Asa o Apostolio
4 Tamy iareo roe mbe nifampirehake tamy i ndaty maroỳ, le nimbamy iareo mbeo o mpisorogneo naho ty lahibey ty mpiambegne i tempolỳ rey vaho o Sadoseò. 2 Nilagigne iareo satria nampianatse o ndatio i apostoly rey sady nagnambara tamy iareo tie, nivelomegne tamy ty mate ty Jesosy.* 3 Nitsepahe iareo areke iareo roe lahy, le natao iareo am-pirizò ao amparake ty niavia ty maraindray, satria fa nihariva i androy. 4 Faie maro tamy i ndaty nitsanogne i raha nirehafe iareoy teo rey ro nino, le nanjare 5 000 eo ho eo ty isa ty lahilahy.
5 Ie nihamaray igne, le nivory ta Jerosalema ao o mpitondrao, o androanavio, o mpampianatse lalànao, 6 i Anasy lahibey ty mpisorogne naho ze longo’e, i Kaiafa, i Jaona vaho i Alexandra. 7 Nampitsangane iareo agnivo iareo eo ty Petera naho i Jaona, le nagnontenea iareo tie: “Fahefagne boake aia, ndra amy ty agnara ia ty nanoa’areo o raha iohoe?” 8 Nifeno fagnahy masigne ty Petera, le nirehake tamy iareo tie:
“O ry mpitondra naho ry androanavy, 9 naho fotopotoragne zahay ty androany miomba ty nahasitragne o lahilahy naleme tomboke iohoe naho tihoe ia ty nagnasitragne aze, 10 le soa hohai’areo naho ty ndaty iaby a Israely eto, fa tamy ty agnara i Jesosy Kristy te Nazareta, i nivonoe’areo tamy ty boda-katae faie nivelomen’Agnahare tamy ty matey ty nahasitragne aze. Tamy ty alala’e* ty nahasitragne o lahilahy mitsangagne aloha’areo eo iohoe. 11 Ireke ‘i vato niheje o mpamboatse tragnò faie nanjare vato fara’e lahibey* amy i tragnoỳ.’ 12 Ankoatse izay, le tsy hisy ndaty hafa hinday famonjeagne ankoatse aze, satria tsy misy agnaragne hafa ambone tane etoy jinobon’Andrianagnahare mba hinday famonjeagne ho antikagne.”
13 Nigaga iareo naho fa nahatrea ty herim-po i Petera naho i Jaona, sady nihay iareo tie ndaty tsy nianatse naho ndaty tsotra iareo. Nihay iareo ka tie niarake tamy i Jesosy iareo roe lahy. 14 Naho fa nagnente i lahilahy nisitragne nitsangagne tamy iareo eoy ka iareo, le tsy nisy raha ho navale. 15 Nirehafe iareo areke iareo telo lahy mba hiakatse i tragno nivoria iareoy, le nifampidineke iareo naho fa niavy eo. 16 Hoe iareo: “Ino ty toko’e hataontika amy i lahilahy rey? Ty anto’e, tena miambake i famantaragne natao iareoy sady tsisy tsy hahay izay ty ndaty a Jerosalema eto, le itika ka tsy afake mandietse izay. 17 Faie mba tsy hampiparitake ze raha zay amo o ndatio, le andao hohorohoroentika iareo sady horarantika mba tsy hirehake ndra amy ia ndra amy ia amy ze agnaragne zay.”
18 Nitokave iareo areke iareo roe lahy naho fa niavy eo, le rinara iareo mba tsy hirehake ndra inogn’ino ndra hampianatse amy ty agnara i Jesosy. 19 Faie hoe ty navale i Petera naho i Jaona iareo: “Naho inareo mieretseretse tie ty mitsanogne anareo ro tena mete ta tie mitsanogne i Andrianagnahare maregney, le anareo zay. 20 Fa izahay, le tsy mete ama’ay ty tsy hirehake miomba ty raha nitrea’ay naho nirei’ay.” 21 Naho fa boake nihorohoroe iareo indraike iareo roe lahy, le nivotsora iareo satria tsy nahatrea raha hagnasazeagne iareo roe lahy iareo. Natahotse i ndaty maroy ka iareo satria nagnomey voninahitse an’Agnahare i ndaty maroy noho i raha nisehoy. 22 Fa 40 taogne mahery i lahilahy nisitragnegne tamy ty fomba mahagagay.
23 Nandeha tamy i mpiharo finoagne amy iareo rey agne iareo roe lahy naho fa nivotsoragne sady nitalily tamy iareo ty raha nirehafe o lahibey ty mpisorogneo naho o androanavio. 24 Naho fa naharey izay iareo, le niarake nivavake mafe taman’Andrianagnahare tihoe:
“O Tompo Fara Tampo’e, irehe ty namboatse i lagnitsey naho ty tane toy naho i riakey vaho ze raha iaby amy iareo eo. 25 I fagnahi’o masigney ka ty nitarike i Davida mpanompo’o, i razambei’aỳ hirehake hoe izao: ‘Nagnino o firenenao ro mikorontagne, le nagnino o ndatio ro mieretseretse raha tsy misy dika’e? 26 Nitsangagne ty mpanjaka amy ty tane toy, le ty mpitondra ama’e eo nivory mba hanohetse i Jehovah naho i voahosotse tinendre’ey.’ 27 Toe izay vata’e ty raha niseho satria nivory amy ty tanàgne toy eto ty Heroda, i Pontio Pilato vaho ty ndaty boake amy ty firenena hafa naho o Israelitao mba hanohetse i Jesosy, i mpanompo’o masigne tinendre’oy. 28 Nivory iareo, amy izay tanterake i raha fa nisaontsie’o mialohay satria managne hery hanoagne izay rehe sady toe izay ka ty zoton’arofo’o. 29 Faie amy izao Jehovah, le janjigno ty fagnorohoroa iareo sady ampeo zahay mpanompo’o mba ho sahy hirehake ty saontsi’o. 30 Ampahitsio ka i fità’oy mba hagnasitragnagne naho hanoagne raha mahagaga vaho famantaragne amy ty agnara i Jesosy, i mpanompo’o masigney.”
31 Naho fa boake nivavake mafe taman’Agnahare iareo, le nihezegnezegne i toeragne nivoria iareoy sady nifeno fagnahy masigne iareo iaby, le nahavany nirehake ty saontsin’Andrianagnahare.
32 Ankoatse izay, le niharo saigne naho niharo fo i ndaty maro nanjare mpino rey, le tsy nisy tamy iareo nirehake tie aze raike avao ty fanagna’e satria niharoa iareo ze raha iaby nanagna iareo. 33 I apostoly rey ka nagnomey porofo naharese lahatse miomba ty namelomagne i Jesosy Tompo tamy ty mate sady nanehoan’Andrianagnahare hasoa fagnahy miambake ka iareo iaby. 34 Tsy nisy nisahiragne ara-pivelomagne iareo satria ze nanagne tane naho tragno, le nivarotse izay, le ninday ty vili’e tamo o apostolio agne. 35 Natao iareo tan-tombo o apostolio eo i vola rey. Zinara tamy iareo tsikiraidraike arakarake ze nipaliae iareo i volay. 36 Nisy Levita raike naterake ta Sipra agne zay nanagne tane. I Josefa ty agnara’e. Tinoka o apostolio tihoe Barnabasy ka reke (“Ana ty Fampionognagne” ty dika o agnaragne iohoe). 37 Navaro’e i tane’ey, le nente’e amo o apostolio agne ty vili’e, le natao’e tan-tombo iareo eo.