Asa o Apostolio

3 Nionjogne mbamy i tempolỳ mbeo ty Petera naho i Jaona tie indraike zay, tamy i fotoagne fivavahagne tamy i lera fahasivey.* 2 Nisy lahilahy raike naleme tomboke boake an-troke agne zay nente o ndatio tamy i vavahady i tempolỳ eo. Isan’andro reke, le natao iareo marine i vavahady i tempolỳ eo, i tokavegne tihoe Vavahady Fanjakay, amy izay afake mangatake amy ze ndaty hizilike amy i tempolỳ ao. 3 Naho fa nahatrea i Petera naho i Jaona hizilike amy i tempolỳ ao reke, le nangatake tamy iareo. 4 Faie nagnente aze ty Petera naho i Jaona sady nirehake tihoe: “Henteo zahay.” 5 Le nagnente iareo soa reke satria nitamà tie hahazo raha boake amy iareo. 6 Faie hoe ty Petera: “Tsy managne volafotsy naho volamena raho fa ze anagnako ro homeako azo. Amy ty agnara i Jesosy Kristy te Nazareta, mitsangana rehe le mandehana!” 7 Nirambese i Petera ty tagna i lahilahỳ havana, le nampitsangane’e reke. Teo naho eo avao, le avy le natanjake i tombo’ey naho i pokopoko’ey, 8 le nitsamboagne reke sady nanomboke nandeha. Nizilike tamy i tempolỳ ao niarake tamy iareo roe lahy ka reke. Nandeha reke sady nitsamboatsamboagne naho nidera an’Agnahare. 9 Nitrea o ndatio iaby reke nandeha sady nidera an’Agnaharey. 10 Le nihay iareo tie i lahilahy mpangatake natobo o ndatio isan’andro tamy i vavahady i tempolỳ eoy, i atao tihoe Vavahady Fanjakay reke. Tena nigaga iareo sady tsy nampino iareo ka ty nahatrea aze nandeha.

11 Tamy i lahilahỳ nitagne ty tagna i Petera naho i Jaonay, le nivory mbamy iareo mbeo o ndatio iaby, tamy i lalagne misy tafo’e naore i Solomonay eo sady tena nigaga. 12 Naho fa nahatrea izay ty Petera, le hoe reke tamy i ndaty maroy: “O ry Israelita, nagnino nareo ie tena daban-drahao? Nagnino nareo ie mandineke soa anay io? Ndra kitra’e ka ty heri’ay manokagne ndra noho ty fahafoezan-tegna’ay ho an’Agnahare ty nampandeha o lahilahy iohoe. 13 I Andrianagnahare i Abrahama naho i Isaka vaho i Jakobay, i Andrianagnahare ty razambeintikagney, le nagnomey voninahitse i Mpanompo’ey ndra i Jesosy. Natolo’areo mba hovonoegne reke sady niliere’areo tagnatreha i Pilato eo, ie amy izao reke fa nanapa-kevetse ty hamotsotse aze. 14 Ie, niliere’areo i ndaty masigne naho maregne ignehoe fa i mpamono ndatỳ ro nangatahe’areo hovotsoragne mba homeagne anareo. 15 Vinono’areo i Mpitarike Fara’e Lahibey magnomey havelogney, faie nivelomen’Agnahare tamy ty mate reke, le vavolombelo izay zahay retoa. 16 Le amy ty agnara’e ka naho ty finoa’ay ty agnara’e ty nahasitragne o lahilahy trea’areo naho hai’areo iohoe. Ty finoa’ay aze ty nahasitragne tanterake o lahilahy agnatreha’areo eo iohoe. 17 Faie haiko ry rahalahy, fa noho ty tsy fahafantara’areo naho ty tsy fahafantara i mpitondra ama’areo eo rey ty nahavy anareo nanao igne. 18 Nengan’Andrianagnahare hiseho ze raha rezay, amy izay tanterake ty raha nampirehafe’e o mpaminanio iaby, le tihoe hijale ty Kristy.

19 “Mibebaha areke, le miheregna aman’Agnahare, amy izay ho voafafa ty fahota’areo, soa tie hisy fotoagne mamelombelogne boake amy i Jehovah, 20 sady hirahe’e ty Kristy, i tinendre’e ho anareoy ndra i Jesosy. 21 Nisaontsy tamy ty alala o mpaminani’e talohao ty Andrianagnahare tie, ho avy ty fotoagne hagneregnagne amy ty toe’e ze kila raha. Faie amparake ty hiavia izay, le tsy maintsy mandigne an-dagnitse agne hey reke. 22 Naho ty maregne aza, le izao ty raha nirehafe i Mosesy: ‘Hanendre mpaminany manahake ahy ho anareo boake amo o rahalahi’areo eo ty Jehovah Andrianagnahare’areo. Tsy maintsy tsanogna’areo areke ze raha rehafe’e ama’areo. 23 Ze tsy mitsanogne o mpaminany iohoe, le hovonovonoegne tsy ho amo o ndatio eo.’ 24 Ze mpaminany iaby, nanomboke tamy i Samoela naho ze nandimbe aze, le nirehake miomba ze o andro zao. 25 Nirehake miomba i fifagnekeagne nataon’Andrianagnahare tamy ty razambei’areoy o mpaminany rehoe. Tafilitse amy i fifagnekeagne ignehoe ka nareo, satria nampitamà i Abrahama ty Andrianagnahare tie: ‘Hahazo fitahiagne boake amy ty tarana’o ty firenena iaby ambone tane etoy.’ 26 Naho fa nivelomen’Agnahare tamy ty mate i Mpanompo’ey, le tama’areo agne heike ty nagniraha’e aze voaloha’e, mba hagnampeagne anareo hiala amy ty raha raty natao’areo.”