Talily Soa Nisorate i Marka

4 Nampianatse ta moron-driake agne indraike ty Jesosy, le nisy vahoake maro niharine aze, hafarà’e reke nijogne agnate lakagne ao le nitoboke. Le nikisake kedekede reke fa i vahoake rey nijanogne tamy i faseke a moron-driakey eo avao. 2 Le nanomboke nampianatse iareo raha maro tamy ty alala ty fagnoharagne reke. Hoe reke tamy iareo: 3 “Izao e, tsanogno’areo toy! Nisy mpambole raike nandrarake* tabiry. 4 Ie naho fa nandrarake i tabiry rey reke, le ty ila’e nipoke tan-dalagne ey. Faie naho fa nitrea o vorogneo i tabiry rey, le nihane’e. 5 Ty ila’e tamy i tabiry rey ka nipoke tamy ty tane be vatovato. Faie le avy le nitiry i tabiry rey satria tsy le nilaleke i tane nisy azey. 6 Ie naho fa nipisagne i tarignandrokey, le nimate iareo satria tsy nisy ho namaharagne i vaha’ey. 7 Ty ila’e amy i tabiry rey ka nipoke tamy ty tane feno raha mitiry misy fatipatike. Faie naho fa nitiry i raha mitiry misy fatipatike rey, le nandrakoke aze naho namehefehe aze, hafarà’e tsy namokatse i tabiry rey. 8 Fa ty ila’e amy i tabiry rey nipoke amy ty tane soa, le nitiry naho nitombo, sady namokatse tamy ty fara’e. Nihoatse ty hamaro i tabiry nambolegney ty vokatse niazo ama’e. Ty ila’e amy i tabirỳ namokatse 30, le ty ila’e 60, fa ty ila’e 100.” 9 Hoe ka ty Jesosy: “Ho anareo ze afake mitsanogne, le mitsanogna soa.”

10 Ie naho fa nandeha i vahoake rey, le ireke irery avao ty nisisa teo. Le nandeha mbama’e mbeo ty ila’e amy i mpiana’e rey naho i 12 lahy rey mba hagnontane aze ty miomba i fagnoharagne rey. 11 Hoe reke tamy iareo: “Inareo ro nengagne hahazo ty heve ty raha mietake masigne miomba i Fanjakàn’Andrianagnaharey. Fa ty ndaty hafa, fagnoharagne ty fomba irehafagne aze ama’e, 12 amy izay iareo ndra tie magnente aza, le tsy hahatrea, sady ndra tie maharey ka aza iareo, le tsy hisy raha horendre iareo. Izay ty mahavy iareo tsy hiheregne naho tsy hahazo famelan-keloke.” 13 Hoe ka reke tamy iareo: “Naho tsy niazo’areo i fagnoharagne teoy, akore ty hahazoa’areo i fagnoharagne ila’e rey?

14 “I tabiry nararake rey, le ty hafatse miomba i Fanjakagney.* 15 Nisy tamy i tabiry rey nipoke tan-dalagne ey. Irey le ze ndaty maharey i hafatsey, faie naho vaho maharey i hafatsey iareo, le avy ty Satana magnafake i hafatse nambolegne tamy iareo aoy. 16 Nisy ka ty nipoke amy ty tane be vatovato. Irey le ze ndaty maharey i hafatsey, faie le avy le magneke* aze am-pifaleagne. 17 Ndra tie tsy le namahatse laleke am-po iareo ao aza i hafatsey, le nitiry tagnate ty fotoagne kedekede avao. Faie naho vaho niatreke raha sarotse ndra fagnenjehagne iareo noho ty finoa iareo i hafatsey, le nihemotse. 18 Ty ila’e amy i tabiry rey ka nipoke tamy ty tane feno raha mitiry misy fatipatike. Irey le ze ndaty maharey i hafatsey, 19 faie noho ty finekoneko amy ty fiaignagne naho ty famitaha o harenao,* vaho ty fagniriagne hahazo ze kila raha ro mamehefehe naho mandrakoke i hafatsey, hafarà’e tsy mamokatse iareo. 20 Le i tabiry nipoke amy ty tane soay, le ze maharey i hafatsey sady mandrambe aze soa. Le nisy ty namokatse 30, ty ila’e 60, fa ty ila’e 100.”

21 Hoe ka reke tamy iareo: “Tsy misy ndaty mamelogne jiro, le hanao aze ambane latabatse ao ndra ambane fandreagne ao, fa tsy maintsy hatao’e amy i fisiagne azey eo i jiroy. 22 Tsy misy raha mietake tsy habaribary zao, le tsy misy raha soa haja lelia’e tsy hotrea zao. 23 Ze afake mitsanogne, le mitsanogna soa.”

24 Hoe indraike reke tamy iareo: “Tsanogno’areo soa ze raha rei’areo. Arakarake ze fagnaragnagne ampiasae’areo ro hagnaragnagne anareo ka. Ie, hahazo fagnampe’e mandikoatse igne aza nareo. 25 Satria ze managne, le vao mainke homeagne maro, fa ze tsy managne, le ndra ze kede anagna’e aza mbe halaegne ama’e ka.”

26 Hoe ka ty Jesosy naho fa niavy eo: “I Fanjakàn’Andrianagnaharey, le azo ampitoviegne amy ty lahilahy raike nandrarake tabiry. 27 Miroro i lahilahỳ naho fa halegne, le mifoha reke naho fa maraindray. Le nitiry ka i tabiry narara’e rey sady nitombo faie tsy nihai’e tie tamy ty fomba akore. 28 Mitombo tsikedetsikede i tabirỳ, le avy eo misy taho’e, le sampa’e, le misy rave’e, le avy eo mamokatse. 29 Ie matoe ty voa’e, le mandeha reke mangalake aze satria fa avy i fotoagne famoriagne vokatsey.”

30 Hoe indraike ty Jesosy naho fa niavy eo: “Ino ty hampitovientikagne amy i Fanjakàn’Andrianagnaharey? Ndra, ino ty fagnoharagne hampiasaentikagne mba hagnazavagne aze? 31 Azo ampitoviegne amy ty voan-tsinapy* reke. O voa iohoe ty voa fara izay ty kidikidy amy ze kila voa ambone tane etoy. 32 Faie naho fa mitiry reke, le ie ty fara’e bey amo o agnagneo iaby sady misy sampa’e bey. Manjare afake mamboatse tragno eo areke o vorogneo sady mialokaloke ama’e eo.”

33 Maro ty fagnoharagne hoe izay nampiasae i Jesosy naho fa nampianatse iareo ty saontsin’Agnahare reke, faie natao’e nifagnarake amy ty raha hotaka ze nitsanogne aze. 34 Ie, lava nampiasa fagnoharagne avao reke naho fa nirehake tamy iareo. Faie nihazavae’e tamy i mpiana’e rey iaby i fagnoharagne rey naho fa nitokagne iareo.

35 Ie naho fa nihariva i androy, le hoe reke tamy iareo: “Andao tika ho a moro’e raike eroy.” 36 Naho fa boake nampoly i vahoakey iareo, le nente iareo tamy i lakagney ty Jesosy. Nisy lakagne hafa niarake tamy iareo ka ty tey. 37 Nisy tiobey tampoke ty tan-driake ey, le nagnonja bey ka i riakey, hafarà i lakagney fa ho nilenteke. 38 Tamy izay ty Jesosy, le niroro niondagne tam-boly i lakagney eo. Le nifohaze iareo reke sady hoe iareo tama’e: “O Mpagnanatse, tsy trea’o vao itika fa homateo?” 39 Le nifoha reke sady nikomandie’e i tiokey, le hoe ka reke tamy i riakey: “Mipendregna sady mitsìgna!” Le nijanogne i tiokey sady nipendregne ka i riakey. 40 Hoe reke tamy iareo naho fa niavy eo: “Nagnino nareo ro matahotse? Mbe tsy manam-pinoagne avao vao nareo?” 41 Faie tena natahotse iareo, le nifampirehake tihoe: “Ia maregne ty ndaty toio rikiahe? Aia ndra o tiokeo naho o riakeo magnorike ty raha rehafe’e!”