Asa o Apostolio
15 Nisy lahilahy ila’e nizotso boake a Jodia agne nampianatse o rahalahio tie: “Arake i Lalà i Mosesỳ, le tsy ho voavonje nareo naho tsy tapahegne.” 2 Faie naho fa boake nifamale naho nialy hevetse tamy iareo ty Paoly naho i Barnabasy, le nanapa-kevetse i androanavy rey fa handefa i Paoly naho i Barnabasy vaho ty rahalahy ila’e, mba hinday i aly hevetsey amy i apostoly rey agne naho amy i androanavy ta Jerosalema agne rey.
3 Le natere i fiangonagney iareo faie naho fa nisasake i lalagney, le niheregne i fiangonagney fa iareo nanohy i lia iareoy avao. Nanegnantegna i Fenisia naho i Samaria iareo. Tena nifale ty rahalahy iaby tagne naho fa nitantarae iareo tamy ty pitsopitso’e ty fiovagne natao o ndaty boake amy ty firenena hafao. 4 Naho fa niavy a Jerosalema agne iareo, le nirambese i fiangonagney naho o apostolio vaho o androanavio soa. Nitantarae iareo tamy iareo iaby ka ty raha maro nataon’Andrianagnahare tamy ty alala iareo. 5 Faie nisy mpino, niagnisa o sekta o Fariseò tie taloha rey, nitsangagne boake amy i seza nitoboha iareoy eo, le nirehake tie: “Tsy maintsy tapahegne naho ampagnorihegne i Lalà i Mosesỳ iareo.”
6 Nivory areke i apostoly rey naho i androanavy rey mba handineke i olagney. 7 Naho fa boake nialy hevetse bey iareo, le nitsangagne ty Petera sady nirehake tamy iareo tihoe: “O ry rahalahy, fanta’areo soa fa amantika iaby retoa, le iraho ty nijobognen’Agnahare voaloha’e mba hitory i talily soay amo o ndaty boake amy ty firenena hafao, amy izay iareo manjare mpino. 8 Nimea i Andrianagnahare mahafantatse ty am-po aoy fagnahy masigne manahake ty natao’e tamantika ka iareo, mba hagnaporofoa’e tie eke’e iareo. 9 Mitovy avao ty fomba indesa’e antika naho indesa’e iareo fa tsy nisia’e fiambaha’e, satria fa niliove’e ty fo iareo noho iareo nanam-pinoagne. 10 Nagnino areke nareo hinane zao ro mitsapa an’Agnahare, le seré’areo hisiagne baogne ty am-bozo o mpianatse reo eo, ie amy izao ndra itika ndra ty razambeintika tsy nahavita ninday izay? 11 Fa itikagne amy hinane zao, le mino tie, amy ty alala ty hasoa fagnahy miambake naseho i Jesosy Tompo ro hamonjeagne antikagne. Le hoe izay ka iareo.”
12 Naho fa naharey izay iareo iaby, le nitsìgne. Nitsanogna iareo ka ty Barnabasy naho i Paoly naho fa nitantara i fahagagagne naho i famantaragne maro nataon’Andrianagnahare tamy ty alala iareo tagnatreha o ndaty boake amy ty firenena hafao eoy. 13 Naho fa nivita ty reha iareo, le namale ty Jakoba tie: “O ry rahalahy, tsanogno’areo raho. 14 Fa nitantarae i Simeona tamantikagne teo tie, neken’Agnahare ka o ndaty boake amy ty firenena hafao. Amy izay reke hijobogne ndaty boake ao mba hinday ty tahina’e. 15 Sady i raha nirehafe’e zay, le mifagnarake amy ty raha nirehafe o Mpaminanio toy tie: 16 ‘Afara o raha rehoe, le hiheregne raho sady haoreko indraike i tragnolay i Davida fa nihomakey. Hamboareko indraike reke sady hahereko amy ty toe’e. 17 Amy izay ze ndaty sisa eo, hipay mafe i Jehovah miarake amo o ndaty boake amy ty firenena hafao. Hotokavegne amy ty agnarako o ndaty rehoe hoe ty Jehovah. Ireke ty hanao o raha rehoe 18 sady fa ela reke ro nanapa-kevetse hanao izay.’ 19 Izao areke ty heveko, tsy toko’e hosahiragnentika o ndaty boake amy ty firenena hafa mitolike aman’Agnahareo, 20 fa hanoratantikagne iareo mba hifalia iareo ze raha handoto iareo. Agnisa izay ty fanompoan-tsampy, ty fijangajangagne, ty biby mate boboke* naho ty lio. 21 Fa nanomboke tamy izay hatrake amy izao ro nisy ndaty nitory miomba ty raha nirehafe i Mosesy isake tanàgne, satria nivakiegne mafe tamy i sinagogay ao isake sabata ty raha nirehafe’e.”
22 Nanapa-kevetse areke o apostolio naho o androanavio vaho i fiangonagney iaby fa hijobogne lahilahy amy iareo eo, mba handeha hiarake amy i Paoly naho i Barnabasy ho a Antiokia agne. I Jodasy, i tokavegne tihoe Barsabasỳ naho i Silasy ty nijobògne iareo hiarake amy iareo. Agnisa ty nanagne andraikitse lahibey tamo o rahalahio eo iareo roe lahy. 23 Izao ty nisorategne tamy i taratasy nampindesegne iareoy:
“Manoratse ho anareo rahalahy boake amy ty firenena hafa a Antiokia, a Siria naho a Kilikia agneo zahay. Manalama anareo zahay rahalahi’areo, le o apostolio naho o androanavio. 24 Nirei’ay fa nisy ndaty boake ama’ay atoy, nirehake raha mampikorotan-tsaigne anareo mba hanimbagne ty finoa’areo, ie amy izao zahay tsy nagnirake iareo. 25 Nanapa-kevetse areke zahay fa hijobogne ndaty mba halefa ama’areo agne, miarake amy i Barnabasy naho i Paoly rahalahy tea’ay. 26 Sambe manao sorogne ty fiai’e iareo roe lahy noho ty agnara i Jesosy Kristy Tompontikagne. 27 Irahe’ay ama’areo agne areke ty Jodasy naho i Silasy mba hirehake ama’areo ty raha voasoratse amy ty taratasy toy ato. 28 Zoto i fagnahy masigney naho izahay ty tsy hampinday entagne mavesatse anareo, ankoatse ty raha tsy maintsy orihe’areo retoa, 29 le ty hifalia’areo ty raha natao sorogne hoahy ty sampy, ty lio, ty biby mate boboke naho ty fijangajangagne. Hahasoa anareo ty fagnoriha’areo o raha rehoe. Lonike mba tsy hagnahy nareo!”
30 Naho fa niala ty eo o lahilahy rehoe, le nandeha a Antiokia agne. Navory iareo ze mpianatse tao, le nimea iareo i mpianatse rey i taratasỳ. 31 Naho fa nivita i mpianatse rey vaky i taratasỳ, le tena nifale iareo iaby satria nampahery iareo ty raha nisorategne tao. 32 Nanao lahajaka maro ty Jodasy naho i Silasy mba hampaherezagne i rahalahy rey naho hagnamafesagne ty finoa iareo satria mpaminany ka iareo roe lahy. 33 Le nijanogne elaela tagne iareo. Ie iareo naho fa ho nandeha, le nisalalae i rahalahy tao rey mba hotoly soa amy i nagnirake iareo rey agne. 34* —— 35 Fa i Paoly naho i Barnabasy nijanogne ta Antiokia agne sady nampianatse tagne. Nisy rahalahy maro ka niarake nitory tamy iareo i talily soay ndra ty saontsy i Jehovah.
36 Ie andro tsiampeampe tafara izay, le hoe ty Paoly tamy i Barnabasy: “Andao tika hiheregne hitilike i rahalahy nitoriantika ty saontsy i Jehovah rey, amy ty tanàgne misy iareo tsikiraidraike, mba hahatreavantika tie manao akore iareo.” 37 Nanapa-kevetse ty Barnabasy tamy izay fa hinday i Jaona, i tokavegne tihoe Markay. 38 Faie tsy nitea i Paoly hiarake amy iareo reke satria nenga’e ta Pamfilia agne iareo, sady tsy niarake tamy iareo nanao i asay ka reke. 39 Le nifamale iareo sady sambe tena niboseke, hafarà iareo nisarake. I Barnabasy ninday i Marka hiarake ama’e nandeha sambo mba Sipra mbeo, 40 fa i Paoly nijobogne i Silasy hiarake ama’e. Nandeha iareo naho fa boake nivavake ho aze i rahalahy rey mba haneho hasoa fagnahy miambake ama’e ty Jehovah. 41 Le nanegnantegna i Siria naho i Kilikia iareo sady nagnatanjake ty finoa ty fiangonagne tagne.