Asa o Apostolio
12 Tamy ze fotoagne zay, le nanomboke nampijale ty ndaty ila’e tamy i fiangonagney eo ty Heroda mpanjaka. 2 Nivonoe’e tamy ty mesa ty Jakoba, i rahalahy i Jaonay. 3 Naho fa nitrea’e tie nahafale o Jiosio zay, le nitsepahe’e ty Petera. (Andro fihinanagne i Mofo tsy Misy Lalivaỳ* tamy izay.) 4 Naho fa nitsepahe’e ty Petera, le nazili’e am-pirizò agne. Ty anto’e, afara i Pasakey reke vaho izay tea i Heroda haseho amy i vahoakey eo. Maramila goropy efatse ty nifandimbe niambegne i Petera. Nisy maramila efatse ty tamy ty goropy tsikiraidraike. 5 Tamy i Petera tam-pirizò agney, le nivavake mafe ho aze taman’Agnahare i fiangonagney.
6 Tamy ty halegne taloha i andro ho nampisehoa i Heroda i Petera amy i vahoakey eoy, le niroro tagnivo ty maramila roe teo reke sady mirohy seny roe. Nisy mpiambegne nitsangagne ka ty tan-dala i pirizòy eo, mba hiambegne i pirizò nisy i Peteray. 7 Faie nisy anjely i Jehovah nitsangagne ty tao, sady nisy hazavagne namilepiletse ty tamy i pirizòy ao. Nikasihe’e tamy ty pa’e ty Petera mba hamohazagne aze, sady hoe reke: “Mitsangana malaky rehe!” Le avy le nipoke i seny tan-tagna’ey rey. 8 Hoe ka i anjelỳ tama’e: “Miakanjoa rehe, le agnisio i kapa’oy.” Le natao i Petera ka zay. Tamy ty fara’e, le hoe i anjelỳ tama’e: “Agnisio i akanjo’o ivela’ey, le oriho raho.” 9 Le niakatse ty Petera sady nagnorike i anjelỳ, faie tsy nifanta’e tie tena ie o raha miseho ama’eo fa atao’e ho ireke avao ro mahatrea fahitagne. 10 Naho fa boake nandalo i mpiambegne voaloha’e naho faharoey iareo, le niavy tamy i vavahady vigne iakaragne i pirizòy mba hizilihagne an-tanàgne ao. Faie nisokake hoaze avao o vavahady iohoe, le niboake teo iareo. Naho fa niboake iareo, le niharo lia kedekede tamy ze lalagne raike zay, faie le avy le nenga i anjelỳ reke naho fa niavy eo. 11 Tamy izay vaho nihay i Petera tie tena ie o raha nisehò, le nirehake reke tie: “Haiko soa hinane zao, fa nagnirake anjely ty Jehovah mba hagnavotse ahy an-tagna i Heroda eo naho amy ze raha raty nieretserete o Jiosio hanjò ahy.”
12 Naho fa boake nieretseretse i raha niseho teoy reke, le nandeha an-tragno i Maria agne. Rene i Jaona, i tokavegne tihoe Markay o Maria iohoe. Nisy mpianatse maromaro niarake nivory naho nivavake ty tan-tragno i Maria ao tamy izay. 13 Naho fa nampinkonkogne tam-bavahady eo ty Petera, le nisy mpanompovave raike atao tihoe Roda zay niavy teo mba hanokake aze. 14 Naho fa nirei’e ty feo i ndaty nampinkonkogney, le avy le nihai’e tie feo i Petera. Nifale loatse areke reke, le tsy nitendre’e iaby aza ndra ty ho nanokake i vavahadỳ, fa le avy le nilay mban-tragno mbeo reke mba hitalily tie mitsangagne am-bavahady ao ty Petera. 15 Faie hoe iareo tama’e: “Mivolambolagne avao rehe.” Faie le mbe nizizo avao reke tie ao vata’e ty Petera. Le hoe iareo: “Anjeli’e zay.” 16 Faie le mbe nampinkonkogne tao avao ty Petera. Naho fa nisokafe iareo i lalagney, le nitrea iareo reke sady tena nigaga iareo. 17 Faie nanao fihetseke tamy i tagna’ey ty Petera mba hampitsignagne iareo. Nitantarae’e tamy iareo amy ty pitsopitso’e ty fomba nagnakara i Jehovah aze boake am-pirizò ao sady hoe reke: “Tantarao’areo amy i Jakoba naho amo o rahalahio ze o raha zao.” Niakatse reke naho fa niavy eo, le nandeha an-toeran-kafa agne.
18 Ie naho fa nimaraindray, le nisamborohotake i maramila rey sady nifagnontane tie, nimbaia ty Petera. 19 Nikaroke aze mafe ty Heroda faie tsy nahatrea aze. Nadikadigne i Heroda i mpiambegne rey, le nirehafe’e ka mba hosazeagne. Niala ta Jodia agne reke, le nandeha ta Kaisaria agne sady nijanogne tagne kedekede.
20 Niboseke* tamy ty ndaty ta Tiro naho ta Sidona agne ty Heroda. Niharo hevetse areke iareo tie hombama’e mbeo. Naho fa boake nandrese lahatse i Blasto iareo, i lahilahy niandraikitse ze raha tan-tragno i Heroda mpanjaka aoy, le nipay filongoagne tama’e, satria boake amy ty tane i mpanjakay ty ahazoa iareo hanegne. 21 Ie tamy ty fotoagne voatondro, le nagnisy akanjo mpanjaka ty Heroda sady nitoboke tamy i toeragne fitsaragney eo. Le nikabaro tamy i vahoakey reke. 22 Nikorakorake i vahoake nivory teoy tie: “Feon’Agnahare zao fa tsy feo o ndaty!” 23 Teo naho eo avao, le avy le nisia i anjely i Jehovah-y reke, satria tsy nagnomey voninahitse an’Agnahare. Nihane ty soko reke, le nimate.
24 Faie vao mainke nitombo naho niparitake i saontsy i Jehovah-y, le maro ty ndaty nanjare mpino.
25 Naho fa nivita i Barnabasy naho i Saoly zara i fagnampeagne ta Jerosalema agney, le niheregne iareo sady nindese iareo niarake tamy iareo ty Jaona, i tokavegne tihoe Markay.