Asa o Apostolio
20 Naho fa nilamigne i korontagney, le nampandehane i Paoly mbama’e mbeo i mpianatse rey. Naho fa boake nampahery iareo sady nanao veloma iareo reke, le nandeha a Makedonia agne. 2 Nitsoehe’e ty faritse tagne sady nirehake raha soa maro reke mba hampahereza’e i mpianatse tagne rey. Tafara izay reke, le nandeha a Gresy agne. 3 Nijanogne tagne tagnate ty telo volagne reke. Faie naho fa ho nandeha sambo a Siria agne reke, le namorogne hevetse o Jiosio mba hamonoagne aze, hafarà’e reke nanapa-kevetse hiheregne a Makedonia agne. 4 Niarake ama’e ty Sopatera ana i Piro, i boake a Beria agney, i Aristarko naho i Sekondo, i boake a Tesalonika agne rey, i Gaio boake a Derbe agne, i Timoty, naho i Tikiko vaho i Trofimo boake amy ty faritse Azia agne. 5 Nandeha aloha’ay o lahilahy rehoe, le nandigne anay a Troasy agne. 6 Fa izahay nandeha sambo boake a Filipy agne, tafara i andro i Mofo Tsy Misy Lalivaỳ.* Ie zahay niafake dime andro vaho izay niavy tamy iareo ta Troasy agne, le nijanogne tagne fito andro.
7 Tamy i andro voaloha’e amy ty heregnandroy, le nivory zahay mba hiarake hihinagne. Nanomboke nanoro hevetse iareo ty Paoly satria handeha naho hamaray igne. Le nirehake tamy iareo reke hatrake amy i vakimira halegney. 8 Maro ty jiro nagnazava i efetse ambone etaze agne nivoria’aỳ. 9 Nisy ajaja lahilahy atao tihoe Eotika zay nitoboke tan-dafinete eo. Ginao ty roro reke tamy i Paoly mbe nirehakey, hafarà’e nigenoke ty roro, le nitonta boake amy i etaze faharoey ey. Ie naho fa nongahegne reke, le aheo tie fa mate. 10 Faie nizotso ty Paoly, le niantsampe ama’e ey sady namihigne aze, le nirehake tihoe: “Ko mikorakorake nareo fa velogne reke.” 11 Nanganike ambone agne ty Paoly naho fa niavy eo, le nanomboke nihinagne. Nirehake tamy iareo teo avao reke, hatrake mangararake atignanagne. Nandeha reke tafara izay. 12 Nindese i ndaty rey areke i ajaja lahilahỳ amy ie fa velogney sady tena nifale* iareo.
13 Nandeha sambo ta Aso agne aloha zahay, satria agne ty nieretsereta’ay hampijognagne i Paoly. Nampanoe’e izay zahay satria reke te handeha tomboke. 14 Naho fa nitra’e ta Aso agne zahay, le nampijogne’ay agnate sambo ao reke, le nandeha a Mitilena agne zahay. 15 Nandeha sambo boake ao zahay naho fa nihamaray igne, le niavy ta Kio eo. Faie, ie zahay nihamaray igne, le nijanogne kedekede ta Samo ao. Ie ka nihamaray igne, le niavy ta Mileto agne. 16 Nanapa-kevetse ty Paoly fa horiognagne avao ty Efesosy, amy izay reke tsy lany fotoagne amy ty faritse Azia agne. Ty anto’e, te ho avy malaky a Jerosalema agne reke mba hagnatratse i Fete i Pantekostaỳ naho tra’e.
17 Faie ndra tie teo zay, le nampinday hafatse hoahy o androanavy tamy ty fiangonagne ta Efesosy agneo reke tamy iareo ta Mileto agney mba ho avy tama’e teo. 18 Naho fa niavy tama’e eo iareo, le hoe reke tamy iareo: “Hai’areo soa tie nanao akore ty fomba fiaignako nanomboke tamy i andro voaloha’e niaviako tamy ty faritse Azia toỳ. 19 Tena niambane raho naho fa nanompo i Tompo. Nitagny naho nahatsiaro ho nijale ka raho noho ty raha natao o Jiosio mba hamonoagne ahy. 20 Ndra tie teo zay, le tsy nitofa raho fa nirehafeko tama’areo avao ze raha hahasoa anareo. Nanao izay raho naho fa nampianatse anareo tagnatreha o ndaty marò eo, ndra naho fa nitory isan-tragno. 21 Faie nitory tamy ty fomba feno tamo o Jiosio naho o Grikeo miomba ty fibebahagne aman’Agnahare naho ty finoagne i Jesosy Tompo raho. 22 Amy izao raho, le nitarihe i fagnahy masigney handeha a Jerosalema agne, ndra tie tsy fantako aza tie ino ty raha hanjò ahy agne. 23 Fa ty raha aherenkere i fagnahy masigney amako, le tihoe, isake tanàgne, le misy hagadragne naho haoreagne mandigne ahy. Izay avao ro fantako. 24 Faie tsy ty fiaiko ro raha lahibey amako, fa ty hamita i korsa laikoy naho i fanompoagne nankine i Jesosy Tompo tamakoy. Tsy inogne zay fa ty hitory amy ty fomba feno i talily soa miomba i hasoa fagnahy miambake nasehon’Agnaharey.
25 “Haiko fa tsy hahatrea ahy* sasa inareo nitoriako i Fanjakagneio. 26 Inareo areke ty vavolombelogne androany, fa afake amy ty lio ty ndaty iaby raho. 27 Ty anto’e, tsy nisalasala raho ty nirehake ama’areo ty zoton’arofon’Agnahare iaby. 28 Ambeno’areo soa ty vata’areo sady karakarao’areo soa manahake ty atao o mpiarakeo, o agnondrio iaby ndra o fiangonan’Andrianagnahare nivilie’e tamy ty lio i Ana’eio, satria inareo ty nitendre’e mba hiandraikitse aze. 29 Haiko fa naho fa mandeha raho, le hisy amboahako masiake ty hizilike ama’areo eo sady tsy hiferenaigne o agnondrio iareo. 30 Ho boake ama’areo eo ka ty hiboaha i ndaty magnolakolake rehake rey mba hitaonagne o mpianatseo hagnorike iareo.
31 “Miambena lognandro areke sady tadidio’areo ka fa le nipo-dranomaso raho tie nagnanatse anareo tsikiraidraike tagnate ty telo taogne, ndra handro ndra halegne. 32 Lonike ty Andrianagnahare naho i saontsy miomba ty hasoa fagnahy miambakey hiaro anareo. Hampahery anareo o saontsy iohoe sady hagnampe anareo hahazo i lova hoahy ty ndaty masigney. 33 Tsy nagniry volafotsy ndra volamena ndra akanjo raho. 34 Hai’areo soa fa ty tagnako retoa ty nampiasaeko mba hahazoako ze raha paliaeko naho o niarake amako reo. 35 Tamy ze kila raha, le natoroko anareo tamy ty raha nataoko fa tsy maintsy magnampe ze maleme* nareo. Tadidio’areo avao ka i reha i Jesosy Tompo manao tihoey tie: ‘Ty magnomey ro tena mahasambatse ambone ty mandrambe.’”
36 Naho fa boake nirehake o raha rehoe reke, le niarake nitongaleke tamy iareo mba hivavake. 37 Nitagny iaby iareo, le namihigne i Paoly sady nagnoroke aze taman-katea, 38 satria tena nalahelo iareo tamy i reha’e tihoey tie, tsy hahatrea aze sasa iareo. Natere iareo hatrake amy i samboy ey reke tafara izay.