Asa o Apostolio

14 Tamy iareo ta Ikonioma agney, le nizilike tamy ty sinagoga o Jiosio ao. Nihay iareo soa ty nirehake tamy i ndaty tao rey, hafarà’e maro ty Jiosy naho Grike nanjare mpino. 2 Faie i Jiosy tsy nino rey nanao ze hahavy o ndaty boake amy ty firenena hafao halaigne i rahalahy rey, le hanohetse iareo. 3 Nitory miomba ty hasoa fagnahy miambake nasehon’Agnahare tao tagnate ty heregnandro maromaro iareo. Tena tsy natahotse iareo ty nanao izay noho ty hery nimea i Jehovah iareo. Nenga’e hanao famantaragne naho fahagagagne tagnatreha iareo eo i apostoly rey mba hagnaporofoagne tie maregne i hafatse torie iareoy. 4 Faie tsy nitovy hevetse ty ndaty tamy i tanàgney tao. Ty ila’e nanohagne o Jiosio fa ty ila’e nanohagne i apostoly rey. 5 Naho fa ho nijera naho ho nitora-bato iareo o ndaty boake amy ty firenena hafao naho o Jiosio vaho i mpitondra iareo rey, 6 le nisy ndaty nampahafantatse i apostoly rey ze raha zay. Hafarà iareo nilay tamy ty tanàgne a Likonia agne, a Listra naho a Derbe agne vaho amy ty faritse magnodidigne ey. 7 Nitory i talily soay iareo tie tagne.

8 Nisy lahilahy naleme tomboke zay ty ta Listra tao. Nitoboke avao reke, satria naleme tomboke boake an-troke agne, le mbe lia’e naho nandeha. 9 Nitsanogne i Paoly o lahilahy iohoe tamy ireke nirehakey. Naho fa nagnente aze soa ty Paoly, le nitrea’e tie nino ty raha nirehafe’e i lahilahỳ sady nino ka tie vita’e ty magnasitragne aze. 10 Nirehake mafe hoe izao ty Paoly: “Mitsangana rehe!” Le avy le nitsamboagne i lahilahỳ sady nanomboke nandeha. 11 Naho fa nahatrea ty raha natao i Paoly i vahoakey, le nirehake mafe tamy ty firehake likonia. Hoe iareo: “Nanjare ndaty manahake antika o andrianagnahareo, le nizotso amantikagne etoy!” 12 Le natao iareo tihoe Zeosy ty Barnabasy, fa i Paoly natao iareo tihoe Hermesy, satria ireke ty ninday rehake. 13 Ninday agnombe naho feheloha raven-katae mbamy i vavahady i tanàgney mbeo o mpisoro i Zeosio, satria tamy i fidiragne tamy i tanàgney eo ty nisy i tempoly i Zeosỳ. Nite hanao sorogne hoahy i Paoly naho i Barnabasy o mpisoro i Zeosio naho i vahoakey.

14 Faie naho fa naharey izay ty apostoly Barnabasy naho i Paoly, le niriate iareo i akanjo iareoy sady nandeha mbamy i vahoakey mbeo iareo. Nirehake mafe hoe izao ka iareo: 15 “Nagnino nareo ro manao raha hoe izao? Ndaty manahake anareo avao ka anio izahaio! Nitory i talily soay ama’areo zahay, amy izay nareo miala amo o raha tsy misy dika’e atao’areo zao, le hanompo i Andrianagnahare velogney, i namboatse i lagnitsey naho ty tane toỳ vaho i riakey naho ze raha iaby amy iareo eoy. 16 Nenga’e hanao ze raha tea iareo hatao avao o firenenao iaby tie taloha. 17 Faie ndra tie teo zay, le nanao raha soa reke mba ho vavolombelo’e. Mea’e ranon’oragne boake amy i lagnitsey ey nareo sady atao’e mahavokatse maro amy ty fotoa’e. Mea’e hanegne sambe karaza’e ka nareo mba hahavontsigne* anareo sady atao’e ty hahafalefale ty fo’areo.” 18 Faie ndra tie nirehake o raha rehoe aza iareo, le fa kede avao ty sisa tsy ho nanoa i ndaty rey sorogne hoahy iareo.

19 Faie niavy o Jiosy boake a Antiokia naho a Ikonioma agneo, le nandrese lahatse i vahoakey. Tinora iareo vato ty Paoly mba hamonoagne aze, le tinaritary iareo ivela i tanàgney agne satria nihevetse iareo tie fa mate reke. 20 Faie naho fa nivory tama’e teo i mpianatse rey, le nitsangagne reke sady nizilike tan-tanàgne ao. Nandeha niarake tamy i Barnabasy ho a Derbe agne reke naho fa nimaray igne. 21 Nitory i talily soay tamo o tanàgne iohoe iareo sady maro ka ty ndaty nampea iareo mba hanjare mpianatse. Ie tafara izay, le niheregne ta Listra agne naho ta Ikonioma agne vaho ta Antiokia agne iareo. 22 Nampahereze iareo ty mpianatse tagne sady nirisihe iareo mba hagnamafe ty finoa’e. Hoe iareo: “Tsy maintsy miatreke haoreagne maro tikagne, aloha ty hizilihagne amy i Fanjakàn’Andrianagnaharey ao.” 23 Nanendre androanavy tamy ty fiangonagne tsikiraidraike ka iareo. Naho fa boake nivavake naho nifaly hanegne iareo, le nankine iareo tamy i Jehovah o androanavy rehoe satria nino aze.

24 Nanegnantegna i Pisdia iareo roe lahy tafara izay, le niavy ta Pamfilia agne. 25 Nandeha ta Atalia agne iareo naho fa boake nitory ty saontsin’Agnahare ta Perga ao. 26 Niala ty ao iareo, le nandeha sambo a Antiokia agne. Ty rahalahy tamo o tanàgne iohoe ao, i nivavake taman’Agnahare mba haneho hasoa fagnahy miambake tamy iareoy, amy izay hovita iareo i asa nampanoegne iareoy. Le nivita iareo soa i asay.

27 Naho fa niavy agne iareo, le navory iareo i fiangonagney. Nitantarae iareo tamy i fiangonagney ty raha maro nataon’Andrianagnahare tamy ty alala iareo naho ty raha natao’e mba hahavy o ndaty boake amy ty firenena hafao hanjare mpino.* 28 Nijanogne elaela niarake tamy i mpianatse rey tao iareo.