Talily Soa Nisorate i Marka
16 Naho fa nitapetse areke i Sabatay, le nandeha nivily raha magnitse ty Maria Magdalena naho i Maria rene i Jakoba vaho i Salome, mba hahoso iareo amy i fate i Jesosỳ. 2 Tamy ty maraindray bey i andro voaloha’e amy ty heregnandroy, le nandeha an-kibory agne iareo. Fa nanjirike i androy vaho izay iareo niavy an-kibory agne. 3 Nifagnontane iareo tie: “Ia ty hagnafake i vato boribory hily i kiborỳ mba hidirantikagne?” 4 Faie, ie iareo niandra, aheo iareo tie fa nisy namarimbarigne i vato hily i kiborỳ, ie amy izao tena bey. 5 Naho fa nizilike tan-kibory ao iareo, le nahatrea lahilahy raike nagnisy akanjo foty bey, nitoboke tan-kavana amy i kiborỳ ao. Le nigaga iareo. 6 Le hoe reke tamy iareo: “Ko gaga nareo! Haiko fa i Jesosy te Nazareta, i nivonoegne tamy i boda-kataey eoy o paliae’areò. Nivelomegne reke, le fa tsy ato. Avia nareo hagnente i toeragne nasia iareo azey. 7 Akia nareo mandehana, le rehafo’areo i mpiana’e rey, agnisa izay ty Petera tie: ‘Fa an-dalagne ho a Galelia agne reke tie amy izao. Agne ty hahatreava’areo aze, arake i fa nirehafe’e tama’areoy.’” 8 Naho fa niakatse boake an-kibory ao iareo, le nilay reketse ty taho iareo naho ty halatsà iareo. Tsy nirehake ndra inogn’ino tama o ndaty iareo satria natahotse.