Asa o Apostolio
16 Le niavy ta Derbe naho ta Listra tagne reke. Nisy mpianatse raike tagne zay, i Timoty ty agnara’e. Ana ze ampela Jiosy mpino zay reke fa ty rae’e Grike. 2 Nanagne laza soa tamy i rahalahy ta Listra naho ta Ikonioma agne rey reke. 3 Nitea i Paoly hindesegne miarake ama’e ty Timoty, le nalae’e. Faie nitapahe’e hey reke noho ty amo o Jiosy amy i toeragne handehana iareoy satria nihay iareo tie Grike ty baba i Timoty. 4 Nampahafantare iareo ty rahalahy tamy ze tanàgne nandehana iareo, i fanapahan-kevetse nirambese i apostoly rey naho i androanavy ta Jerosalema agne rey, amy izay mba horihe iareo ka. 5 Nihanatanjake ty finoa i fiangonagne rey sady nihanitombo avao ka ty isa iareo isan’andro isan’andro.
6 Le nandeha nagneneke i Frijia naho ty faritse i Galatia iareo, satria tsy nenga i fagnahy masigney hitory ty saontsin’Agnahare amy ty faritse Azia agne. 7 Naho fa niavy ta Misia agne iareo, le nite ho nandeha a Bitinia agne ka faie tsy nenga i fagnahy i Jesosỳ handeha mbeo. 8 Nanegnantegna i Misia avao areke iareo, le niavy ta Troasy agne. 9 Tamy ty hale igne, le nahatrea fahitagne ty Paoly. Nahatrea lahilahy makedoniana nitsangagne taloha’e eo reke sady nihalale tama’e tie: “Mandehana ama’ay a Makedonia atoy rehe mba hagnampe anay.” 10 Naho vaho boake nahatrea i fahitagney reke, le nite ho nandeha a Makedonia agne zahay satria nieretseretse tie, i Andrianagnahare o mikanjy anay mba hitory amy i ndaty rey i talily soaio.
11 Nandeha sambo boake a Troasy ao areke zahay, le avy le nagnitsy mba Samotrakia mbeo. Ie nihamaray igne, le nandeha a Neapolia agne zahay. 12 Niala ty ao zahay, le nandeha ta Filipy agne. Zanatane o tanàgne iohoe sady rovabey amy ty faritse Makedonia agne. Nijanogne tamo o tanàgne iohoe ao tagnate ty andro tsiampeampe zahay. 13 Tamy i andro Sabatay, le nandeha niakatse tamy i vavahady marine i reneranoy eoy zahay, satria nieretseretse zahay tie misy toeragne fivavahagne ty teo. Nitoboke zahay, le nanomboke nirehake tamy ze ampela nivory teo rezay. 14 Nitsanogne anay ze ampela raike atao tihoe Lidia mpivarotse lamba voloparasy zay. Boake amy ty tanà i Tiatira agne reke sady mpivavake aman’Agnahare. Nisokafe i Jehovah bey ty fo’e mba hahafaha’e hagneke ty raha nirehafe i Paoly. 15 Naho fa nivita badisa reke naho ty ndaty iaby tan-tragno’e tao, le nihalale ama’ay tihoe reke tie: “Naho eke’areo tie mino an’Agnahare vata’e raho, le mivantagna an-tragnoko agne.” Le tsy nado’e zahay naho tsy niavy ama’e agne.
16 Ie tie indraike zay ka, le nandeha tamy i toeragne fivavahagney agne zahay. Nitendreke ze mpanompovave raike misy demonia mpirehake ty hoavy zay zahay. Nanjare nimpagnarivo bey ty tompo o mpanompovave iohoe noho ze fahaia’e zay. 17 Lava nagnorike anay avao o ampela iohoe sady nikorakorake tie: “Mpanompo i Andrianagnahare Fara’e Amboney o lahilahy rehoe sady mitory ama’areo ty lala i fagnavotagney.” 18 Nanao izay tagnate ty andro maro reke. Nilangigne tama’e ty Paoly tamy ty fara’e, le nitolike tama’e agne sady nirehake tamy i demoniay tie: “Amy ty agnara i Jesosy Kristy ty andiliako azo mba hiala boake ama’e ao.” Teo naho eo avao, le avy le niakatse boake amy i ampelay ao i demoniay.
19 Naho fa nihay i tompo i ampelaỳ tie tsy hahazo harena sasa reke, le nitsepahe’e ty Paoly naho i Silasy sady nitaritarihe’e ta bezara agne, amo o manam-pahefàgneo agne. 20 Nente iareo tagnatreha i mpifehe tanàgne rey eo iareo sady hoe ka iareo: “Tena magnakorontagne ty tanàntikagne toy o lahilahy rehoe. Jiosy iareo, 21 sady mampianatse fombafomba tsy mete amantika Romanao.” 22 Le niboseke tamy iareo i vahoakey iaby. Nampagnafahe i mpifehe tanàgne rey ty akanjo iareo, le nampijerae’e doda ka iareo. 23 Naho fa boake dinemodemo iareo ty jera iareo, le nazily iareo tam-pirizò agne sady nampiambene iareo i mpiambegne rey soa. 24 Noho ze baiko zay, le natao iareo tamy i pirizò fara’e agnate’e agney iareo sady nagado iareo tamy ty hatae ty tombo iareo.
25 Faie, ie tokotoko’e ho tamy i vakimira halegney, le nivavake naho nidera an’Agnahare tamy ty hira ty Paoly naho i Silasy. Nitsanogne iareo i gadra hafa rey. 26 Ie tampoke teo, le nisy horohoron-tane mafe, hafarà’e nihezengezegne ty foto i pirizòy. Le avy le nisokake iaby ka ty lala i pirizòy sady nibalake iaby ka i raha narohy i gadra reỳ. 27 Naho fa nitaitse tamy ty roro’e i mpiambegne gadray, le nitrea’e tie nisokake iaby ty lala i pirizòy. Nalae’e areke i mesa’ey mba hamonoa’e tegna satria nieretseretse reke tie nilay iaby i gadra rey. 28 Faie nirehake mafe ty Paoly tie: “Ko mamono tegna rehe fa atoagne iaby avao zahay!” 29 Nampinday jiro mbama’e mbeo i mpiambegne gadray, le nizilike malaky tamy i pirizò nisy i Paoly naho i Silasỳ ao reke. Nititike reke tamy ireke nizilike taoy, le niankohoke tagnatreha i Paoly naho i Silasy eo. 30 Nindese’e niakatse iareo roe lahy naho fa niavy eo sady hoe reke: “O ry aba, ino ty tsy maintsy ataoko mba hahavoavonje ahy?” 31 Le hoe reke: “Minoa i Jesosy Tompo, le ho voavonje rehe naho ty ndaty an-tragno’o ao iaby.” 32 Le nirehafe iareo tama’e naho ty ndaty tan-tragno’e tao ty saontsy i Jehovah. 33 Tamy i halegne ignehoe avao, le nente’e niarake ama’e iareo sady sinasa’e i fere tamy iareoy. Natao badisa tamy i fotoagne ignehoe avao ka reke naho ty ndaty tan-tragno’e ao iaby. 34 Nente’e tan-tragno’e agne iareo, le nanjotsoa’e hanegne tambone latabatse eo. Tena nifale reke naho ze ndaty iaby tan-tragno ama’e ao noho iareo nanjare nino an’Agnahare.
35 Ie nimaraindray, le nagnirake mpiambegne i mpifehe tanàgne rey mba hirehake tie: “Avotsoro’areo iareo.” 36 Le nirehake tamy i Paoly i mpiambegne gadray tie: “Nagnirake ndaty i mpifehe tanàgne rey mba hirehake tie nao havotsotse zao nareo roe lahy. Miakara areke nareo, le lonike mba hotoly soa amy ze handehana’areo.” 37 Faie hoe ty Paoly tamy iareo: “Romana zahay faie jinera iareo tagnatreha o ndaty marò eo ndra tie mbe tsy voaheloke* aza sady ginadra iareo ka. Le ie zahay amy izao hampiakare iareo ambalimbalike atoy avao? Tsy mete izay zahay! Aleo ty vatategna iareo ro ho avy atoy mba hamotsotse anay.” 38 Natalily i mpiambegney i mpifehe tanàgne rey ze rehake rezay. Tena natahotse iareo naho fa naharey tie Romana i lahilahy rey. 39 Nandeha mbeo areke i mpifehe tanàgne rey mba hamotsotse iareo. Nihalale tamy iareo roe lahy iareo tafara izay mba hiala i tanàgney. 40 Faie naho fa niakatse boake am-pirizò ao iareo, le nandeha an-tragno i Lidia agne. Naho fa nahatrea i rahalahy rey iareo, le nampahery iareo. Nandeha iareo tafara izay.