Asa o Apostolio
23 Nihentea i Paoly soa i ndaty agnisa ty Fitsaragne Ambone Jiosy rey, le hoe reke: “O ry rahalahy, vaniko ty mirehake agnatrehan’Agnahare eo fa tsy nanao raha raty raho hatrake androany, le malio ty feo ty fieretseretako.” 2 Le nagnomey baiko i ndaty nitsangagne tagnila i Paoly eo rey ty Ananiasy mpisorombey mba hitakapike ty vava i Paoly. 3 Le hoe ty Paoly tama’e: “Hasian’Agnahare ka rehe ty rindrigne nilokoagne foty tiagne. Sady mipetrake mba hitsara ahy arake i Lalànay vao rehe ro mandika i Lalànay, le magnomey baiko mba hijeragne ahy?” 4 Le hoe i ndaty nitsangagne tagnila’e teo rey: “Nagnino rehe ro manivetive o mpisorombein’Agnahareo?” 5 Le hoe ty Paoly: “O ry rahalahy, tsy fantako anio tie mpisorombey reke! Toe voasoratse vata’e tie: ‘Ko manivetive ty mpitondra amo o firene’ò eo.’”
6 Naho fa nihay i Paoly tie Sadoseo ty ila’e amy i ndaty agnisa ty Fitsaragne Ambone Jiosỳ rey, fa ty ila’e Fariseo, le nirehake mafe tagnatreha iareo eo reke tie: “O ry rahalahy, Fariseo raho sady ana ty Fariseo ka. Miomba ty fanantenagne ty famelomagne ty mate o itsaragne ahy etò.” 7 Nifandietse o Fariseò naho o Sadoseò noho ty firehafa’e ze raha zay, le nizara ho antoko’e roe i ndaty nivory teo rey. 8 Ty anto’e, o Sadoseò mirehake tie tsy misy ze o famelomagne ty mate zao naho o anjelio ndra o fagnahio. Fa o Fariseò magneke* o raha rehoe iaby. 9 Nikorakorake areke i ndaty teo rey, le ty ila’e amo o mpampianatse lalàna nanohagne o Fariseò rey nizizo mafe tie: “Tsy trea’ay ty hadisoa o lahilahy iohoe. Faie naho nisy anjely nirehake tama’e ...” 10 Vao mainke nifandietse iareo, hafarà i mpitari-tafikey natahotse tsy mone hifandririta iareo ty Paoly. Nagnomey baiko i maramila rey areke reke mba hizotso mbeo hangalake i Paoly agnivo i ndaty rey eo mba handesegne amy i tobe iareoy agne.
11 Faie tamy ty hale igne, le nitsangagne tagnila’e eo ty Tompo sady hoe reke: “Mahereza! Ty anto’e, manahake ty nitoria’o ty miomba ahy a Jerosalema eto ty tsy maintsy hitoria’o ty miomba ahy a Roma agne ka.”
12 Ie nihamaray igne, le niharo hevetse o Jiosio sady niozogne tie, tsy hihinagne vaho tsy hinogne ndra inogn’ino naho tsy mate iareo ty Paoly. 13 Mihoatse ty 40 lahy o Jiosy niharo hevetse naho nanao vava rehoe. 14 Nandeha tamo o lahibey ty mpisorogneo agne naho tamo o androanavio agne o lahilahy rehoe sady hoe iareo: “Fa nanao vava* zahay tie tsy hihinagne ndra inogn’ino naho tsy mate’ay ty Paoly. 15 Toko’e hirehake amy i mpitari-tafikey naho amy i Fitsaragne Ambone Jiosỳ areke nareo tie, toko’e hoentegne mizotso mbama’areo mbetoa ty Paoly. Sare anò’areo hoe izao tie, te hamotopototse aze soa nareo. Faie aloha ty hiavia’e atoy, le fa mivognogne zahay ty hamono aze.”
16 Faie naharey ze raha nikonokonohe iareo zay i ana-drahavave i Paolỳ, le nandeha tamy i tobe i maramila rey agne mba hirehake izay amy i Paoly. 17 Le nitokave i Paoly ze maramila manam-boninahitse raike zay sady hoe reke: “Ento amy i mpitari-tafikey agne ty ajalahy toy fa misy raha horehafe’e ama’e.” 18 Le tinary i maramila manam-boninahitsey mbamy i mpitari-tafikey mbeo i ajalahỳ sady hoe reke: “Misy gadra raike atao Paoly zay nangatake ahy mba hinday ty ajalahy toy mbama’o mbetoa, fa nao misy raha horehafe’e ama’o zao.” 19 Nente i mpitari-tafikey amy ty toeragne mitokagne i ajalahỳ, le nagnontenea’e tie: “Inogne ze o raha horehafe’o amako zao?” 20 Le hoe reke: “Nifagnarake o Jiosio fa hangatake azo mba hinday i Paoly hizotso mbamy i Fitsaragne Ambone Jiosỳ mbeo naho maray. Le sare hirehake ama’o iareo tie nao te hamotopototse aze soa zao. 21 Faie ao rehe tsy ho mete iareo resegne lahatse satria misy lahilahy 40 mahery ty mietake agne ho agne mba hamono aze. Fa niozogne ka iareo tie tsy hihinagne vaho tsy hinogne ndra inogn’ino naho tsy mate iareo reke. Fa vognogne iareo ty ao, fa ty alalagne boake ama’o avao ty sisa lignisa iareo.” 22 Nenga i mpitari-tafikey handeha i ajalahỳ naho fa boake nirehafe’e tie: “Ao rehe tsy hirehake ndra amy ia ndra amy ia tie nagnambara amako ze raha zay!”
23 Nisy maramila manam-boninahitse roe nampandehane’e mbama’e mbeo sady hoe reke: “Magnomana maramila 200 lahy naho mpitingitse sovala 70 vaho lahilahy mpitan-defogne 200 mba hiarake ama’areo a Kaisaria agne ty androany halegne amy ty lera fahatelo.* 24 Magnomana ka sovala hitingira i Paoly mba hiavia’e soa amy i governora Feliksa agne.” 25 Fagnampe izay, nanoratse taratasy reke, le izao ty sinora’e ao:
26 “Hoahy i Governora Feliksa hajaegne: Manalama azo raho Klodio Lisia! 27 Nitsepahe o Jiosio o lahilahy iohoe sady fa ho nivonoe iareo ka. Faie niavy malaky raho naho o maramilakò mba hagnavotse aze satria nireiko tie Romana reke. 28 Niteako hofantatse ka ty anto’e nahavy iareo nitsepake aze, le nenteko nizotso amy i Fitsaragne Ambone Jiosỳ agne reke. 29 Nitreako tie raha miomba i Lalàna iareoy o nitsepaha iareo azeo fa tsy tihoe noho ireke nanao raha raty, le fagneva ty hovonoegne ndra hogadraegne. 30 Faie nisy nirehake tamako tie mikonokonoke ty hamono aze iareo, le izay nahavy ahy le avy le nandefa aze ama’o atoio. Nirehafeko ka i ndaty nanao kitomboke aze rey mba hinday i fitoria iareoy agnatreha’o eo.”
31 Nente i maramila rey tamy i halegney avao areke ty Paoly, arake i baiko niazo iareoy, le nandeha a Antipatria agne iareo. 32 Ie nihamaray igne, le niheregne a tobe iareo agne i maramila rey fa i mpitingitse sovala rey avao ro niarake tamy i Paoly. 33 Niavy ta Kaisaria agne i mpitingitse sovala rey, le nimea iareo i governoray i taratasỳ sady natolo iareo aze ka ty Paoly. 34 Nivakie’e i taratasỳ, le nagnontenea’e tie boake aia ty Paoly. Le nirehake tama’e ty Paoly tie, boake a Kilikia agne reke. 35 Hoe i governoray: “Hotsanogneko soa ty raha horehafe’o naho fa avy i ndaty nirehake azo tie nanao raha ratỳ.” Nagnomey baiko reke tafara izay mba hiambenagne i Paoly an-dapa i Heroda ao.