Talily Soa Nisorate i Marka
15 Naho vaho nangararake atignanagne i androy, le nivory o Fitsaragne Ambone Jiosio, agnisa izay o lahibey ty mpisorogneo naho o androanavio vaho o mpampianatse lalànao,* mba handineke ty hanoagne i Jesosy. Narohy iareo amy ty tagna’e ty Jesosy naho fa niavy eo, le nindese iareo amy i Pilato agne. 2 Nagnontenea i Pilato areke reke tie: “Ihe vao ty Mpanjaka o Jiosio?” Le namale reke tie: “Fa ie ze nitsarae’o zay.” 3 Faie maro ty raha raty nirehafe o lahibey ty mpisorogneo tie natao’e. 4 Le nagnontane aze indraike ty Pilato tie: “Nagnino rehe tsy mamaleo? Tsy rei’o vao o raha rehafe iareo tie natao’o zaò?” 5 Faie tsy namale ndra raike ty Jesosy, le nigaga ty Pilato.
6 Isake fete, le fatao i Pilato ty mamotsotse gadra raike ze angatahe i vahoakey. 7 Tamy ze fotoagne zay, le nisy lahilahy raike atao Barabasy zay nigadraegne, satria mpanohetse o fanjakagneo reke. Mamono ndaty reke naho fa manao izay. 8 Niavy tamy i Pilato teo areke i vahoakey, le nangatake aze mba hamotsotse gadra manahake ty fatao’e. 9 Le hoe ty Pilato tamy iareo: “Tea’areo vao naho votsorako ho anareo i Mpanjaka o Jiosioy?” 10 Nirehake izay ty Pilato, satria nihai’e tie fialognagne avao o nanolora o lahibey ty mpisorogneo azeo. 11 Faie nirisihe o lahibey ty mpisorogneo i vahoakey mba hangatake ty hamotsoragne i Barabasy fa tsy i Jesosy. 12 Le hoe ty navale i Pilato iareo: “Ino areke ty hataoko amy i lahy atao’areo tihoe Mpanjaka o Jiosioy?” 13 Le vao mainke nikorakorake iareo tie: “Peho amy ty boda-katae reke!” 14 Faie hoe ty Pilato tamy iareo: “Fa nagnino? Ino ty raha raty natao’e?” Le hoe indraike iareo tie: “Peho amy ty boda-katae reke!” 15 Te hampifale i vahoakey ty Pilato, hafarà’e navotso’e hoahy iareo ty Barabasy, fa i Jesosy nampikaravasie’e, le natolo’e iareo mba hopehegne amy ty boda-katae.
16 Le nente i maramila rey tamy i kiririsa i governoray ao reke, le navory iareo teo iaby i maramila rey. 17 Nampagnisie iareo akanjo voloparasy reke sady namboara iareo satro-boninahitse tamy ty raha misy fatipatike, le natao iareo an-doha’e eo. 18 Le hoe iareo tama’e: “Arahabaegne rehe Mpanjaka o Jiosio!” 19 Jinera iareo tamy ty bararata ty loha’e, le nandrorà iareo reke sady nitongaleke naho niankohoke tagnatreha’e eo iareo. 20 Naho fa boake nitsikihe iareo ty Jesosy, le nafaha iareo i akanjo voloparasỳ, le nampagnisie iareo aze indraike i akanjo’ey. Le nindese iareo reke mba hopehegne amy ty boda-katae. 21 Nisy lahilahy raike atao Simona te Kirena zay, niforeseva iareo hinday i hazo fijalea i Jesosỳ. Boake ambanevohitse agne reke tamy izay. Ireke ty rae i Aleksandra naho i Rofosy.
22 Nente iareo amy ze toeragne raike atao tihoe Golgota zay agne ty Jesosy. “Karakandoha” ty dika o agnaragne iohoe. 23 Nimea iareo divay misy miora* mahamamo reke faie tsy nipaoke hinogne. 24 Nipehe iareo tamy ty boda-katae reke, le nanao kitsapake iareo mba hahatreavagne tie, ia ty homeagne i akanjo’e ivela’ey. 25 Tamy ty lera fahatelo* tamy izay, sady nipehe iareo tamy i boda-kataey eo reke. 26 Le nisorate iareo tambone’e teo ty anto’e namonoagne aze. Izao i soratsey: “Mpanjaka o Jiosio.” 27 Nisy malaso roe lahy ka nipehe iareo tagnila’e eo. Ty raike tan-kavana’e eo, le ty raike tan-kavia’e eo. 28* —— 29 Ze nandalo mbeo, le nanivetive aze naho nagnolikoligne ty loha iareo, sady nirehake tie: “Ihe nirehake tie horavà’o i tempolỳ, le haore’o agnate ty telo andro. 30 Avoto areke ty vata’o hinaneo, le mizotsoa boake amy i hazo fijaleagney ey rehe.” 31 Nitsikihe o mpisorombeio naho o mpampianatse lalànao ka reke tie: “Ty ndaty hafa navota’e, ie ty vata’e vaho tsy vita’e ty magnavotse aze! 32 Naho toe ireke vata’e o Kristy Mpanjaka o Israeliò, le toko’e hizotso boake amy i hazo fijaleagney ey hotreantika, amy izay tika hino aze.” Ndra i ndaty niarake nipehegne tama’e rey ka aza nagninjeinje aze.
33 Nanomboke tamy ty lera fahaenegne hatrake tamy ty lera fahasive,* le naiegne i taney iaby. 34 Ie tamy ty lera fahasive ty Jesosy, le nitoka mafe tihoe: “Elỳ, Elỳ, lamà sabaktanỳ?” Naho adika, le tihoe: “O Andrianagnahareko, o Andrianagnahareko, nagnino rehe ie nahafoe ahio?” 35 Naho fa naharey izay ty ila’e amy i ndaty nitsangagne narine teo rey, le hoe iareo: “Henhenke fa mitoka i Elia reke.” 36 Le nisy lahilahy raike zay nilay, le nangalake eponzy, le najo’e agnate i divay makiray ao. Natao’e tamy ty bararata i eponzỳ, le natoho’e am-bava i Jesosy eo mba hinome’e. Faie hoe i lahilahỳ: “Lignaso hey hagnenteantikagne aze tie ho avy eo ty Elia hanjotso aze.” 37 Nitoka mafe ty Jesosy naho fa niavy eo, le niala aigne. 38 Le nizara roe boake ambone agne hatrake ambane agne, i ridò tamy i toeragne masigney aoy. 39 Naho fa nahatrea ze raha iaby zay naho i Jesosy niala aigney i maramila manam-boninahitse nitsangagne teoy, le hoe reke: “Anan’Agnahare vata’e ty lahy tia!”
40 Nisy ampela ka nitalake lavidavitse tey. Agnisa izay ty Maria Magdalena naho i Maria rene i Jakoba Kede* naho i Josesy vaho i Salome. 41 Mateteke o ampela rehoe ro niarake tama’e, mba hikarakara aze, tamy ireke ta Galelia agney. Maro ka ty ampela hafa niarake tama’e, tamy ireke nimba Jerosalema mbeoy.
42 Folakandro i andro Fiomanagney tamy izay, ndra i andro taloha i Sabataỳ. 43 Nisy lahilahy raike boake Arimatia agne, agnisa ty nanan-kaja tamo o Fitsaragne Ambone Jiosio eo zay nisikigne herim-po, le nandeha mbamy i Pilato mbeo mba hangatake i fate i Jesosỳ. I Josefa ty agnara’e sady nandigne i Fanjakàn’Andrianagnaharey ka reke. 44 Faie nitea i Pilato hofantaregne heike naho toe fa nimate sahady ty Jesosy, le nitokave’e i maramila manam-boninahitsey mba hagnontenea’e. 45 Naho fa nahazo toky boake amy i maramila manam-boninahitsey ty Pilato, le neke’e homeagne i Josefa i fate i Jesosỳ. 46 Naho fa boake nivily lamba vita amy ty rongony tena fanjaka reke, le nalae’e i fate i Jesosỳ sady nifognose’e tamy i lambay, le naleve’e tamy ze kibory vaovao zay ao. Lamilamy nilavahagne o kibory iohoe. Navarimbari’e tamy i lala i kiborỳ eo ze vato pisake bey niboriboriegne natao hili’e zay. 47 Fa i Maria Magdalena naho i Maria rene i Josesy nagnente i toeragne nandevegnagne i Jesosỳ.