Talily Soa Nisorate i Marka
2 Faie, ie andro tsiampeampe tafara izay, le niheregne ta Kapernaomy ao ty Jesosy sady nirey o ndatio tie nijanogne tamy ze tragno raike zay ao reke. 2 Nizilike an-tragno ao ty ankamaroa i ndaty rey, le ndra ty tan-dalan-tragno eo aza nifeno ndaty. Le nanomboke nirehake tamy iareo ty saontsin’Agnahare reke. 3 Nisy lahilahy raike maleme zay, nente o ndatio tamy i Jesosy eo. Lahilahy efatse ty ninday aze tamy ty fandreagne. 4 Faie tsy afake nizilike tamy i tragno nisy i Jesosỳ ao iareo, noho ty hamaro i vahoakey. Hafarà’e i tafo-tragnoy ro niloaha iareo, le eo ty nanjotsoa iareo i lahilahy malemey miarake amy i fandreagne nisy azey. 5 Naho fa nahatrea ty finoa iareo ty Jesosy, le hoe reke tamy i lahilahy malemey: “Voavela ty fahota’o anake.” 6 Le nisy tamy ty mpampianatse lalàna* nitoboke teo nieretseretse hoe izao: 7 “Akore ty ahavania ty lahy tia mirehake hoe izao? Manivetive an’Agnahare avao! Ia ty ndaty afake mamela heloke, naho tsy Andrianagnahare raike avao?” 8 Faie le avy le nihay i Jesosy ze raha nieretserete iareo zay, le hoe reke tamy iareo: “Nagnino nareo ro mieretseretse raha hoe ireo? 9 Ty aia ty mora, ty mirehake amy i lahilahy malemey tihoe: ‘Voavela ty fahota’o’ vao sa tihoe: ‘Mitsangana, indeso o fandrea’ò, le akia mandehana’? 10 Faie mba hahafantara’areo tie managne fahefagne hamela heloke ambone tane etoy i Ana o ndatỳ ...”, le hoe reke tamy i lahilahy malemey: 11 “Izao ty rehafeko ama’o: Mitsangana, le andeso o fandrea’ò, le molia an-tragno’o agne.” 12 Nitsangagne i lahilahỳ sady le avy le nente’e i fandrea’ey, le nandeha tagnatreha i ndaty maroy eo reke. Nigaga areke iareo iaby, le nagnomey voninahitse an’Agnahare sady nanao tihoe: “Mbe tsy nahatrea raha hoe izao indraike tika!”
13 Nandeha ta moron-driake agne indraike ty Jesosy, le nisy ndaty maro ty nimbama’e mbeo, le nampianare’e. 14 Nahatrea i Levy ana-dahy i Alifeo reke naho fa niavy eo. Nitoboke tamy i birò famoriagne hetray ao ty Levy. Hoe reke tama’e: “Andao hagnorike ahy.” Le avy le nitsangagne ty Levy sady nagnorike aze. 15 Ie tafara izay, le nihinagne tan-tragno i Levy tao ty Jesosy naho i mpiana’e rey. Maro ka ty ndaty mpitake hetra naho ty mpanota niarake nihinagne tamy iareo tao. Ty anto’e, fa nanjare mpanonjohy ty lia i Jesosy ka iareo. 16 Faie naho fa nahatrea i Jesosy niarake nihinagne tamo o mpanotao naho o mpitake hetrao o mpampianatse lalànao naho o Fariseò, le hoe iareo tamy i mpiana’e rey: “Miarake mihinagne amo o mpanotao naho o mpitake hetrao ka vao irekeo?” 17 Naho fa nirey i Jesosy zay, le hoe reke tamy iareo: “Tsy ty ndaty matanjake ro mipay dokotera, fa ty ndaty marare. Tsy hitoka o ndaty maregneo ty niaviako fa o mpanotao.”
18 Nifaly hanegne o mpiana i Jaonao naho o Fariseò. Le nandeha mbamy i Jesosy mbeo iareo sady nanao tihoe tie: “Nagnino o mpiana i Jaonao naho o mpiana o Fariseò ro mifaly hanegne fa o mpiana’ò tsy mba mifaly hanegne?” 19 Hoe ty Jesosy tamy iareo: “Naho mbe amy i nama’e rey eo i mpagnengay, le tsy misy anto’e toko’e hifalia iareo hanegne. Tsy mifaly hanegne iareo naho mbe amy iareo eo i mpagnengay. 20 Faie ho avy ty andro hampialagne i mpagnengay amy iareo eo, le amy ze andro zay iareo ro hifaly hanegne. 21 Tsy misy ndaty manakeke vorodea amy ty tapa-damba vaovao. Naho izay ty atao’e, le horirite i tapa-damba vaovaoy i vorodeay, le vao mainke hindra i riatse ama’ey. 22 Tsy misy ndaty ka hagniligne divay vaovao amy ty siny holitse fa voroke. Satria naho izay ty atao’e, le horiate i divaỳ i siny holitsey, le hirarake an-tane eo i divaỳ sady ho simba ka i siny holitsey. Fa tsy maintsy siny holitse vaovao ro isiagne divay vaovao.”
23 Ie tamy ze Sabata raike zay, le nandalo tamy ze horake zay ty Jesosy naho i mpiana’e rey, le nandrofotse voam-bare erike avao iareo nandehay. 24 Hoe areke o Fariseò tama’e: “Nagnino iareo ro manao ty raha tsy azo atao amy ty andro Sabata?” 25 Faie hoe reke tamy iareo: “Mbe tsy nivakie’areo tamy i Soratse Masigney ao vao tie, ino ty raha natao i Davida naho i lahilahy niarake tama’e rey naho fa nilany hanegne iareo, le nikeré? 26 Mbe tsy nivakie’areo hao i tantara miomba i Abiatara lahibey ty mpisorogney? Nizilike tamy i anjomban’Agnaharey ao ty Davida tamy izay, le nihinagne tamy i mofo atoroy, ie amy izao tsy misy ndaty mahazo mihinagne o mofo iohoe, naho tsy o mpisorogneo avao. Nimea i Davida tamy i mofoy ka i lahilahy niarake tama’e rey.” 27 Le hoe reke tamy iareo: “I Sabatay, le natao hoahy o ndatio, fa tsy i Sabatay ro ambone ty amo o ndatio. 28 Rehafeko ama’areo, fa i Ana o ndatỳ ty Tompo o Sabatao.”