I Jesosy mizilike am-boninahitse a Jerosalema ao, mitingitse birike

Tena i Jesosy Vata’e vao i Mesiay Naho Henteagne ty Faminaniagne Miomba i Mesia?

Vale’e ara-baiboly

Eka. Tena maro ty faminaniagne miomba i ‘Mesia Mpitarike’, i ‘Mpamonje ty tontolo toỳ.’ (Daniela 9:25; 1 Jaona 4:14) Tanterake tamy i Jesosy i faminaniagne rey, tamy ireke tan-tane etoay. Ndra tafara i nimateza’ey aza, le mbe maro ty faminaniagne nitanterake tama’e.—Salamo 110:1; Asan’ny Apostoly 2:34-36.

Inogne ty dika tihoe “Mesia”?

Sambe midika tihoe “Voahosotse” i rehake hebreo tihoe Mashiah (Mesia) naho i rehake grike tihoe Kristôs (Kristy). Midika tihoe i “Jesosy Voahosotse” ndra i “Jesosy Mesia” areke ty dika tihoe “Jesosy Kristy.”

Mateteke ro nilignagne menake ty loha ty ndaty raike tie taloha naho fa tinendre ho amy ty toeragne ambone reke. (Levitikosy 8:12; 1 Samoela 16:13) Tinendren’Andrianagnahare ho Mesia ty Jesosy. Tena toeragne ambone zay. (Asan’ny Apostoly 2:36) I fagnahy masigney ty nampiasaen’Andrianagnahare naho fa nagnosotse i Jesosy reke, fa tsy menake.—Matio 3:16.

Tanterake tamy ty ndaty hafa ka vao i faminaniagne miomba i Mesiay rey?

Aha’a. Mampiambake ty ndaty raike zao o peta-tondrò. Mitovy amy io i faminaniagne miomba i Mesiay rey. Tamy i Mesia ndra i Kristy raike avao rey ro nitanterake. Faie mampitao ty Baiboly tie ‘hisy Kristy sandoke naho mpaminany sandoke ho avy, le hanao famantaragne lahibey naho fahagagagne, satria tea’e hofitahegne hatrake amo o ndaty jinobogne reo, naho mbe azo’e atao.’—Matio 24:24.

Mbe amy ty hoavy vao vaho hiseho ty Mesia?

Aha’a. Fa nirehake ty Baiboly tie ho tarana i Davida, i mpanjaka o Israelioy, ty Mesia. (Salamo 89:3, 4) Faie fa tsy trea sasa ty taratasy nanoratagne ty tetirazagne nanomboke tamy i Davida naho fa rinava o Romanao ty Jerosalema, tamy ty taogne 70.a Hoe nipoteke tamo o fotoagne iohoe i taratasy rey. Tsy nisy afake nagnaporofo areke nanomboke tamy izay tie tena tarana i Davida Mpanjaka vata’e ty Jesosy. Faie mbe teo i taratasy rey tamy i Jesosy tan-tane etoỳ. Tsy nisy nanohetse aze areke naho fa nirehake reke tie tarana i Davida, ndra o fahavalo’e reo aza.—Matio 22:41-46.

Fire ty isa ty faminaniagne miomba i Mesia agnate Baiboly ao?

Tsy misy afake mirehake tie fire vata’e ty isa ty faminaniagne miomba i Mesia. Tsy mitovy, ohatse, ty fomba fagnisaha o ndatio ty faminaniagne amy Baiboly ao, ndra amy i andinin-teny mirehake mazava miomba i Mesia rey aza. Mirehake faminaniagne maromaro miomba i Mesia ty Isaia 53:2-7. Va’e hisy hieretseretse tie faminaniagne raike avao reo, fa ty ndaty hafa va’e hieretseretse tie faminaniagne sambe hafa reo.

Faminaniagne ila’e tanterake tamy i Jesosy

Faminaniagne	Ty ahatreavagne aze	Fahatanteraha’e
Tarana i Abrahama	Genesisy 22:17, 18	Matio 1:1
Tarana Isaka ana i Abrahama	Genesisy 17:19	Matio 1:2
Boake amy ty foko i Joda	Genesisy 49:10	Matio 1:1, 3
Tarana i Davida Mpanjaka	Isaia 9:7	Matio 1:1
Ana ty ampela mbe tsy nahavany lahy	Isaia 7:14	Matio 1:18, 22, 23
Naterake ta Betlehema tao	Mika 5:2	Matio 2:1, 5, 6
Tinoka tihoe Imanoelab	Isaia 7:14	Matio 1:21-23
Ndaty tsotra	Isaia 53:2	Lioka 2:7
Nisy ajaja nivonoegne tafara ty niterahagne aze	Jeremia 31:15	Matio 2:16-18
Tinoka hiala a Ejipta agne	Hosea 11:1	Matio 2:13-15
Tinoka tihoe Nazareanac	Isaia 11:1	Matio 2:23
Nisy irake nialoha lalagne aze	Malakia 3:1	Matio 11:7-10
Voahosotse ho Mesia tamy ty taogne 29d	Daniela 9:25	Matio 3:13-17
Nekén’Andrianagnahare ho Ana’e	Salamo 2:7	Asan’ny Apostoly 13:33, 34
Nafana fo hoahy i anjomban’Andrianagnaharey	Salamo 69:9	Jaona 2:13-17
Mpitory talily soa	Isaia 61:1	Lioka 4:16-21
Manahake o hazavagne jabajabao ty fanompoa’e ta Galilia agne	Isaia 9:1, 2	Matio 4:13-16
Nanao fahagagagne manahake i Mosesy	Deoteronomia 18:15	Asan’ny Apostoly 2:22
Nirehake ty heven’Andrianagnahare manahake i Mosesy	Deoteronomia 18:18, 19	Jaona 12:49
Nagnasitragne ndaty maro	Isaia 53:4	Matio 8:16, 17
Tsy tea nisehoseho	Isaia 42:2	Matio 12:17, 19
Nitretré o ndaty nijaleo	Isaia 42:3	Matio 12:9-20; Marka 6:34
Nampibaribary tie manao ty rare’e ty Andrianagnahare	Isaia 42:1, 4	Matio 12:17-20
Mpanolo-tsaigne Mahagaga	Isaia 9:6, 7	Jaona 6:68
Nagnambara ty tahinan’Andrianagnahare	Salamo 22:22	Jaona 17:6
Nampiasa fagnoharagne	Salamo 78:2	Matio 13:34, 35
Mpitarike	Daniela 9:25	Matio 23:10
Maro ty tsy nino aze	Isaia 53:1	Jaona 12:37, 38
Vato manonta	Isaia 8:14, 15	Matio 21:42-44
Niliere o ndatio	Salamo 118:22, 23	Asan’ny Apostoly 4:10, 11
Niheje avao amy izao	Salamo 69:4	Jaona 15:24, 25
Nizilike tamam-boninahitse ta Jerosalema tao	Zakaria 9:9	Matio 21:4-9
Niderà o ajajao	Salamo 8:2	Matio 21:15, 16
Niavy amy ty tahina i Jehovah	Salamo 118:26	Jaona 12:12, 13
Nivalike tama’e ty ragne’e maifitse aze	Salamo 41:9	Jaona 13:18
Farantsa volafotsy 30 ty nivalihagne tama’ee	Zakaria 11:12, 13	Matio 26:14-16; 27:3-10
Nengà i nama’e rey	Zakaria 13:7	Matio 26:31, 56
Nisy vavolombelogne mavande nanao kitomboke aze	Salamo 35:11	Matio 26:59-61
Tsy nirehake naho fa nisy nanao kitomboke aze	Isaia 53:7	Matio 27:12-14
Nandrorà o ndaty	Isaia 50:6	Matio 26:67; 27:27, 30
Jinera ty loha’e	Mika 5:1	Marka 15:19
Nikaravasiegne	Isaia 50:6	Jaona 19:1
Tsy namale ze nijera aze	Isaia 50:6	Jaona 18:22, 23
Nipay hevetse hamonoagne aze o manam-pahefàgneo	Salamo 2:2	Lioka 23:10-12
Nipehegne tamy ty hatae ty tagna’e naho ty tombo’e	Salamo 22:16	Matio 27:35; Jaona 20:25
Natao antsapake ty akanjo’e	Salamo 22:18	Jaona 19:23, 24
Natao ho agnisa o mpanotao	Isaia 53:12	Matio 27:38
Tinivetive naho nisalaregne	Salamo 22:7, 8	Matio 27:39-43
Nijale hoahy o mpanotao	Isaia 53:5, 6	1 Petera 2:23-25
Hoe nafoen’Andrianagnahare	Salamo 22:1	Marka 15:34
Nimeigne vinegira naho raha mafaitse	Salamo 69:21	Matio 27:34
Naran-drano taloha kede ty nimateza’e	Salamo 22:15	Jaona 19:28, 29
Nankine’e taman’Andrianagnahare ty fiai’e	Salamo 31:5	Lioka 23:46
Nagnomey ty fiai’e	Isaia 53:12	Marka 15:37
Nagnomey solovoigne mba hagnafahagne o otao	Isaia 53:12	Matio 20:28
Tsy nitapahegne ty taola’e	Salamo 34:20	Jaona 19:31-33, 36
Tinomboke	Zakaria 12:10	Jaona 19:33-35, 37
Nalevegne tamy ty kibory ty mpagnarivo tao	Isaia 53:9	Matio 27:57-60
Natsangagne tamy ty mate	Salamo 16:10	Asan’ny Apostoly 2:29-31
Sinolo i namadike azey	Salamo 109:8	Asan’ny Apostoly 1:15-20
Nipetrake tan-kavanan’Andrianagnahare eo	Salamo 110:1	Asan’ny Apostoly 2:34-36

a Hoe ty Fangalan-kilala (angilé) natao i McClintock naho i Strong: “Azo inoagne tie tamy ty fotoagne nandravagne i Jerosalema ro nipoteke i taratasy nisy ty tetiraza o Jiosioy, fa tsy taloha izay.”

b Maharehake soa i anjara asa i Jesosy tihoe Mesiay i agnara’e amy ty rehake hebreo tihoe Imanoelay. Ty anto’e, tihoe Imanoela le midika tihoe “Manohagne Antika ty Andrianagnahare.” Trea tamy i Jesosy tan-tane etoỳ naho tamy ty raha natao’e fa manohagne o mpanompo’eo ndra magnampe iareo ty Andrianagnahare.—Lioka 2:27-32; 7:12-16.

c Hoe boake amy i rehake hebreo tihoe netser, midika tihoe “tiry” tihoe “Nazareana.”

d Henteo ty lahatsoratse tihoe “Naminany ny Hahatongavan’ny Mesia i Daniela”, naho tea’o ho fantatse amy ty pitsopitso’e tie nagnino ty Baiboly ro mirehake fa tamy taogne 20 ty Mesia ro niavy.

e Amy i boke i Zakaria ao ty misy o faminaniagne iohoe. Faie nirehake ty Matio, mpanoratse Baiboly tie, i ‘Jeremia mpaminany ty nirehake io.’ (Matio 27:9) Misy fitambaram-boke atao tihoe “o Mpaminanio” ty amy Baiboly ao. (Lioka 24:44) Le hoe ty boke i Jeremia ty voaloha’e amo o fizaràgne iohoe ao kindraikindraike. Va’e o fizaràgne iohoe areke ty tea i Matio horehafegne tihoe “Jeremia”, le tagnate’e tao ty boke i Zakaria.