Asa o Apostolio
19 Tamy i Apolosy ta Korinto agney, le nitsoehe i Paoly ze faritse tagnivon-tane agne, naho fa niavy eo reke nizotso mba Efesosy mbeo. Nahatrea mpianatse maromaro tao reke, 2 le hoe reke tamy iareo: “Nahazo fagnahy masigne vao nareo tamy inareo nanjare mpinoy?” Le hoe iareo: “Aha’a, sady toe mbe lia’ay naho naharey ze o fagnahy masigne zao.” 3 Le hoe ty Paoly: “Ino ty badisa nanoagne anareo?” Le hoe iareo: “Badisa i Jaona.” 4 Le hoe ty Paoly: “Natao i Jaona badisa o ndatio mba ho mareke hanoroagne ty fibebaha iareo. Nirehafe’e ka o ndatio mba hino i ho avy afara’ey, le i Jesosy.” 5 Naho fa naharey izay iareo, le natao badisa tamy ty agnara i Jesosy Tompo. 6 Naho fa nametra-tagnagne tamy iareo ka ty Paoly, le nipoke tamy iareo i fagnahy masigney, sady nanomboke nirehake tamy ty firehake sambe hafa naho naminany iareo. 7 Roe amby folo lahy teo ho eo ty isa iareo iaby.
8 Nizilike tamy i sinagogay ao reke, le nitory tao tagnate ty telo volagne sady tena tsy natahotse naho fa nanao izay. Nanao lahajaka naho nandrese lahatse o ndatio miomba i Fanjakàn’Andrianagnaharey ka reke. 9 Faie nagnamafe ty fo’e ty ila’e amy iareo, le tsy nimete nino, hafarà iareo nagnaratiraty ty miomba i Lalagney tagnatreha i vahoakey eo. Niala ty eo areke ty Paoly sady nandese’e i mpianatse rey, le nanao lahajaka tamy i efetse malalake tamy ty lakilasy i Tirano ao reke isan’andro. 10 Tagnate ty roe taogne ty nanoa’e izay. Nanjare naharey ty saontsy i Tompo areke ze ndaty iaby nitoboke tamy ty faritse Azia agne ndra Jiosy ndra Grike.
11 Mbe nanao fahagagagne miambake tamy ty alala i Paoly ty Andrianagnahare. 12 Ndra akanjo naho fiarovagne akanjo avao aza ro akasike i vata i Paolỳ, le indesegne amo o ndaty marareo agne, le avy le sitragne iareo sady le avy le miakatse ka o demoniao. 13 Faie nisy Jiosy ila’e nandeha nandroake demonia, le nagnohatse nampiasa ty agnara i Jesosy Tompo mba handroahagne i demonia rey. Izao ohatse ty nirehafe iareo: “Amy ty alala i Jesosy, i torie i Paolỳ ty andiliako azo mba hiakatse.” 14 Nanao izay ka i lahilahy fito, ana i Skeva lahibey ty mpisorogne jiosỳ. 15 Faie hoe ty navale i demoniay iareo: “Fantako ty Jesosy, le fantako ka ty Paoly, fa inareo ia?” 16 Le niambotraha i lahilahy nisy demoniay iareo sady nialia’e, le nirese’e iareo iaby. Hafarà iareo nilay tsy nisikigne boake amy i tragno nisy iareoy ao sady naratse. 17 Nanjare nahay ze raha zay o Jiosy naho o Grike nitoboke ta Efesosy agneo. Natahotse ze kila ndaty, le i agnara i Jesosy Tompoy ka nahazo voninahitse. 18 Maro tamy i ndaty nanjare mpino rey ro niavy mba hieke naho hibaboke tagnatreha o ndatio eo ty raha raty natao’e. 19 Maro tamy i ndaty nimpanao mazy rey ka ro ninday ty boke iareo, le nagnoro izay tagnatreha o ndatio eo iaby. Naho fa natamba iareo ty vily i boke rey, le vola volafotsy 50 000 ty vili’e. 20 Ty voka’e, nitombo avao naho nihanahery ty saontsy i Jehovah.
21 Tafara ty nisehoa o raha rehoe, le nanapa-kevetse ho a Jerosalema agne ty Paoly naho fa boake nanegnantegna i Makedonia naho i Akaia. Hoe reke: “Naho fa boake mandeha agne raho, le tsy maintsy mahatrea i Roma.” 22 Nirahe’e ho a Makedonia agne areke ty roe lahy amy i nagnampe aze rey, le i Timoty naho i Erasto, fa ireke nijanogne kedekede tamy ty faritse Azia agne.
23 Tamy ze fotoagne zay, le nisy korotam-bey miomba i Lalagney. 24 Ty anto’e, nisy lahilahy atao tihoe Demetrio zay, mpanefe volafotsy ty asa’e. Mateteke reke ro namboatse ty sare ty tempoly i Artemisy. Nanjare nahazo vola bey ze mpanao asa tagnagne manahake aze noho o asa iareo iohoe. 25 Navori’e areke i nama’e rey naho ty mpanao asa tagnagne hafa, le hoe reke: “O rikiahe, hai’areo soa fa ty asantikagne toy o maha mpagnarivo antikagneo. 26 Faie trea’areo naho rei’areo hinane zao, fa tsy ty ndaty a Efesosy eto avao, fa le fa ho ty vahoake amy ty faritse Azia iaby ro niresé i Paoly lahatse, le nanjare nino tie tsy tena andrianagnahare o andrianagnahare amboaregne tagnagneo. 27 Naho engantikagne hiseho avao areke ty raha hoe izao, le tsy ty asantikagne toy avao ro hanjare ho raty laza fa ndra i Artemisy, i andrianagnaharentikagne lahibeỳ ka tsy hisia o ndatio dika’e. Tsy hagnisy hasi’e o andrianagnaharevaventikagne iohoe ka ze ndaty manompo aze amy ty faritse Azia eto naho ty ndaty iaby magneran-tane.” 28 Tena niboseke iareo naho fa naharey izay, le nikorakorake tie: “Lahibey ty Artemisy o Efesianao!”
29 Nisamborohotake ty ndaty tamy i tanàgney ao naho fa naharey izay, le nangororoke nizilike tamy i toeragne fanoagne fampisehoagney ao. Nitaritarihe iareo mbeo ty Gaio naho i Aristarko, i Makedoniana niharo lia tamy i Paoly rey. 30 Nite hizilike ao ka ty Paoly mba ho nirehake tamy i vahoakey faie tsy nenga i mpianatse rey. 31 Ndra ty ila’e amy i mpiandraikitse fete naho fihisagne tao rey aza nisoa fagnahy tamy i Paoly, le nagnirake ndaty mba hihalale tama’e tsy hizilike amy i toeragne fanoagne fampisehoagney ao satria va’e hagnoho-doza aze zay. 32 Nagnorentsegne ka i ndaty rey tie tao, le hafa ty raha nirehafe ty ila’e, fa ty ila’e hafa ty raha nirehafe’e. Ty ankamaroa i ndaty niavy teo rey aza tsy nahafantatse ty anto’e nivoriagne ao fa le fa niavy teo avao. 33 Le nafaha ty ila’e amy iareo hiala amy i vahoakey eo ty Aleksandra, satria nisy Jiosy nanosetoseke aze magnaloha. Nanao fihetseke tamy ty tagna’e ty Aleksandra naho fa niavy eo hampitsignagne i vahoakey mba hahafaha’e mirehake amy iareo ty fiarovan-tegna’e. 34 Faie naho fa nihay iareo tie Jiosy reke, le avy le nikorakorake tagnate ty roe lera teo ho eo iareo iaby tie: “Lahibey ty Artemisy o Efesianao!”
35 Faie nivita i mera i tanàgneỳ avao ty nampitsigne i vahoakey, tamy ty fara’e. Le hoe reke: “O ry Efesiana, ia ty ndaty tsy mahafantatse tie ty tanà o Efesianao ro mpiambegne i tempoly i Artemisy lahibeỳ naho i sare’e nipoke boake an-dagnitse agney? 36 Satria tsy azo ialian-kevetse o raha rehoe, le toko’e ho tony avao nareo sady tsy ho memeke hanao raha. 37 Ty anto’e, o lahilahy indese’areo etoagne reo, le tsy namaky i tempoly rey ndra nanivetive i andrianagnaharentikagne rey. 38 Fa naho te hitory ndaty ty Demetrio naho o mpanao asa tagnagne miarake ama’e reo, le fa misy andro natokagne ho amy izay, le eo ka i governoram-paritsey. Agne ty toko’e hindesa iareo ze fitoria iareo zay. 39 Fa naho mbe mipay raha hafa ankoatse izay nareo, le amy i fivoriagne fanoentikagney ty tsy maintsy anapahagne izay. 40 Ty anto’e, tena hagnoho-doza antika ze o raha miseho androany zao, satria hatao mandrisike o ndatio higoreve tikagne, fa tsy raha managne anto’e marem-pototse hagnazavagne ty mahavy o ndatio mivorivory eto.” 41 Naho fa boake nirehake izay reke, le niravae’e i fivoriagney.