Asa o Apostolio

13 Nisy ty mpaminany naho ty mpampianatse retoa ty tamy i fiangonagne ta Antiokia agney: I Barnabasy, i Simeona i tokavegne tihoe Nigeray, i Losio i boake a Kirena agney, i Menahema i niara-nianatse tamy i Heroda lahibeim-paritsey vaho i Saoly. 2 Tamy iareo nanompo i Jehovah naho nifaly hanegney, le hoe i fagnahy masigney: “Atokano ho ahy ty Barnabasy naho i Saoly satria jinoboko hanao asa manokagne iareo.” 3 Naho fa boake nifaly hanegne naho nivavake iareo, le nametra-tagnagne tamy iareo roe lahy sady nandefa iareo.

4 Nirahe i fagnahy masigney homba Selokia mbeo areke iareo roe lahy. Ie iareo niavy agne, le nandeha sambo mba Sipra mbeo. 5 Naho fa niavy ta Salamisy ao iareo, le nitory ty saontsin’Andrianagnahare tamy ty sinagoga o Jiosio agne. Niarake tamy iareo ka ty Jaona mba hagnampe iareo.

6 Niala ta Salamisy tao iareo, le niavy ta Pafo agne. Amy ty fara i tokonosey ty misy o tane iohoe. Nahatrea ze lahilahy Jiosy atao tihoe Barjesosy zay iareo tie tagne. Mpihisa aoly naho mpaminany sandoke o lahilahy iohoe. 7 Niasa hoahy i Serzio Paolo, i governoram-paritse nahiran-tsaigney reke. Nitokave’e ty Barnabasy naho i Saoly satria nite hitsanogne ty saontsin’Agnahare reke. 8 Faie nanohetse iareo ty Elima, i mpihisa aolỳ (izay i agnara’ey naho adika), le natao’e ze hahavy i governoram-paritsey tsy hitsanogne ty saontsin’Agnahare. 9 Nifeno fagnahy masigne ty Saoly, i tokavegne tihoe Paolỳ, le nangareke aze 10 sady nirehake tihoe: “O ty lahilahy tsy mieretseretse naho tsy ty hamitake naho ty hanao raha raty avao tiagne. Ana i Devoly rehe sady fahavalo ty hamaregnagne. Ombia rehe vaho tsy hirehake tie vande ty fampianaragne maregne boake amy i Jehovah? 11 Hasia i fità i Jehovah-y rehe, le ho goa. Tsy hahatrea ty hazavà i masoandroy ka rehe.” Teo naho eo avao, le avy le nihananjavogne naho nihanaiegne i maso’ey. Le nihodikodigne reke mba hipay ndaty hitarike aze amy i tagna’ey. 12 Naho fa nahatrea i raha niseho zay i governoram-paritsey, le nanjare mpino satria tena nahagaga aze ty fampianara i Jehovah.

13 Niala ta Pafo ao ty Paoly naho i nama’e rey, le nandeha sambo ta Perga a Pamfilia agne. Faie nenga i Jaona tao iareo, fa ireke niheregne a Jerosalema agne. 14 Faie ndra tie teo zay, le nanohy i lia iareoy avao iareo. Niala boake a Perga ao iareo, le niavy ta Antiokia a Pisdia agne. Nandeha tamy ze sinagoga zay ao iareo tamy i Sabatay, le nitoboke. 15 Naho fa nivita vaky tagnatreha i ndaty maroy eo i Lalànay naho ty raha nisorate o mpaminanio, le nagnirake ndaty i mpifehe i sinagogaỳ mba hirehake tamy iareo roe lahy tie: “O ry rahalahy, naho managne rehake hampaherezagne o ndatio nareo, le mirehafa.” 16 Nitsangagne areke ty Paoly, le nanao fihetseke tamy ty tagna’e sady hoe reke:

“O ry Israelita naho inareo ndaty matahotse an’Agnahare, tsanogno’areo raho. 17 Nijobogne o razambeintikagneo i Andrianagnahare o Israelioy, le nampea’e iareo tamy iareo niambahiny ta Ejipta agney, le nampiasa i fità’e maherỳ reke mba hagnafahagne iareo boake agne. 18 Niareta’e avao ty raha natao iareo tam-patrambey agne tagnate ty 40 taogne. 19 Naho fa boake nandrese firenena fito tamy ty tane i Kanana agne reke, le nimea’e iareo i taney mba holovà iareo. 20 Naharetse 450 taogne ze raha rezay iaby.

“Tafara izay, le nimea’e mpitsara iareo, amparake ty niavia i Samoela mpaminany. 21 Faie naho fa nandeha ty fotoagne, le nangatake mpanjaka iareo, le nimein’Andrianagnahare iareo ty Saoly ana i Kisy mba ho mpanjaka iareo tagnate ty 40 taogne. Boake amy ty foko i Benjamina reke. 22 Naho fa nafahagne reke, le tinendre’e ho mpanjaka ty Davida. Izao ty nisaontsie’e miomba aze: ‘Nahatrea i Davida, i ana-dahy i Jesey raho. Lahilahy zoto ty foko reke. Hatao’e iaby ze raha irieko.’ 23 Arake ty nampitamae’e, le boake amy ty tarana o lahilahy iohoe ty hijobognan’Agnahare i mpagnavotse hoahy o Israelioy, tsy ia zay fa i Jesosy. 24 Taloha ty niavia’e, le nitory tagnatreha o Israelio eo iaby ty Jaona, amy izay iareo atao badisa mba hanoroa iareo tie nibebake. 25 Faie naho fa nivita ty fanompoa i Jaona, le nirehake reke tie: ‘Atao’areo ho ia irahò? Tsy i ndaty eretserete’areoy raho. Ho avy afarako reke! Le ndra iraho aza tsy fagneva ty hagnafake ty kapa an-tombo’ey.’

26 “O ry rahalahy tarana i Abrahama naho inareo ndaty matahotse an’Agnahare, fa nambaran’Agnahare antika ty fomba hagnavota’e antikagne. 27 Tsy nihay ty ndaty ta Jerosalema agne naho i mpitondra iareo rey o mpagnavotse iohoe. Faie naho fa nitsara aze iareo, le nagnatanterake ty raha nirehafe o Mpaminanio nivakiegne mafe isake sabatay. 28 Ndra tie tsy nahatrea anto’e hamonoagne aze aza iareo, le nangatake tamy i Pilato mba hamonoagne aze. 29 Naho fa nitanterahe iareo iaby i raha nisorategne miomba aze rey, le nazotso iareo boake amy i boda-kataey ey reke sady naleve iareo tamy ze kibory raike zay. 30 Faie nivelomen’Agnahare tamy ty mate reke, 31 le niseho tamy i ndaty niarake tama’e boake a Galelia homba Jerosalema mbeo rey tagnate ty andro maro. Iareo ty vavolombelo izay amo o ndatio.

32 “Torie’ay ama’areo areke, i talily soa miomba ty fampitamagne natao tamy ty razambeintikagney. 33 Nitanterahen’Agnahare tamantika tarana’e ze fampitamagne zay naho fa namelogne i Jesosy tamy ty mate reke. Satria izao ty rehafe ty salamo faharoe: ‘Anako rehe, le ho rae’o raho manomboke androany.’ 34 Nivelomen’Agnahare tamy ty mate reke, amy izay tsy ombia ho lo satria fa nisaontsy reke tie: ‘Hotea azo raho sady tsy hivalike ama’o, arake i nampitamaeko i Daviday.’ Azo atokisagne zay. 35 Hoe ka ty salamo hafa: ‘Tsy henga’o ho lo i mpanompo’o tsy mivalikey.’ 36 Faie naho fa nahavita ty fanompoa’e an’Agnahare amparake ty niaigna’e ty Davida, le nimate. Nalevegne tamy ty razambei’e tagne reke, le nilo. 37 Fa i nivelomen’Agnahare tamy ty matey tsy nilo.

38 “Soa hofanta’areo ry rahalahy, fa amy ty alala’e avao ro hahazoagne famelan-keloke, le ie o torie’ay ama’areò. 39 Tsy mahavy anareo ho maregne i Lalà i Mosesỳ. Faie satria nimate o lahilahy iohoe, le hambaran’Agnahare tihoe maregne ze mino. 40 Mitaoa nareo mba tsy hanjò anareo ty raha nirehafe o mpaminanio manao tihoe toy tie: 41 ‘O ty mpagnambanembane ndaty retoa, henteo’areo ty asa ataoko amy ze o andro’areo zao. Tsy hinoa’areo ze raha zay ndra tie hisy ndaty aza hagnazava aze amy ty pitsopitso’e. Faie ho gaga nareo sady hozamagne.’”

42 Naho fa niakatse boake amy i sinagogay ao iareo, le nihalale tamy iareo i ndaty rey mba hirehake izay indraike amy ty Sabata magnarake. 43 Naho fa nivita ty fivoriagne tamy i sinagogay ao, le maro ty Jiosy naho ty ndaty nagnorike ty fivavahagne Jiosy nandeha nagnorike i Paoly naho i Barnabasy. Naho fa nirehake tamy iareo iaby iareo roe lahy, le nirisihe iareo i ndaty rey mba hikezake ho fagneva ty hanehoan’Agnahare hasoa fagnahy miambake.

44 Ie tamy ty Sabata nagnarake, le fa ho ty ndaty tamy i tanàgney eo iaby ty nivory mba hitsanogne ty saontsy i Jehovah. 45 Naho fa nahatrea i vahoakey o Jiosio, le nialogne sady nanomboke nanivetive ty raha nirehafe i Paoly. 46 Nahavany nirehake tamy iareo ty Paoly naho i Barnabasy tie: “Inareo ty toko’e ho nagnambaragne i saontsin’Agnaharey voaloha’e. Faie satria nareo tsy nandrambe aze sady tsy eretserete’areo ka tie fagneva ty hahazo i havelogne nainai’ey nareo, le handeha amo o firenena hafao agne zahay. 47 Ty anto’e, izao ty nandilia i Jehovah anay: ‘Tinendreko ho fahazavagne hoahy o firenenao rehe, amy izay rehe hitory i fagnavotagney hatrake amy ty fara ty tane toy agne.’”

48 Naho fa naharey izay o ndaty boake amy ty firenena hafao, le nifale naho nagnomey voninahitse ty saontsy i Jehovah. Ze nanagne toe-po soa mba hahazoagne i havelogne nainai’ey, le nanjare mpino. 49 Vao mainke niparitake nagneneke i taney ty saontsy i Jehovah. 50 Faie nirisihe o Jiosio ze ampela nanan-kaja natahotse an’Agnahare naho ze manam-pahefagne tamy i tanàgney eo, mba hitaogne o ndatio hagnenjeke i Paoly naho i Barnabasy sady handroake iareo hiala amy i tanàgney eo. 51 Nahintsa iareo roe lahy areke ty lemboke tamy i tombo iareoy, le nandeha a Ikonioma agne iareo. 52 Faie ndra tie teo zay, le nifale avao i mpianatse rey sady nifeno fagnahy masigne.