Managne ty Baiboli’e Manokagne vao o Vavolombelo i Jehovah-o?

Mampiasa fandikan-drehake maro sambe hafa o Vavolombelo i Jehovah-o naho fa mianatse Baiboly. Faie tena tea’ay ty Soratra Masina​—Fandikan-tenin’ny Tontolo Vaovao, amy ze firehake fa nandikagne aze satria mampiasa ty tahinan’Andrianagnahare io sady mazava soa ro maregne soa.

• Mampiasa ty tahinan’Andrianagnahare. Nisy mpamboatse Baiboly tsy nagnomey voninahitse i nampanoratse o Baibolioy. Trea amy ty Baiboly dikan-drehake raike ohatse, ty agnara ty ndaty 70 mahery nandrambe anjara tamy ty famoahagne aze. Faie tsy nampidire iareo agnate o Baiboly iohoe ao ty tahina i Jehovah Andrianagnahare i nampanoratse o Baibolioy!

  Mifanohetse amy izay ty Fandikan-tenin’ny Tontolo Vaovao satria nagneregne ty tahinan’Andrianagnahare amy ty toeragne agn’arivo’e nisy aze tamboaloha’e tagne. Tsy nanognogne ty agnara’e ka ze nandrambe anjara tamy ty famoahagne o Baiboly Fandikan-tenin’ny Tontolo Vaovao iohoe.

• Maregne soa. Tsy ty dikan-drehake iaby ro magnazava amy ty fomba maregne soa ty raha rehafe i Baiboly tamboaloha’e tagney. Izao ohatse ty nandikagne ty Matio 7:13 amy ty dikan-drehake raike: “Midira amy ty lalambeigne maifitse satria bey ty lalambeigne mandeha mbamy i afobeỳ mbeo sady sarotse ty mandeha amy i lalagney.” Faie “fandringanagne” ty nirehafe ty Baiboly tamboaloha’e tagne fa tsy “afobey.” Va’e nampidire i mpandika rehake rey i tihoey “afobey” satria nino iareo fa hampijalejalegne nainai’e agnate ty afobey ty raty fagnahy. Faie tsy izay ty ampianare ty Baiboly. Maregne soa areke ty nandikagne o andine’e iohoe amy ty Fandikan-tenin’ny Tontolo Vaovao ao. Izao ty voarehake ao: ‘Miziliha amy ty vavahady maifitse. Fa malalake sady midagnadagna ty lalagne mbamy i fandringanagney mbeo, le maro ty mizilike agne.’

• Mazava soa. Toko’e hazava soa, ty dika izay mora azo o ndaty ty dikan-drehake raike soa fa tsy tihoe maregne avao. Intoy misy ohatse: Midika ara-bakiteny tihoe “amy ty fagnahy mandeve” i reha i apostoly Paoly amy Romanina 12:11 aoy. Faie naho amy ty rehake malagasy io, tsy tena misy heve’e, le natao mora azo i andine’ey, amy ty Fandikan-tenin’ny Tontolo Vaovao ao. Mirehake io tie toko’e “harehe i fagnahỳ” ty Kristiana.

Mbe misy anto’e hafa ka mampiambake ty Fandikan-tenin’ny Tontolo Vaovao. Tsy vita tihoe mampiasa ty tahinan’Andrianagnahare naho mazava soa sady maregne soa io fa mbe zaraegne maimaim-poagne ka. Ndra o ndaty tsy managne vola hivilianagne Baibolio aza afake mamaky aze. Ndaty an-tapetrisa’e areke ro afake mamaky Baiboly amy ty firehan-draza’e.