Talily Soa Nisorate i Marka

12 Nanomboke nirehake fagnoharagne tamy iareo reke naho fa niavy eo. Hoe reke: “Nisy lahilahy raike nanagne teteke famboleagne voaloboke. Nambole voaloboke tao reke, le nifahera’e ty magnodidigne i tete’ey sady nihaly lavake fandiàliàgne voaloboke tagnate’e ao reke. Namboatse tragno abo tao ka reke hatao’e fiambenagne i tete’ey. Nampagnofae’e ndaty mpambole i tete’ey, le nandeha an-tane hafa agne reke. 2 Naho fa niavy ty fotoagne fimasaha i voalobokey, le nagnirake amo o mpanompo’eo reke mba handeha amy i mpambole rey agne hangalake ty anjara’e amy i vokatsey. 3 Faie nitsepahe iareo i mpanompoy, le jinera iareo sady nampolie iareo tagnam-polo. 4 Nagnirake mpanompo hafa ho amy i mpambole rey agne indraike reke, faie jinera iareo tamy ty loha’e ka igne sady nafaha iareo baraka. 5 Le nagnirake hafa indraike reke faie vinono iareo. Nagnirake mpanompo maro hafa mbeo indraike reke, faie ty ila’e jinera i mpambole rey, le ty ila’e vinono iareo. 6 I ana-dahi’e tena tea’ey raike sisa ty tama’e teo. Io ty nirahe’e tamy iareo agne fara’e. Ty anto’e, nieretseretse reke tie: ‘Mba hohajae iareo i ana-dahikoy.’ 7 Faie nifampirehake i mpambole rey tie: ‘Itike i mpandovay. Andao hovonoentikagne reke amy izay hoazontikagne i lova’ey.’ 8 Nitsepahe iareo reke, le vinono iareo, sady natora iareo ivela i teteke famboleagne voalobokey agne. 9 Ino ty hatao i tompo i teteke famboleagne voalobokeỳ? Ho avy reke, le hamono iareo, le i teteke famboleagne voalobokey homei’e ndaty hafa. 10 Mbe tsy nivakie’areo amy Soratse Masigne ao vao toy: ‘Ty vato niheje o mpamboatse tragnò ro hanjare vato fara’e lahibey* amy i tragnoy. 11 Boake amy i Jehovah zay sady tena mahalatsa antikagne’?”

12 Le nitea iareo ho nitsepahegne ty Jesosy, satria nihay iareo tie iareo ty tan-tsay i Jesosy agne, naho fa ireke nirehake i fagnoharagney. Faie natahotse o vahoakeo ka iareo, hafarà iareo nandeha.

13 Nirahe iareo mbamy i Jesosy mbeo ty ila’e amo o Fariseò naho o mpanohagne i Herodao naho fa niavy eo mba hamandrike aze amy ty raha rehafe’e. 14 Hoe iareo naho fa niavy tamy i Jesosy eo: “O Mpagnanatse, fanta’ay fa mirehake ty maregne lognandro rehe, tsy mipay sitrake ndra amy ia ndra amy ia, sady tsy mifily volo o ndaty. Mampianatse ty maregne miomba an’Agnahare ka rehe. Azo atao vao sa tsy azo atao ty mandoa hetra amy i Kaisara? 15 Toko’e handoa hetra vao zahay sa tsy toko’e handoa?” Faie hai’e tie manao soa miatreke iareo, le hoe reke tamy iareo: “Nagnino nareo ie mitsapa hevetse ahio? Indeso’areo denaria raike atoy raho hohenteako.” 16 Nindesa iareo denaria raike reke, le hoe reke tamy iareo: “Sare ia io, le agnara ia o misoratse eò?” Hoe iareo tama’e: “I Kaisara.” 17 Le hoe ty Jesosy: “Aloao amy i Kaisara areke ze ahy i Kaisara, fa aman’Andrianagnahare ze an’Andrianagnahare.” Le tena nilatsa tama’e iareo.

18 Nimbama’e mbeo ka o Sadoseo mirehake tie tsy misy ty famelomagne amy ty mateo, le nagnontane aze tie: 19 “O Mpagnanatse, nanoratse ho antika ty Mosesy tie, naho misy lahilahy raike manambaly faie nimate tsy niterake, le toko’e hovalie ty rahalahi’e i valy nenga’ey mba hagnomey taranake i rahalahi’e fa nimatey. 20 Nisy fito mirahalahy zay ty tama’ay tetoa. Nanambaly i raike voaloha’ey, faie nimate tsy nanagne taranake. 21 Le nanambaly i ampelay ty rahalahi’e faharoe, faie le mbe nimate tsy nanagne taranake avao ka. Nanao hoe izay ka i rahalahi’e fahateloy. 22 Le sambe nanambaly aze iaby iareo fito, faie sambe nimate tsy nanagne taranake iaby. Nimate ka i ampelay tamy ty fara’e. 23 A naho fa ho avy amy izay areke i famelomagne ty matey, ia amy iareo ty ho valy i ampelay? Ty anto’e, sambe fa nanambaly aze iaby iareo fito lahy.” 24 Le hoe ty Jesosy tamy iareo: “Sambe tsy hai’areo ndra ty Soratse Masigne ndra ty herin’Andrianagnahare, le izay mahavy anareo diso hevetseo. 25 Naho fa hovelomegne o ndaty mateo, le tsy hagnengavao ndra hengaem-bao, satria hanahake o anjely an-dagnitse agneo iareo. 26 Naho ty miomba ze famelomagne ty mate zay ka, mbe tsy nivakie’areo tamy i boke i Mosesỳ ao vao, i fitantaragne miomba i hatae* nirehetseỳ? Nisaontsy tamy i Mosesy ty Andrianagnahare tamy izay tie: ‘Iraho le Andrianagnahare i Abrahama naho Andrianagnahare i Isaka vaho Andrianagnahare i Jakoba.’ 27 Tsy Andrianagnahare ty mate areke reke, fa Andrianagnahare ty velogne. Tena diso hevetse nareo.”

28 Nitsanogne i aly heve iareoy ty raike amy i mpampianatse lalàna* teo rey. Nitrea’e tie nivoavale i Jesosy soa i fagnontenea iareoy, le hoe reke tamy i Jesosy: “Ino ty lily fara’e lahibey amo o lilio iaby?” 29 Le hoe ty navale i Jesosy aze: “Ty voaloha’e le tihoe: ‘Janjigno ry Israely, i Jehovah ty Andrianagnaharentikagne. Tsy misy Jehovah ankoatse aze fa ie raike avao. 30 Teavo amy ty fo’o iaby, amy ty tegna’o iaby naho amy ty sai’o iaby vaho amy ty heri’o iaby ty Jehovah Andrianagnahare’o.’ 31 Ty faharoe le tihoe: ‘Teavo manahake ty vata’o ty nama’o.’ Tsy misy lily lahibey mandikoatse ireo.” 32 Le hoe i mpampianatse lalànay tama’e: “O Mpagnanatse, maregne ze reha’o zay. ‘Raike avao vata’e ty Andrianagnahare, fa tsy misy ankoatse aze.’ 33 Le ty hatea aze amy ty fo iaby naho amy ty saigne iaby vaho amy ty hery iaby, naho ty hatea’o ty nama’o manahake ty vata’o ro tena sarobily, naho ampitahaegne amy ty fagnatetse oroagne naho ty sorogne.” 34 Naho fa nitrea i Jesosy tie namale taman-kilala reke, le hoe reke tama’e: “Tsy lavitse i Fanjakàn’Andrianagnaharey rehe.” Faie tsy nisy ndaty nahavany nagnontane aze sasa tafara izay.

35 Tamy i Jesosy mbe nampianatse tamy i tempolỳ aoy, le nirehake tie: “Nagnino o mpampianatse lalànao ro mirehake tie ana i Davida ty Kristy? 36 Naho fa nahazo fagnahy masigne ty Davida, le nirehake tihoe tie: ‘Hoe ty Jehovah tamy i Tompokoy: “Mitoboha an-kavanako eo, amparake ty anoako o fahavalo’ò ambane tombo’o eo.”’ 37 Akore areke ty maha ana i Davida aze, ie amy izao ty vatategna i Davida ro nitoka aze tihoe Tompo?”

Nahafale i vahoakey ty nitsanogne i Jesosy. 38 Le nanohy i fampianara’ey reke sady nirehake tihoe: “Mitaoa nareo amo o mpampianatse lalànao, satria tea iareo ty magnisy akanjo lava mireparepa, ty ho salamaegne am-pagnajagne naho fa a bezara ey, 39 ty mitoboke aloha ey naho fa amo o sinagogao ao vaho ty mitoboke amy ty toeragne miambake natokagne hoahy ty ndaty ambone naho fa amo o feteo agne. 40 Lanie iareo ka ty fanagna* o vantotseo sady manao vavake lava bey iareo mba ho fisehosehoagne avao. Ho mafe areke ty fagnamelohagne hahazo iareo naho ampitahaegne amy ty ndaty hafa.”

41 Le nitoboke tandrife i fampipoham-bolay ty Jesosy. Nihentea’e i ndaty nampipoke vola tao rey. Maro amo o mpagnarivò ro nampipoke vola maro tagnate’e tao. 42 Nisy ampela vantotse mahantra zay nimbeo, le nampipoke vola roe* tena kidikidy rezay. 43 Le nitokave i Jesosy i mpiana’e rey sady hoe reke tamy iareo: “Volagneko ama’areo to vata’e, fa o ampela vantotse mahantra iohoe ro nagnomey bey naho ampitahaegne amy i ndaty maro nampipoke vola amy i fampipoham-bolay aoy. 44 Ty anto’e, iareo iaby nampipoke vola tao rey, le ze sisasisa’e fa tsy nilany iareo ty napò iareo ao, fa o ampela iohoe ndra tie mahantra aza, le napò’e ao iaby i vola nanagna’ey, ie amy izao igne ty mba ho niveloma’e.”