha miseho, le mila tadidientika tie mahavazoho ze kila raha ty Jehovah. (Isaia 26:12) Mila manao ty anjarantikagne tika, le matoky avao ka tie hanao ty anjara’e ty Jehovah. Matoky tika tie hagnomey ze tari-dalagne ilaentikagne reke ndra tie tsy amy ty fomba mahagaga manahake ty taloha aza ty anoa’e izay.​—Asa. 16:6-10.

11. Ino ty raha fantantika afake magnampe antika?

¹¹ Ko haligno fa lava manao raha aman-katea, ara-drare’e naho am-pahendreagne avao ty Jehovah. Fantantikagne fa tena sarobily ama’e ze raha ataontikagne ho aze naho hoahy ty mpiara-manompo amantikagne. Fantantikagne ka fa lava hamale soa ze tsy mivalike ama’e avao ty Jehovah.​—Heb. 11:6.

TSY FANTANTIKAGNE TY RAHA HISEHO HAMARAY

12. Arake ty Jakoba 4:13, 14, ino ty raha tsy fantantikagne?

¹² Vakio ty Jakoba 4:13, 14. Tsy azontikagne lieregne tihoe tsy mahafantatse ty raha hiseho amy ty fiaignantikagne hamaray tikagne. Amy ty tontolo toy eto, le va’e ho azon-draha amy ty “fotoagne tsy ampoizegne” tika. (Mpito. 9:11) Naho izay, le tsy fantantikagne tie hovitantikagne hatrake ampara’e vao ty raha nieretseretentikagne hatao, ndra mbe ho velogne vao tika le hahatrea ty ivita’e.

13. Ino ty va’e ho voka i raha sarotse atrehentika rey amantikagne?

¹³ Va’e ho sarotse amantika ty hiatreke ty fiovaovagne amo o fiaignagneo. Ino ty anto’e? Satria mete hinekoneko amy ty raha va’e hiseho tikagne, le manjare tsy falefale. Ty loza tampoke ndra ty raha raty tsy ampoizegne, le mahavy antikagne ho kivy naho hatahotse. Naho fa tsy tanterake ka ty raha tamaentikagne, le hanjare ho diso tamà tikagne sady ho kivy.​—Ohab. 13:12.

14. Miankigne amy ty ino ty hahasambatse antikagne? (Henteo ka i sare rey.)

¹⁴ Naho fa miatreke raha sarotse tika, le afake magnaporofo tie noho ty hateantika i Raentika an-dagnitse agney ty anto’e anompoantikagne aze, fa tsy ty hatea tegna ndra inogn’ino raha miseho. Trea boake amy i tantara amy Baiboly ao rey tie, tsy miaro antika amy ze kila raha sarotse iaby naho mandahatse mialoha ty raha hiseho amy ty fiaignantika ty Jehovah. Tsy toko’e hitamà izay tika. Oni’e fa tsy miankigne amy ty fahafantarantika ty raha hiseho amy ty hoavy ty hahasambatse antikagne. Miankigne amy ty fipaiantika ty tari-dala’e naho ty fankatoavagne aze zay. (Jer. 10:23) Naho mitavandra aze tika naho fa hanapa-kevetse, le hoe mirehake tie: “Naho zoton’arofo i Jehovah sady mbe velogne zahay, le hanao izao ndra izao.”​—Jak. 4:15.

15. Ino ty raha fantantika miomba ty hoavy?

¹⁵ Ndra tie tsy fantantika aza ty raha hiseho amy ty andro tsikiraidraike, le fantantika fa nampitamà fiaignagne nainai’e an-dagnitse agne ndra an-tane etoa ty Jehovah. Fantantikagne fa tsy mandagnitse reke sady tsy misy raha afake mikalagne aze tsy hagnatanterake ze raha iaby nampitamae’e. (Tit. 1:2) Ireke raike avao ty afake “magnambara boake am-boaloha’e ze raha hisy afara agne naho magnambara hatrake amy izay ty raha mbe tsy nanoegne.” Tena nisy zay tie taloha, le mbe ho tanterake zay amy ty hoavy. (Isaia 46:10) Fantantikagne fa tsy misy raha afake mikalagne i Jehovah tsy hotea antikagne. (Rom. 8:35-39) Hagnomey fahendreagne, fampionognagne vaho hery ilaentikagne mba hahavitantikagne hiaretse reke ndra inogn’ino raha miseho amantikagne. Afake matoky tika tie hagnampe naho hanohagne antika ty Jehovah.​—Jer. 17:7, 8.

TSY FANTANTIKA AMY TY FOMBA FENO TY RAHA ONY I JEHOVAH MIOMBA ANTIKA

16. Arake ty Salamo 139:1-6, inogne ty raha ony i Jehovah miomba antika tsy voatere ho takantika?

¹⁶ Vakio ty Salamo 139:1-6. Ony i Mpamorogne antikay ty fomba namboara’e antika, ty miomba ty vatantika, ty fihetseham-pontika, naho ty saintika. Lava tea antikagne avao reke. Oni’e ty raha rehafentika naho ty teantika horehafegne, le ty raha ataontika naho ty anto’e anoantikagne aze. Nirehake ty Davida Mpanjaka tie magnodidigne antika ty Jehovah, le vognogne hikarakara soa naho hagnampe antikagne. Mahalatsa tihoe tena tea antika tsikiraidraike i Tompo Fara Tampo’e sady Mpamorogne fara’e ambone ze kila raha an-dagnitse agne naho an-tane etoỳ! Nirehake hoe izao ty Davida: “Tsy taka ty saiko ze fahalala’o zay. Abo loatse zay le tsy takako.”​—Sal. 139:6, f.a.p.

17. Nagnino ro va’e ho sarotse amantika ty hagneke tie mahaonigne soa antika ty Jehovah?

¹⁷ Noho ty raha niaignantika tamy ty keleiantikagne eo, ty kolontsaintika ndra ty raha ninoantika taloha, le va’e ho sarotse amantikagne ty hihevetse i Jehovah ho Rae tena tea antikagne. Va’e hahatsapa ka tika tie tsy midare antika sady lavitse antikagne ty Jehovah noho ty hadisoagne nataontika taloha. Ndra i Davida aza nahatsapa hoe izay. (Sal. 38:18, 21) Ndra ty ndaty te hagnova ty fomba fiaigna’e sady te hiaigne mifagnarake amy ty toro lala ty Baiboly aza va’e hieretseretse tie: ‘Naho toe tena mahaonigne ahy vata’e ty Andrianagnahare, nagnino raho ro mbe tea’e handietse ty raha sarotse amako ty miatreke aze?’

18. Ino ty soa horambesentika naho magneke tika fa mahaonigne soa antika mandikoatse ty fahafantarantika ty vatantika ty Jehovah? (Henteo ka i sare rey.)

¹⁸ Afake mianatse magneke tika tie, mahafantatse soa antikagne mandikoatse ty fahafantarantika ty tegnantika ty Jehovah. Mahaonigne ze raha soa tsy treantikagne amantikagne ao reke. Faie ndra tie mahavazoho ty hadisoantika sady mahatakatse ty fihetseham-pontikagne naho ty anto’e mahavy antika manao raha raike aza reke, le mbe tea antikagne avao. (Rom. 7:15) Ino ty ho voka’e naho takantika tie mahaonigne ty raha soa vitantika ty Jehovah? Hatoky tegna sady ho falefale tikagne naho fa manompo aze sady tsy hivalike.

19. Ino ty raha haintika soa miomba i Jehovah?

¹⁹ Haintikagne fa hatea ty Jehovah. Tena magneke izay tikagne. (1 Jaona 4:8) Fantantikagne fa porofo ty hatea’e antikagne i toro lalagne omea’e rey sady lava mipay ze hahasoa antikagne avao reke. Fantantikagne ka fa tea’e hahazo i havelogne nainai’ey tikagne, le nagnomey i solovoigney reke mba hahatanterake izay. Magnomey toky antika o fagnomezagne iohoe tie, ho vitantika ty hampifale i Jehovah ndra tie tsy voririke aza tika. (Rom. 7:24, 25) Haintikagne tie “lahibey ambone ty fontikagne ty Andrianagnahare sady mahaonigne ze kila raha.” (1 Jaona 3:19, 20) Mivazoho ze kila raha miomba antika ty Jehovah sady matoky reke tie, hahavita hanao ty zoton’arofo’e tikagne.

20. Inogne ty hagnampe antika tsy hinekoneko loatse?

²⁰ Tsy aeta i Jehovah antikagne ze raha tena mila fantantikagne. Naho ekentika zay, le hifantoke amy ty raha lahibey tika fa tsy hinekoneko amy ty raha tsy hovitantika ty hikalagne aze tsy hiseho. Naho manao izay tikagne, le hampiseho tie matoky tanterake i Jehovah, “I fara tampo’e amy ty fahalalagney.” (Joba 36:4) Tsy ampe avao ty raha fantantikagne miomba ty raha ila’e tie amy izao. Fa tsy lignentikagne areke ty hianatse raha vaovao boake amy i Andrianagnaharentikagne Lahibeỳ naho ty hianatse ty miomba aze nainai’e.​—Mpito. 3:11.