Asa o Apostolio

2 Tamy i Fete ty Pantekostay, le nivory tamy ty toeragne raike iareo iaby. 2 Tamy iareo nitobokey, le naharey feo tampoke boake an-dagnitse agne iareo. Nirey magneneke i tragno nisy iareoy i feoy sady nanahake ty fikofofo o tiokeo ty fahareizagne aze. 3 Le nahatrea raha hoe lelan’afo tambone iareo tsikiraidraike eo iareo. 4 Nifeno fagnahy masigne areke iareo, le nirehake tamy ty firehake* sambe hafa, arakarake ze nitariha i fagnahy masigney iareo.

5 Ta Jerosalema tao o Jiosy natahotse an’Agnahare boake amy ty firenena sambe hafao tamy ze fotoagne zay. 6 Naho fa naharey i feoy i vahoakey, le nivory sady nidaban-draha, satria sambe naharey i mpianatse rey nirehake tamy ty fireha iareo tsikiraidraike. 7 Tena nidaban-draha iareo, le nirehake tie: “O rikiahe, tsy te Galelia iaby vao ty ndaty mirehake retineo? 8 A nagnino iareo tsikiraidraike ie sambe reintikagne mirehake amy ty firehan-drazantikagneo? 9 Itika zao boake a Partia, Media, Elama, Mezopotamia, Jodia, Kapadokia, Ponto naho boake amy ty faritse i Azia, 10 Frijia, Pamifilia, Ejipta, faritse i Libia marine i Kirena vaho vahiny boake a Roma agne. Misy amy ireo ty Jiosy fa ty ila’e ndaty niova nagnorike ty fivavahagne jiosy.* 11 Misy amantika ka ty boake a Kreta naho Arabia agne, faie sambe reintika mirehake miomba ty raha fanjaka nataon’Agnahare amy ty firehantika iareo.” 12 Tena nidaba areke iareo iaby sady nisahiran-tsaigne, le nifampirehake tihoe: “Ino ty dika izao?” 13 Fa ty ila’e nitsikike iareo sady nirehake tihoe: “Mamo ty divay mamy iareo.”

14 Faie nitsangagne ty Petera naho i 11 lahy rey, le nirehake mafe tamy iareo ty Petera tie: “O ty ndaty te Jodia naho ty ndaty iaby mitoboke a Jerosalema eto retoa, mila mahay ty raha horehafeko toy nareo, le tsanogno’areo soa raho: 15 Tsy mamo arake ty fieretsereta’areo aze o ndaty rehoe, satria vaho amy ty lera fahatelo* zao. 16 Naho ty maregne, le ty raha nirehafe i Joela mpaminany toy o tanterake amy iareò: 17 ‘Hoe ty Andrianagnahare: “Amy ty andro fara’e, le hampipohako ampaha’e amy ty fagnahiko ze nofotse iaby, le ty ana-dahi’areo naho ty anak’ampela’areo haminany, le ty ajalahy ama’areo eo hahatrea fahitagne, le ty rangahe hagninofy. 18 Ndra o mpanompolahiko naho o mpanompovavekò aza hampipohako ampaha’e amy ty fagnahiko amy ze andro zay, le haminany ka. 19 Hanao raha mahagaga amy i lagnitsey ey raho sady hanao famantaragne ambone tane etoy, le lio naho afo vaho setroke manahake o rahogne matevegneo. 20 Hanjare haiegne i masoandroy, le i volagney hanjare lio, aloha ty hiavia i andro lahibey i Jehovah-y, i hampibaribaria’e ty voninahi’ey. 21 Faie ze mitoka ty tahina i Jehovah ro ho voavonje.”’

22 “O ry lahilahy israelita, tsanogno’areo zao: Hai’areo tie nirahen’Andrianagnahare ty Jesosy te Nazareta, satria trea mibaribary tamy ty asa mahagaga, fahagagagne naho famantaragne nataon’Andrianagnahare tamy ty alala’e tagnatreha’areo eo zay. 23 Faie ndra tie teo zay, le nitsepahe’areo reke sady nampipehe’areo i ndaty mpandika lalàna rey amy ty boda-katae, satria izay ty zoton’arofon’Agnahare sady fa nihai’e tie izay ty hanjò aze, le nenga’e hovonoe’areo reke. 24 Faie nivelomen’Agnahare reke mba hagnafahagne aze amy ty fanaintaigna* o fateo satria tsy manan-kery hitagne aze an-kibory ao o fateo. 25 Ty anto’e, izao ty raha nirehafe i Davida miomba aze: ‘Ataoko agnatrehako eo* lognandro ty Jehovah. Tsy hihozongozogne raho, satria ankavanako eo reke. 26 Izay ty nahavy ty foko nifalefale naho ty sogniko nirehake aman-kafaleambey. Izay ka ty mahavy ahy hanagne fanantenagne avao, 27 satria tsy hofoe’o hijanogne amy i Kiborỳ ao avao raho, sady tsy henga’o ho lo, satria tsy mivalike ama’o. 28 Nampahafantare’o ahy ty lala i havelogney. Hatao’o ka ze hahavy ahy ho tena falefale agnatreha’o eo.’

29 “Ry rahalahy, mba engao’areo raho hirehake ty miomba i Davida razambeintikagne. Nimate reke, le nalevegne sady mbe amantikagne eto ty kibori’e hatrake amy izao. 30 Satria reke nimpaminany sady nihai’e fa nanao vava tama’e ty Andrianagnahare tie, ty raike amy ty tarana’e ro hapetra’e amy i sezan-droandria’ey eo. 31 Nitrea’e mialoha tie hovelomegne amy ty mate ty Kristy. Nirehafe’e ka, fa tsy hengagne hijanogne amy i Kiborỳ ao reke, sady tsy ho lo ty nofo’e. 32 Nivelomen’Agnahare tamy ty mate i Jesosy ignehoe sady vavolombelo izay zahay iaby hinaneo. 33 Satria reke fa nakaregne an-dagnitse agne naho nitoboke t’ankavanan’Agnahare eo sady nahazo i fagnahy masigne nampitamae i Raey, le nampipoha’e fagnahy masigne zahay. Ie o rei’areo naho trea’areo zao. 34 Tsy niakatse an-dagnitse agne ty Davida, faie le ty vatategna’e ro nirehake tihoe tie: ‘Hoe ty Jehovah tamy i Tompokoy: “Mitoboha ankavanako etoa, 35 amparake ty hanoako o fahavalo’ò ho fisian-tombo’o.”’ 36 Lonike areke hofanta ty firene Israely iaby naho hatokisa iareo, fa i Jesosy nivonoe’areo tamy ty boda-kataey, le nataon’Andrianagnahare ho Tompo naho Kristy.”

37 Naho fa naharey izay iareo, le nitohigne ty fo iareo sady hoe iareo tamy i Petera naho i apostoly ila’e rey: “O ry rahalahy, ino ty toko’e hatao’ay?” 38 Le hoe ty Petera tamy iareo: “Mibebaha, sady mila atao badisa amy ty agnara i Jesosy Kristy ka nareo tsikiraidraike mba hamelagne ty fahota’areo. Hahazo i fagnomezagne maimaim-poagney ndra i fagnahy masigney ka nareo amy izay. 39 Ty anto’e, ze jobogne i Jehovah, i Andrianagnaharentikagney ro hahazo ze fampitamagne zay. Agnisa izay rehe, ty ana’o naho ze ndaty lavitse agne.” 40 Maro ka ty fagnazavagne hafa nirehafe’e miomba i talily soay sady nandrisike iareo reke tie: “Naho tea’areo ty ho voavonje, le misaraha amy ty taranake raty fagnahy toy.” 41 Natao badisa areke ze nagneke i reha’ey. Eo ho eo amy ty 3 000 ty isa ty ndaty natao badisa tamy i andro ignehoe avao. 42 Nifantoke tanterake tamy ty fampianara o apostolio iareo. Nifampizarà iareo ka ze raha nanagna iareo, le niarake nihinagne iareo sady nivavake tsy tapake.

43 Maro ty fahagagagne naho ty famantaragne natao i apostoly rey. Nanjare natahotse an’Andrianagnahare areke ze ndaty nahatrea izay. 44 Niharo raike ze nanjare mpino sady nifampizarà iareo ze raha nanagna iareo. 45 Navaro iareo ka ty fanagna iareo naho ty tane iareo, le nifampizarà iareo ty vili’e, arakarake ze nipaliae iareo tsikiraidraike. 46 Nandeha tsy tapake tamy i tempolỳ ao iareo sady niharo saigne. Nihinagne tamy ty tragno sambe hafa iareo sady nifampizarà iareo ty hane iareo. Tena nahafale iareo ty nanao izay. Vokatse ty fo iareo ze raha natao iareo. 47 Nidera an’Andrianagnahare ka iareo, le nitea o ndatio iaby. Tagnate ze fotoagne zay, le nisy ndaty voavonje nitaone i Jehovah mba hagnampe ty isa iareo isan’andro isan’andro.