Asa o Apostolio

27 Tapake ty hevetse fa halefa sambo a Italia agne zahay. Natolo iareo ze maramila manam-boninahitse atao tihoe Jolio zay ty Paoly naho ze gadra hafa rezay. Boake amy ty goropy maramila atao tihoe Aogosto ty Jolio. 2 Sambo boake a Adramitena agne ty nijogna’ay. Fa handeha amy ty figaran-tsambo a moro ty faritse Azia agne o sambo iohoe. Le nandeha zahay sady niarake tama’ay ka ty Aristarko, i Makedoniana boake a Tesalonika agney. 3 Ie nihamaray igne, le niavy ta Sidona agne zahay. Nisoa fagnahy* tamy i Paoly ty Jolio, le nenga’e handeha amy i nama’e rey agne reke mba hokarakarae iareo.

4 Niala ty ao indraike zahay, le nandeha nagnorike ty moro i Sipra amy izay voaro amy i tiokey, satria nitohere i tiokey zahay. 5 Nandeha tagnivo i riakey ey zahay naho fa nandalo i Kilikia naho i Pamiflia, le niavy tamy ty figaran-tsambo i Mira a Likia agne. 6 Nahatrea sambo boake a Aleksandria agne i maramila manam-boninahitsey tie tao. Handeha a Italia agne o sambo iohoe, le nampandehane’e tama’e zahay. 7 Nandeha moramora avao i samboy tagnate ty andro maro. Nisahiragne ka zahay vaho izay niavy ta Kinido agne. Nitohere i tiokey zahay, hafarà’ay nandalo tandrife i Salmona mba hiaro anay amy i tiokey, le avy eo nagnorike ty moro i Kreta. 8 Ndra tie nagnorike ty moro i Kreta aza zahay, le mbe nisahiragne avao noho i tiokey. Faie le mbe nitoly tamy ze toeragne raike atao tihoe Figaran-tsambo Fanjaka zay eo avao zahay. Marine ty tanà i Lasea ty misy o figaran-tsambo iohoe.

9 Nitara zahay tie niala tao sady tena nagnoho-doza ka ty nandeha sambo satria ndra i andro fifalian-kanegne amy i Andro Fandrongonam-pahotagney aza fa tapetse. Izao areke ty torohevetse nimea i Paoly 10 iareo: “O lahireo, ho voa mafe tika naho mbe manohy ty liantikagne toy avao! Sady tsy ty entantika naho ty sambo toy avao ro ho simba fa ndra ty aintika* ka aza hafoentikagne.” 11 Faie tsy nitsanogna i maramila manam-boninahitsey ze reha i Paoly zay fa ndra ty reha i soaferan-tsamboy naho i tompo i samboy ro nitsanogna’e. 12 Satria tsy le soa ijanognagne o figaran-tsambo iohoe naho fa asotry, le nanoro hevetse ty ankamaroa i ndaty rey tie, aleo miala ao kera mba ho avy a Foiniksa agne avao, le agne ro hijanogne amparake ty itampera i asotrỳ. Figaran-tsambo a Kreta agne o figaran-tsambo iohoe. Naho fa hijanogne ao o sambò, le mizilike boake avaratse atignanagne ndra atimo atignanagne.

13 Naho fa nisy tioke moramora ty boake atimo agne, le nieretseretse iareo tie nitra iareo i tanjo iareoy. Nakare iareo boake agnate rano ao i vatofantsikey, le nandeha nagnorike ty moro i Kreta avao iareo. 14 Ie tsy ela tafara izay, le nisy tiobey tampoke, i Eorakilona* ty agnara’e. 15 Finao i tiobeỳ i samboy, le tsy nivita’ay ty nivey aze, hafarà’e nenga’ay amy ze tea i tiokey hindesagne aze. 16 Nandeha nagnorike ty moro ze tokonose kedekede atao tihoe Koda zay zahay mba tsy ho azo i tiokey. Faie ndra tie teo zay, le fa tsy ho nivita’ay ndra ty ho nangalake i lakan’aigne* tamy ty voly samboy agney. 17 Faie naho fa nitafilitse tamy i samboy ao i lakan’aigney, le finehe iareo taly ty vata i samboy mba hagnamafesagne aze satria natahotse iareo kera hidosy ty faseke amy ty moro i Sirtisy sady lelia’e hipake eo. Najotso iareo areke i laỳ, le nente i tiokey moramora iareo. 18 Faie le mbe naviovio i tiobeỳ avao zahay, hafarà’e natao’ay ze hampaivagne i samboy naho fa nihamaray igne. 19 Ie nihamaray igne ka, le ty vatategna iareo ty nagnary i entagne rey tan-driake ey.

20 Fa tagnate ty andro maro i masoandroy naho o vasiagneo ro tsy niboake sady nimafe* i tiobey nandemoke anaỳ, hafarà’ay fa tsy nitama ty hoavotse sasa. 21 Fa ela ka iareo ro tsy nihinagne, le nitsangagne tagnivo iareo eo ty Paoly sady nirehake tie: “O lahireo, naho norihe’areo i torohevekoy sady tsy niala ta Kreta agne tikagne, le tsy ho nanjò antikagne ty raha hoe izao sady tsy ho nisy raha nafoe. 22 Faie mandrisike anareo raho mba tsy ho kivy,* satria tsy hisy hamoe ty ai’areo nareo fa i samboy avao ro hafoe. 23 Ty anto’e, nisy anjely i Andrianagnaharekoy sady anoako fanompoagne masigney nitsangagne tagnilako eo taniankale. 24 Izao ty nirehafe’e: ‘Ko matahotse rehe Paoly fa tsy maintsy hitsangagne agnatreha i Kaisara eo. Harovan’Agnahare ka rehe naho o ndaty iaby mandeha sambo miarake ama’o reo.’ 25 Managna herim-po areke nareo lahireo! Mino raho fa hotanterahen’Agnahare i raha nirehafeko tama’areo teoy. 26 Faie ndra tie eo zay, le tsy maintsy hidofotse amy ze tokonose raike zay ty sambontikagne toy.”

27 Tamy ty halegne faha-14 tafara ty nisia i tiobeỳ, le mbe naviovio i tiobey tamy ty ria i Adria ey avao zahay. Ie naho fa nivakimira halegne, le nihaihay i mpiasan-tsambo rey tie fa nagnarine tane iareo. 28 Nirefese iareo ty halale i riakey, le nitrea iareo tie 36 metatse eo ho eo. Le niroso aloha kedekede iareo. Nirefese iareo indraike ty halale i riakey, le nitrea iareo tie 27 metatse eo ho eo. 29 Natahotse iareo kera hidosy amy ty vato a moro’e ey zahay, hafarà iareo nandatsake vatofantsike efatse tamy i voly samboy agne. Fa tsy niligne’ay ty hiavia ty maraindraigne. 30 Faie nite hilay boake amy i samboy ao i mpiasan-tsambo rey, hafarà iareo nanao sare nanjotso vatofantsike tan-doha i samboy agne, ie amy izao iareo nanjotso i lakan’aigney. 31 Hoe ty Paoly tamy i maramila manam-boninahitsey naho i maramila’e rey: “Naho tsy mijanogne agnate sambo ato o lahilahy rehoe, le tsy hoavotse nareo.” 32 Tinapa i maramila rey areke i taly mitagne i lakan’aigneỳ, le nenga iareo hipoke agne i lakan’aigney.

33 Ie naho fa nangararake atignanagne i androy, le nirisihe i Paoly i ndaty rey mba hihinagne. Hoe reke: “Fa 14 andro androany zay ty ninekonekoa’areo avao naho ty tsy nihinana’areo ndra inogn’ino. 34 Mandrisike anareo areke raho mba hihinagne, satria hahasoa anareo zay. Tsy hisy hiombotse ndra ty raike amy ty volo’areo aza.” 35 Nangalake mofo reke naho fa boake nirehake izay. Nisaotse an’Agnahare tagnatreha iareo eo reke naho fa niavy eo, le nitapahe’e i mofoy sady nanomboke nihinagne reke. 36 Tsy nikivy sasa areke iareo, le nihinagne ka. 37 Ni-276 ty isa’ay iaby tagnate i samboy ao. 38 Naho fa nivontsy* iareo, le naria iareo an-driake agne i varembazaha nente iareoy mba hampaivagne i samboy.

39 Ie nimaraindray i androy, le nahatalake tane iareo faie tsy nihay iareo tie aia o tane iohoe. Nahatalake toeragne misy faseke tamy i moro’ey ey iareo, le nanapa-kevetse tie hanao ze azo iareo atao mba hahatoly i samboy ey. 40 Tinapa iareo areke i vatofantsike rey, le nenga iareo hopoke an-driake agne. Nitapahe iareo ka i taly nameheagne i fiveỳ rey. Naho fa nivelare iareo ka i lay alohaoy, le nitiofe i tiokey mbamy i fasekey mbeo iareo. 41 Faie nidosy i faseke mivory tamy i moro’ey eoy i samboy, hafarà’e le avy le nijanogne. Nisitrike tamy i faseke ao ty loha i samboy, le ty voli’e rinavarava i onjay. 42 Le nitea i maramila rey hovinono i gadra rey, amy izay tsy afake milagno mba hilaisa iareo. 43 Faie i maramila manam-boninahitsey fa nitapa-kevetse ty hiaro i Paoly, hafarà’e nisakana’e i maramila’e rey mba tsy hanao ze raha eretserete iareo zay. Nampilagnoe’e aza ze mahay milagno, amy izay avy aloha a moro’e ey. 44 Ty ila’e nagnorike tafara, le nitingitse tamy ty hatae pisake ndra tamy ty raha hafa tamy i samboy ao. Le nitoly soa ta moro’e ey iareo iaby.