Asa o Apostolio
11 Nirey i apostoly rey naho ty rahalahy ta Jodia agne fa nagneke ty saontsin’Agnahare ty ndaty boake amo o firenena hafao. 2 Naho fa nandeha ta Jerosalema agne areke ty Petera, le nanignetigne aze o ndaty mpanohagne ty fanapahagne ajajao, 3 sady hoe iareo: “Nizilike tan-tragno o ndaty tsy mitapakeo agne rehe sady nihinagne niarake tamy iareo.” 4 Le nihazavae i Petera tamy iareo tamy ty pitsopitso’e ty raha niseho. Hoe reke:
5 “Tamy iraho tamy ze tanàgne atao tihoe Jopa zay, le nivavake. Ie naho fa niavy eo, le nahatrea fahitagne raho. Nahatrea raha hoe lamba rongony bey nizotso boake an-dagnitse agne raho tamy izay. Tamy i zoro’e efatse rey ty nanjotsoagne aze mbamako mbeo. 6 Naho fa nihenteako soa ty agnate’e ao, le nisy biby managne tombo’e efatse, bibihako, biby milaly naho vorogne mitiligne. 7 Naharey feo ka raho nirehake tamako tie: ‘Mitsangana rehe Petera! Vonò reo sady hano.’ 8 Faie hoe raho: ‘Sagnatria Tompo, mbe lia ty vavako naho nihinagne raha maloto ndra raha tsy malio.’ 9 Le hoe ty navale i feo boake an-dagnitse agney: ‘Ko atao’o tihoe maloto ze raha fa nilioven’Andrianagnahare.’ 10 Naho fa nireiko fagnintelo’e i feoy, le nisintonegne an-dagnitse agne i raha rey iaby. 11 Tamo o fotoagne iohoe avao ka, le nisy lahilahy telo niavy tamy i tragno nitoboha’aỳ ao. Boake a Kaisaria agne iareo, le nirahegne hombamako mbeo. 12 Nirehafe i fagnahỳ raho mba hiarake amy iareo, hafaràko tsy nisalasala ndra kidikidy. Niarake tamako ka ty rahalahy enegne retoa, le nizilike tan-tragno i lahilahỳ ao zahay.
13 “Nitantarae’e tama’ay ka fa nao reke nahatrea anjely nitsangagne tan-tragno’e ao sady nirehake tihoe: ‘Magniraha ndaty ho a Jopa agne mba hangalake i Simona, i tokavegne tihoe Peteray. 14 Horehafe’e ama’o ty raha hahavoavonje azo naho ze ndaty mitoboke an-tragno’o ao.’ 15 Faie naho vaho nanomboke nirehake raho, le nipoke tamy iareo i fagnahy masigney, manahake i nipoha’e tamantikagne tamy i voaloha’ey. 16 Nitsiaroko ka tamy izay fa mateteke ty Tompo ro nirehake tie: ‘I Jaona manao badisa amy ty rano fa inareo hatao badisa amy ty fagnahy masigne.’ 17 Nimean’Agnahare i fagnomezagne maimaim-poagney tika satria nino i Jesosy Kristy Tompo. A naho nimean’Agnahare o fagnomezagne iohoe manahake antika ka iareo, le ia raho ro hahavita hikalagne an’Agnahare?”
18 Naho fa naharey izay iareo, lelia’e tsy nanohetse sasa* sady nagnomey voninahitse an’Agnahare nanao tihoe: “Kay tean’Agnahare hibebake ka o ndaty boake amy ty firenena hafao, amy izay mba mahazo i havelogney!”
19 Naho fa niparitake i mpianatsey tafara i nagnenjehagne i Stefanay, le nisy ty nilay ta Fenisia agne, ta Sipra agne naho ta Antiokia agne. Faie ze Jiosy avao ty nitoria iareo. 20 Faie ty ila’e amy i mpianatse niavy ta Antiokia agne rey, le boake a Sipra agne naho a Kirena agne. Nitory i talily soa miomba i Jesosy Tompoy tamo o ndaty mirehake grikeo iareo. 21 Nagnampe iareo ka ty fità i Jehovah, le maro ty nanjare mpino sady niova, le nanonjohy i Tompo.
22 Nirey i fiangonagne ta Jerosalema agney ze vaovao miomba iareo zay, hafarà iareo nagnirake i Barnabasy mba handeha ta Antiokia agne. 23 Naho fa niavy agne reke, le nifale naho fa nahatrea ty hasoa fagnahy miambake nasehon’Agnahare tamy iareo. Nampahereze’e ka iareo, amy izay tapa-kevetse ty hipiteke amy i Tompo avao amy ty fo’e. 24 Ndaty soa fagnahy ty Barnabasy, feno fagnahy masigne sady nanam-pinoagne. Ty voka’e, maro ty ndaty nanjare nino i Tompo. 25 Nandeha a Tarsosy agne reke tafara izay mba hipay i Saoly. 26 Naho fa nitrea’e ty Saoly, le nente’e ta Antiokia agne. Nivory niarake tamy i fiangonagney tagne naho nampianatse ndaty maro iareo tagnate ty tao’e raike. Ta Antiokia agne ty nitokavagne i mpianatse rey voaloha’e tihoe Kristiana noho ty fitarihan’Andrianagnahare.
27 Tamy ze andro zay, le nisy mpaminany boake a Jerosalema agne nandeha ta Antiokia agne. 28 Agnisa izay ty Agabo. Nitarihe i fagnahy masigney reke, le naminany tie, hisy hakere ty magneran-tane. Le niseho vata’e ze raha zay tamy ty andro i Klodio. 29 Nanapa-kevetse areke i mpianatse rey, fa handefa fagnampeagne hoahy ty rahalahy mitoboke a Jodia agne, arake ze anagna iareo. 30 Nitanterahe iareo vata’e zay, le nandefa fagnampeagne tamo o androanavy tagneo iareo, le i Barnabasy naho i Saoly ty ninday i fagnampeagne rey.