Asa o Apostolio
24 Ie dime andro tafara izay, le nizotso mba Kaisaria mbeo ty Ananiasy mpisorombey naho ty androanavy ila’e vaho ze mpizaka agnatreha o ndaty maro* atao tihoe Tertilo zay. Nirehafe iareo tamy i governoray ty anto’e nitsepaha iareo i Paoly. 2 Naho fa nitokavegne reke, le izao hey ty raha rineha i Tertilo naho fa nanao kitomboke i Paoly:
“Misaotse azo fa milamigne soa zahay, satria mpitondra tena mahimbagne rehe, le izay o mampandroso ty firenena toio. 3 Fa amparake izay o ndatio Feliksa hajaegne ro magneke izay ndra aia ndra aia ty misy iareo, le tena misaotse azo. 4 Faie tsy hitagne azo ela raho aba fa mihalale ama’o mba haneho hasoa fagnahy ama’ay, le hijanjigne anay tsielatsiela avao. 5 Trea’ay o lahilahy iohoe tie mpagnakorontagne,* le mitarike ze Jiosy amy ty tane toy iaby reke mba higoreve amo o fanjakagneo. Ireke ka ty mitarike o sekta te Nazaretao. 6 Ankoatse izay, nanivetive i tempolỳ reke, le izay o nitsepaha’ay azeo. 7* —— 8 Naho fa mamotopototse aze soa rehe, le hohai’o soa fa tena maregne o raha rehafe’ay iaby zao.”
9 Nanao kitomboke aze ka o Jiosio sady nizizo mafe tie maregne iaby i raha nirehafegne teoy. 10 Naho fa nanao fihetseke tamy ty loha’e i governoray mba hampirehafagne i Paoly, le namale reke tie:
“Haiko soa fa tagnate ty taogne maro rehe ro mpitsara tamy ty firenena toy eto, le izay ty mahavy ahy ho vognogne hirehake ty fiarovan-tegnako ama’o. 11 Azo’o hamaregnegne ka fa mbe tsy mihoatse ty 12 andro zay ty nandehanako ta Jerosalema agne mba hivavake. 12 Tsy nitrea iareo nialy hevetse tama o ndaty tamy i tempolỳ ao raho ndra nitarike vahoake mba higoreve, ndra tamy i sinagogay ao zay ndra nagneneke i tanàgney. 13 Ndra iareo aza tsy managne porofo amo o raha anoa iareo kitomboke ahy zao. 14 Faie izao ty raha ekeko agnatreha’o eto. Mifagnarake amy i raha rehafe iareo tihoe tie sektay ty fomba anompoako i Andrianagnahare ty razambeikoy. Ty anto’e, inoako ze raha voasoratse amy i Lalànay ao naho ty raha nisorate o mpaminanio. 15 Mitama manahake iareo ka raho fa hovelomen’Andrianagnahare amy ty mate ty ndaty maregne naho ty tsy maregne. 16 Izay ty mahavy ahy mikezake mafe mba hanagne feo ty fieretseretagne malio* agnatrehan’Agnahare eo naho agnatreha o ndatio eo. 17 Tafara ze taogne maro nandehanako zay, le avy amy ty fireneko toy eto raho hinane zao mba hinday fagnomezagne hiferegnesagne o mahantrao naho hanao fagnatetse. 18 Tamy iraho nanao o raha rehoey o nitrea iareo tamy i tempolỳ aò. Faie fa nalio arake i Lalànay raho tamy izay sady tsy nisy ndaty maro niarake amako, le tsy nagnakorotagne ka raho. Nisy Jiosy boake amy ty faritse Azia agne 19 ty teo tamy izay, le iareo ro toko’e ho nitory ahy tama’o atoy naho toe nanao raha raty vata’e raho. 20 Ndra ka, aleo ty ndaty magnatreke eto retoa ro hirehake ty raha raty nataoko tamy iraho nitsaraegne tagnatreha i Fitsaragne Ambone Jiosỳ eoy. 21 Asa varagne ty raha raike nirehafeko tamy iraho nitsangagne tagnatreha iareo eo toy o raha raty atao iareo nanoekò: ‘Miomba ty famelomagne amy ty mate o raha itsaragne ahy agnatreha’o eto androanio!’”
22 Faie hay i Feliksa soa ty miomba o Lalagne iohoe, le nampolie’e iareo sady hoe reke: “Naho fa mizotso atoy ty Lisia mpitari-tafike vaho izay raho hanapa-kevetse miomba o raharaha rehoe.” 23 Nimea’e baiko ka i maramila manam-boninahitsey mba hiambegne i Paoly faie hienga aze hanao ty raha ila’e naho hienga i nama’e rey hikarakara aze.
24 Ie andro tsiampeampe tafara izay, le niavy ty Feliksa naho i Drosila vali’e. Jiosy o ampela iohoe. Nampangalae’e ty Paoly le nitsanogna’e reke naho fa nirehake miomba ty finoagne i Kristy Jesosy. 25 Faie natahotse ty Feliksa naho fa nirehake miomba ty hamaregnagne naho ty fifehezan-tegna vaho i fitsaragne hoavỳ ty Paoly, le hoe reke: “Akia hey rehe mandehana fa mbe hampangalaeko avao ka rehe amy ty magnarake naho fa manam-potoagne raho.” 26 Faie nitamà ka reke tie, hagnomey aze vola ty Paoly, le izay o nahavy aze nagnirake ndaty mba hangalake aze mateteke naho hifampirehake ama’eo. 27 Faie, ie roe taogne tafara izay, le i Porsio Festosy ty nandimbe i Feliksa. Nite hipay hasoa tamo o Jiosio ty Feliksa, le nenga’e tam-pirizò ao avao ty Paoly.