Asa o Apostolio
22 “O ry rahalahiko naho inareo rae aman-drene, tsanogno’areo raho fa hirehake ty fiarovan-tegnako.” 2 Naho fa naharey aze nirehake tamy ty firehake hebreo iareo, le vao mainke nitsigne iaby. Le hoe reke: 3 “Jiosy raho sady naterake ta Tarsosy a Kilikia agne, faie nianatse tamy ty tanàgne toy eto tan-tombo i Gamaliela eo. Nampianaregne mba hagnorike soa i Lalàna norihe ty razantikagney ka raho sady nafana fo tamy ty fanompoagne an’Agnahare manahake o atao’areo zao. 4 Nenjeheko ze nagnorike i Lalagney, sady nataoko ze hahafate iareo. Rinohiko naho natoloko mba hogadraegne iareo ndra lahilahy ndra ampela. 5 Vavolombelo izay o mpisorombeio naho o androanavio iaby. Nahazo taratasy boake amy iareo raho mba hoentegne tamo o rahalahy ta Damaskosy agneo sady fa tan-dalagne ho agne raho mba hinday ze agnisa o Lalagne iohoe mirohy a Jerosalema agne mba hosazeagne.
6 “Faie tamy iraho tan-dalagne ey sady fa narine i Damaskosỳ, le nisy hazavagne tampoke ty boake an-dagnitse agne namilepiletse nagnodidigne ahy. Dizera mena i androy tamy izay. 7 Le nitonta an-tane eo raho sady naharey feo nirehake tamako tihoe: ‘O Saoly, Saoly, nagnino rehe ro magnenjeke ahy?’ 8 Le namale raho tie: ‘Ia ireheo Ragnandria?’ Le hoe reke: ‘Iraho o Jesosy te Nazareta enjehe’ò.’ 9 Nahatrea i hazavagney i lahilahy niarake tamako rey, faie tsy nirey iareo i feo mirehake amakoy. 10 Hoe raho tamy izay: ‘Ino ty toko’e hataoko Tompo?’ Le hoe ty Tompo tamako: ‘Mitsangana, le mandehana a Damaskosy ao fa agne ty hirehafako ama’o ze raha hampanoeko azo.’ 11 Faie nanjare tsy nahatrea ndra inogn’ino raho, satria namilepiletse loatse i hazavagney, hafarà’e nitana i lahilahy niarake tamako rey ty tagnako, le nitarihe iareo mba Damaskosy mbeo raho.
12 “Le nisy lahilahy atao Ananiasy zay niavy tamako tao. Natahotse an’Agnahare reke sady nagnorike i Lalànay. Nanagne laza soa tamy ty Jiosy nitoboke tagne iaby ka reke. 13 Naho fa niavy tamako tao reke, le nitsangagne tagnilako teo sady nirehake tie: ‘O Saoly rahalahiko, mahatreava indraike rehe!’ Niandra areke raho, le nahatrea aze. 14 Le hoe reke: ‘Nijobògne i Andrianagnahare ty razambeintikagney rehe mba hahafantara’o ty zoton’arofo’e naho hahatreava’o i maregney vaho hahareiza’o ty fiaragnana’e. 15 Ty anto’e, irehe ty ho vavolombelo’e hagnambara amy ty ndaty iaby i raha nitrea’o naho nirei’oy. 16 Ino areke mbe lignisa’ò? Mitsangana, le akia rehe hatao badisa, amy izay ho voasasa ty fahota’o noho irehe mitoka ty agnara i Jesosy.’
17 “Faie naho fa niheregne ta Jerosalema agne raho sady nivavake tamy i tempolỳ ao, le nahatrea fahitagne. 18 Nitreako tamy i fahitagney ao ty Tompo, le nirehake tamako tihoe: ‘Malakilaky, mialà ty a Jerosalema eto amy izao amy izao rehe, satria tsy raha hagneke ty fijoroa’o ho vavolombeloko iareo.’ 19 Le hoe raho: ‘O Tompo, fanta iareo soa anio fa nitsoeke sinagoga raho, le jinerako naho ginadrako ze nino azo. 20 Naho fa naté iareo ka ty lio i Stefana, i vavolombelo’oy, le nitsangagne teo raho nanohagne i raha natao iareoy sady niambegne ty akanjo i ndaty namono aze rey ivela’e.’ 21 Faie le mbe hoe avao reke tamako: ‘Mandehana, fa hiraheko amo o ndaty boake amy ty firenena hafa an-tane lavitse agne reo rehe.’”
22 Le nitsanogne aze avao hey iareo amparake ty nività ze reha’e zay. Ie naho fa niavy eo, le nikorakorake iareo tie: “Vonò agne o lahilahy iohoe, fa tsy fagneva ty ho velogne sasa!” 23 Le mbe nikorakorake avao iareo sady nanoratorake i akanjo iareo ivela’ey naho namitse lemboke magnambone, 24 hafarà i mpitari-tafikey nagnomey baiko mba hindesagne i Paoly hizilike amy i tobe maramilay ao. Nirehake ka reke tie toko’e hokaravasiegne ty Paoly naho fa fotopotoragne mba hahafantaragne soa ty anto’e mahavy i vahoakey mikorakorake i Paoly. 25 Faie naho fa ho nikaravasie iareo ty Paoly, le nirehake tamy i maramila manam-boninahitse nitsangagne teoy tie: “Azo’areo atao vao ty mijera ndaty romana* naho mbe tsy nivoaheloke* reke?” 26 Naho fa naharey izay i maramila manam-boninahitsey, le nandeha amy i mpitari-tafikey agne mba hirehake izay. Hoe reke: “Ino ty hatao’o fa kay i ndatỳ toe Romana?” 27 Nandeha mbamy i Paoly mbeo areke i mpitari-tafikey, le nirehake tama’e tie: “Romana zao rehe kahe?” Le hoe ty Paoly: “Eka.” 28 Le nirehake i mpitari-tafikey tie: “Volabey ty naloako vaho izay raho nahazo zom-pirenena Romana.” Hoe ty Paoly: “Fa iraho vaho naterake le fa nanagne izay.”
29 Teo naho eo avao, le avy le niala aze i ndaty ho nampijalejale aze naho fa mamotopototse azey. Natahotse ka i mpitari-tafikey naho fa nihai’e tie Romana ty Paoly, ie amy izao reke fa rinohi’e seny.
30 Ie nihamaray igne, le navotso’e ty Paoly. Navori’e o lahibey ty mpisorogneo naho o Fitsaragne Ambone Jiosio satria nitea’e hofantatse ty anto’e nahavy o Jiosio nanao kitomboke aze. Nindese’e nizotso tamy i toeragne nivoria iareoy agne ty Paoly naho fa niavy eo, le nampitsangane’e tagnivo iareo eo.