Asa o Apostolio
1 I taratasy nisorateko ho azo voaloha’ey Teofilo, le mirehake miomba ty raha natao i Jesosy naho nampianare’e, 2 amparake ty niavia i andro nagnakaragne aze mban-dagnitse mbeoy. Taloha izay reke, le nagnomey toromareke i apostoly nijobogne’e rey tamy ty alala ty fagnahy masigne. 3 Tafara i nampijaleagne naho i namonoagne azey, le mateteke reke ro niseho tamy iareo mba hagnaporofoagne tie velogne. Nitrea iareo tagnate ty 40 andro reke sady nirehake miomba i Fanjakàn’Andrianagnaharey. 4 Tamy ireke nivory niarake tamy iareoy, le nihafatsafare’e iareo tie: “Ko miala a Jerosalema eto nareo, fa lignaso’areo avao i raha nampitamaen-dRaeko nirei’areo tamakoy. 5 I Jaona zao nanao badisa tamy ty rano, fa inareo hatao badisa amy ty fagnahy masigne, andro tsiampeampe afara izao.”
6 Naho fa nitafavory teo iaby iareo, le nagnontane aze tie: “O Tompo, izao vao ty fotoagne hagneregna’o i fanjakagney amo o Israelio eo?” 7 Le hoe reke tamy iareo: “Tsy anjara’areo ty mamantatse ze fotoagne zay ndra ze vanim-potoagne zay, fa i Rae raike avao ty managne fahefagne amy izay. 8 Faie hahazo hery nareo naho fa mahazo i fagnahy masigney, le ho vavolombeloko a Jerosalema agne, magneragne i Jodia naho i Samaria vaho amy ty faritse fara’e lavitse an-tane etoy. 9 Naho fa boake nirehake o raha rehoe reke, le nakaregne mban-dagnitse mbeo tamy iareo mbe nagnente azey. Nisy rahogne nanakogne aze, le tsy nitrea iareo sasa reke. 10 Tamy iareo mbe nagnente i lagnitsey tamy ireke nakaregne mban-dagnitse mbeoy, le nisy lahilahy roe nagnisy akanjo foty rezay nitsangagne tampoke tagnila iareo eo 11 sady nirehake tihoe: “O ty lahilahy te Galelia retoa, nagnino nareo ro mitsangagne eto magnente i lagnitsey? I Jesosy niarake tama’areo teo faie nakaregne mban-dagnitse mbeoy, le ho avy indraike manahake i fomba nahatreava’areo ty nandehana’e mban-dagnitse mbeoy.”
12 Niala boake amy i Vohitse Olivay eo iareo, le niheregne ta Jerosalema agne. Marine i Jerosalema ty misy o vohitse iohoe, satria lalagne sabata raike* avao ty elagnela iareo. 13 Naho fa niavy ta Jerosalema agne iareo, le nizilike amy i efetse ambone etaze agney, amy i tragno nitoboha iareoy. Intoa iaby iareo: I Petera, i Jaona, i Jakoba, i Andrea, i Filipo, i Tomasy, i Bartolomeo naho i Matio, i Jakoba ana i Alfeo, i Simeona mafana fo oy vaho i Jodasy ana i Jakoba. 14 Niharo saigne iareo sady nivavake mateteke. Niarake tamy iareo ka ty Maria rene i Jesosy naho i rahalahy i Jesosy rey vaho ze ampela hafa rezay.
15 Tagnate ze andro rezay, le nitsangagne tagnivo i rahalahy rey eo ty Petera (eo ho eo amy ty 120 ty isa ty ndaty nivory tao) sady nirehake tihoe: 16 “Ry rahalahy, tsy maintsy tanterake i faminaniagne nirehafe i Davida tamy ireke nitarihe ty fagnahy masigney. Nirehake miomba i Jodasy reke, i nitarike ndaty mba hitsepake i Jesosỳ. 17 Niarake tama’ay reke sady agnisa ty jinobogne mba handrambe anjara amy ty fanompoagne toy ka. 18 (Niviliana ze lahilahy zay tane i karama niazo’e tamy ty tsy hamaregnagney. Namono tegna reke, le ty loha’e ty nanjò amy i taney eo. Nipoake ka i vata’ey,* le niakatse iaby ty raha tagnate’e ao. 19 Nihay ty ndaty iaby nipetrake ta Jerosalema ao ze raha zay, hafarà’e natao tihoe Akeldama, ndra “Teten-dio” ty agnara i tetekey amy ty fireha iareo.) 20 Satria izao ty raha voasoratse amy ty boke Salamo ao: ‘Lonike hofoagne tsy hisy raha ty tragno’e sady lonike tsy hisy ndaty hitoboke sasa ty ao’, naho tihoe: ‘Hoazo o ndaty hafa ty andraiki’e amy ty maha mpiandraikitse aze.’ 21 Mila soloagne are reke, le ty raike amo o lahilahy niarake tamantika tagnate i fotoagne nanoa i Jesosy Tompo ty fanompoa’e rey, 22 nanomboke tamy i nanoa i Jaona badisa azey, hatrake amy i andro nagnakaragne aze an-dagnitse agney ty toko’e hasolo aze. Toko’e ho vavolombelogne miarake ama’ay ka reke mba hagnambara tie, fa nivelomegne tamy ty mate ty Jesosy.”
23 Nanolotse lahilahy roe areke iareo: Ty raike i Josefa, i tokavegne tihoe Barsabasy ndra ka i Jostoy, le ty raike i Matia. 24 Le nivavake iareo sady nanao tihoe: “O Jehovah, hai’o ty am-po o ndatio ao iaby. Atorò anay areke tie ia amy iareo roe lahy ty hojobogne’o, 25 mba hanao ty asa fanompoagne toy naho ho apostoly hisolo i Jodasy, i niala satria nite hanao ze tea’e hatao avaoy.” 26 Nanao kitsapake areke iareo, le i Matia ty nivoafily. Ireke ty natao fagnampe i apostoly 11 lahy rey.