Asa o Apostolio
28 Naho fa nitoly soa ta moro’ey zahay vaho izay nahafantatse tie i Malta ty agnara o tokonose iohoe. 2 Hafa ty fireha* ty ndaty tamo o tane iohoe ao sady tena nisoa fagnahy* tama’ay iareo. Namelogne afo naho nandrambe anay soa iareo, satria niavy i oragney sady i androy ka tena nanintsigne. 3 Faie naho fa namory hatae sady nampipoke i hatae rey tamy i afoy eo ty Paoly, le nisy meregne misy poizigne niakatse ty boake amy i hataey naho fa nitra i hafanagney sady lelia’e nipiteke tamy i tagna i Paolỳ ey. 4 Naho fa nahatrea i meregne misy poizigney niraviravy tan-tagna i Paoly ey i ndaty tompon-tane rey, le nifampirehake iareo tie: “Tena mpamono ndaty vata’e ty lahilahy tiagne kanao ndra tie fa nitoly soa a moron-driake etoy aza reke, le mbe tsy nenga i Rare’e* ho velogne avao.” 5 Faie nahify i Paoly agnate afo ao i meregney sady tsy nagnahy avao ka reke. 6 I ndaty rey amy izao fa nandindigne avao tie, hivonto i tagna’ey ndra hidaraboke reke, le homate. Naho fa nandeha ty fotoagne, le nitrea iareo tie, tsy nagnahy avao reke. Hafarà iareo niova hevetse, le nirehake tie, andrianagnahare ty Paoly.
7 Nanagne tane maromaro narine i toeragne nisy iareoy ty lahibey o tokonose iohoe. I Poplio ty agnara’e. Nandrambe anay soa reke, le nampitobohe’e tama’e agne zahay tagnate ty telo andro. 8 Tam-pandreagne eo avao ty baba i Poplio tamy izay satria niazo ty tazogne naho nivalan-dio. Nizilike tamy i rangahey ao ty Paoly, le nivavake naho nametra-tagnagne ama’e sady nagnasitragne aze. 9 Tafara izay, le nisy marare hafa boake amo o tokonose iohoe eo ka, nandeha mbamy i Paoly mbeo le nisitragne’e. 10 Nagnomey raha maro anay iareo mba ho fisaora iareo* anay. Ie naho fa ho nandeha i sambo nandehana’aỳ, le nampidire iareo agnate sambo ao ze raha nipaliae’ay.
11 Telo volagne tafara ty nijanogna’ay tagne, le nandeha tamy ze sambo boake a Aleksandria agne zay zahay. Nisy soratse hoe izao ty tamy ty loha i samboy ey: “Ana-dahy i Zeosy.” Nijanogne tamo o tokonose iohoe ao o sambo iohoe tagnate i asotrỳ. 12 Niavy tamy ty figaran-tsambo i Sirakosa agne zahay, le nijanogne tagne tagnate ty telo andro. 13 Naho fa niala ty ao zahay, le niavy ta Regioma agne. Faie nisy tioke boake atimo naho fa nihamaray igne, hafarà’ay niavy ta Potioly agne tamy ty herone igne avao. 14 Nahatrea rahalahy zahay naho fa tagne, le nihalale tama’ay iareo mba hijanogne agne agnate ty fito andro. Nandeha a Roma agne zahay tafara izay. 15 Naho fa nirey ty rahalahy tagne tie ho avy zahay, le nisalakae iareo ta Bezara i Apio agne naho ta Tragnonambahiny Telo agne. Lavitse o toeragne rehoe ty misy i rahalahy rey. Naho fa nahatrea iareo ty Paoly, le nisaotse an’Agnahare sady nahazo hery. 16 Niavy ta Roma agne avao zahay tamy ty fara’e. Nengagne hanagne tragno mitokagne ty Paoly, le nisy maramila niambegne aze.
17 Faie, ie telo andro tafara izay, le nampangalae i Paoly ze lohandoha’e tamo o Jiosio eo. Naho fa nivory eo iaby iareo, le hoe ty Paoly tamy iareo: “O ry rahalahy, gadra boake a Jerosalema agne raho sady natolotse tan-tagna o Romanao. Ie amy izao raho tsy nanao raha raty ndra nanao raha mifanohetse amy ty fombafomba ty razambeintikagne. 18 Naho fa boake nifotopotore iareo soa raho, le nitea iareo ho nivotsoragne, satria tsy misy anto’e toko’e hamonoagne ahy. 19 Nampiakatse ty raharaha toy tamy i Kaisara raho, satria tsy nimete o Jiosio, fa tsy tihoe noho iraho malaigne o firenentikagneo. 20 Izay ty nahavy ahy nangatake hifagnatreke ama’areo naho hifampirehake ama’areo. Ty anto’e, noho ty raha tamae o Israelio ty mahavy ahy mirohy ty seny toy hoe izao.” 21 Le hoe iareo tama’e: “Tsy nahazo taratasy boake a Jodia agne mirehake ty miomba azo zahay. Tsy misy rahalahy boake agne ka nitalily ty miomba azo ndra nirehake raha raty miomba azo. 22 Faie tea’ay ty haharey ty heve’o, satria o sekta iohoe, le haratie o ndatio mbaombao.”
23 Nifamotoagne tamy i Paoly areke iareo, le vao mainke maro ty niavy tamy i tragno nahofa’ey ao. Nihazavae’e soa tamy iareo ty miomba i Fanjakàn’Andrianagnaharey nanomboke maraindray hatrake hariva. Niresé’e lahatse miomba i Jesosy ka iareo, le ty Lalà i Mosesy naho ty raha nisorate o mpaminanio ty nampiasae’e. 24 Nino ty raha nirehafe’e ty ila’e amy iareo fa ty ila’e tsy nino. 25 Tsy nitovy hevetse areke iareo, le nanomboke niala tsikedetsikede. Faie nirehake ty Paoly tie:
“Maregne vata’e ty raha nirehafe i fagnahy masigney tamy ty alala i Isaia mpaminany tamy ty razambei’areo toy 26 tie: ‘Mandehana amy ty vahoake toy agne, le rehafo tie: “Haharey nareo faie tsy hoazo’areo ty dika o raha rei’areò. Hahatrea ka nareo faie tsy hofanta’areo ty dika o raha trea’areò. 27 Ty anto’e, nanjare mafe fo ty vahoake toy, le fa naharey ka ty sofy iareo, faie tsy nitaitse iareo, sady akipe iareo ty maso’e, amy izay iareo tsy mahatrea. Tsy mahazo ty raha rei’e ka ty fo iareo, hafarà’e iareo tsy miheregne mba hagnasitragnako iareo.”’ 28 Soa hofanta’areo areke fa hambara amo o ndaty boake amy ty firenena hafao agne ze fagnavotagne boake aman’Agnahare zay. Azo antoke fa hitsanogne izay iareo.” 29 ——
30 Nijanogne tamy i tragno nahofa’ey ao tagnate ty roe taogne ty Paoly. Nirambese’e soa ze ndaty niavy tama’e tao. 31 Nitory tamy iareo ty miomba i Fanjakàn’Andrianagnaharey reke sady nampianatse iareo ty miomba i Jesosy Kristy Tompo. Tena tsy natahotse reke naho fa nanao izay sady tsy nisy nanakatsakagne aze.