Talily Soa Nisorate i Marka
3 Nizilike tamy i sinagoga zay ao indraike ty Jesosy. Nisy lahilahy raike mate tagnagne zay ty tao. 2 Le nambena iareo ty Jesosy mba hahatreavagne tie, hagnasitragne i lahilahỳ amy i andro Sabatay vao reke. Amy izay misy raha azo anoagne kitomboke aze. 3 Le hoe ty Jesosy tamy i lahilahy mate tagnagney: “Mitsangana rehe, le mihova agnivo etia.” 4 Le hoe reke tamy iareo naho fa niavy eo: “Ty aia ty azo atao amy ty andro Sabata, ty manao soa sa ty manao raty? Ty mamonje aigne sa ty mamono?” Faie nitsìgne avao iareo. 5 Naho fa boake nagnente iareo ty Jesosy, le niboseke sady nalahelo noho ty hamafe fo iareo. Le hoe reke tamy i lahilahy mate tagnagney: “Ahitsio i tagna’oy.” Naho fa nahitsy i lahilahỳ i tagna’ey, le nisitragne. 6 Le avy le niakatse o Fariseò, le niara-nidineke tamo o mpanohagne i Herodao mba hipay fomba hanoheragne i Jesosy naho hamonoagne aze.
7 Faie niala ty eo ty Jesosy naho i mpiana’e rey, le nandeha an-driake agne. Nisy ndaty maro boake a Galelia naho a Jodia agne nagnorike aze. 8 Ndra ty ndaty boake a Jerosalema naho Idomea naho boake an-dafe eroy i Jordana vaho boake tamy ty faritse nagnodidigne i Tiro naho i Sidona agne aza nimaro ty nimbama’e mbeo, satria naharey i fahagagagne maro natao’e rey. 9 Le nirehafe i Jesosy i mpiana’e rey mba hagnomagne lakagne hisy aze, amy izay o ndatio tsy mifanisike ama’e eo. 10 Satria fa maro ty ndaty nisitràgne i Jesosy, le nivory mbama’e mbeo ze ndaty narare mafe mba hitsapa aze. 11 Ndra o demoniao aza naho fa nahatrea aze, le niankohoke agnatreha’e eo sady nikorakorake nanao tihoe: “Anan’Agnahare rehe!” 12 Faie rinara i Jesosy mafe mateteke o demoniao mba tsy hagnambara ndra amy ia ndra amy ia ty miomba aze.
13 Nanganike tamy ze vohitse raike zay reke, le nitokave’e ze nitea’e hiarake ama’e, le nimbama’e mbeo iareo. 14 Nijobogne lahilahy 12 reke, le nitokave’e tihoe apostoly iareo. Ireo ty niarake tama’e sady nirahe’e mba hitory, 15 le nimea’e fahefagne mba handroake demonia ka.
16 Intoagne iaby iareo 12 lahy nijobognegne rey: I Simona tokavegne tihoe ka Peteray, 17 i Jakoba ana i Zebedio naho i Jaona rahalahi’e (nimea’e agnaragne tihoe Boanerjesy ka iareo roe. “Ana ty Varatse” ty dika o agnaragne iohoe), 18 i Andrea, i Filipo, i Bartolomeo, i Matio, i Tomasy, i Jakoba ana i Alfeo, i Tadeo, i Simona Kananeana 19 naho i Jodasy Iskariota i namadike aze naho fa tafara tatoỳ.
Nizilike tamy ze tragno raike zay ty Jesosy naho fa niavy eo, 20 le nisy ndaty maro indraike nivory tama’e eo, le ndra ty ho nihinana’e naho i mpiana’e rey hanegne aza tsy nisy. 21 Faie naho fa naharey izay i longo’e rey, le nandeha mbama’e mbeo mba hitsepake aze. Satria hoe iareo: “Nanjare minegne reke.” 22 Hoe ka o mpampianatse lalàna* boake a Jerosalema agneo: “I Belzeboba o amo o lahio aò, sady fahefagne boake amy ty lahibey o demoniao o ahavita’e mandroake demoniao.” 23 Naho fa boake nitokave’e mbama’e mbeo iareo, le nirehake fagnoharagne tamy iareo reke. Hoe reke: “Akore ty ahafaha i Satana mandroake i Satana? 24 Naho mialy an-tragno ty fanjakagne raike, le tsy haharetse. 25 Naho misy keleiagne ka mialy an-tragno, le tsy haharetse ze keleiagne zay. 26 Hoe izay ka fa naho i Satana avao ro mialy amy ty vata’e, le tsy haharetse ty fanjakà’e fa ho rava. 27 Tsy hisy ndaty ho afake hizilike an-tragno ty lahilahy raike matanjake ao mba hangalatse ty fanagna’e naho tsy arohi’e hey i lahilahỳ. Izay avao ty ahafaha’e mangalatse ty raha an-tragno’e ao. 28 Volagneko ama’areo to vata’e, fa ze hene fahotagne atao o ndatio naho ze hene rehake fanivetiveagne rehafe’e, le hahazoa iareo famelan-keloke. 29 Fa ze manivetive i fagnahy masigney, le tsy hahazo famelan-keloke nainai’e satria fahotagne tsy ahazoagne famelan-keloke nainai’e zay.” 30 Nirehake izay ty Jesosy satria hoe iareo: “Misy demonia reke.”
31 Tamy izay, le niavy ty rene’e naho i rahalahi’e rey nitsangagne an-tane ao. Nagnirake ndaty ho mbama’e mbeo iareo mba hirehake aze. 32 Le hoe i vahoake nitoboke nagnodidigne aze rey: “An-tane ao ty rene’o naho i rahalahi’o rey mipay azo.” 33 Faie hoe ty navale’e iareo: “Ia moa ty reneko naho ty rahalahiko?” 34 Le nagnente i ndaty nitoboke magnodidigne aze rey reke sady nirehake hoe izao: “Intoagne ty reneko naho ty rahalahiko! 35 Ty anto’e, ze manao ty zoton’arofon’Agnahare ro rahalahiko naho rahavaveko vaho reneko.”