Asa o Apostolio
17 Nanegnantegna i Amfipolia naho i Apolonia iareo, le niavy ta Tesalonika agne. Nisy sinagoga o Jiosio ty tagne. 2 Nizilike tamy i sinagogay ao arake ty fatao’e areke ty Paoly mba hampianatse tao. Nandrese lahatse ze ndaty nagnatreke tao tamy ty alala ty Soratse Masigne reke, tagnate ty telo sabata. 3 Nihazavae’e naho niporofoe’e tamy ty alala ty raha voasoratse ao tie tsy maintsy nijale naho nivelomegne amy ty mate ty Kristy. Hoe reke: “O Kristy iohoe, i Jesosy torieko ama’areoy.” 4 Ty voka’e, nisy tamy iareo ty nanjare mpino, le niarake tamy i Paoly naho i Silasy. Maro ty Grike mpivavake aman’Agnahare nanjare mpino, le eo ka ty ampela nanan-kaja ila’e.
5 Faie nialogne iareo o Jiosio, le namory ndaty raty fagnahy mpirererere a bezara eio naho namory vahoake sady nampikorontagne i tanàgney. Nitafihe iareo i tragno i Jasonay, le nipaliae iareo ty Paoly naho i Silasy, mba hoentegne amy i vahoake romotsey eo. 6 Faie naho fa tsy nitrea iareo tao iareo roe lahy, le i Jasona naho ty rahalahy ila’e tao ty tinaritary iareo mbamy i lahibey i tanàgney mbeo. Le nikorakorake iareo tie: “Niavy etoa ka ty lahy mpitrobo tane retoa, 7 le i Jasona ty nandrambe iareo ho an-tragno’e ao. Manohetse i Kaisara iareo satria mirehake tie nao misy mpanjaka hafa zao, le i Jesosy.” 8 Vao mainke nisamborohotake i vahoakey naho i lahibey i tanàgney rey naho fa naharey ze raha rezay. 9 Nangala iareo vola hey ty Jasona naho i rahalahy ila’e rey vaho izay nenga iareo handeha.
10 Tamy ty hale igne, le avy le nalefa i rahalahy rey ta Beria agne ty Paoly naho i Silasy. Nizilike tamy ty sinagoga o Jiosio ao iareo naho fa niavy agne. 11 Nanagne toe-tsaigne soa ambone o Jiosy ta Tesalonika agneo o Jiosy ta Beria agneo. Izay ty nahavy iareo tena nazoto nandrambe i saontsin’Agnaharey naho handineke soa ty Soratse Masigne isan’andro mba hahatreavagne tie maregne vata’e o raha nirehafegne tamy iareò. 12 Ty voka’e, maro tamy iareo ty nanjare mpino. Ampela grike nanan-kaja ty ila’e, le nisy lahilahy grike ka. 13 Faie naho fa nihay o Jiosy boake a Tesalonika agneo tie nitory ty saontsin’Agnahare tamo o Jiosy ta Beria agneo ty Paoly, le niavy agne ka iareo mba hampikorontagne i vahoakey. 14 Le avy le nalefa i rahalahy rey ta moron-driake ey ty Paoly, fa i Silasy naho i Timoty nijanogne tagne avao. 15 Faie natere i nama’e rey hatrake ta Atena agne ty Paoly. Niheregne iareo naho fa boake nagnafatse iareo ty Paoly tie, toko’e hampiaviegne ama’e agne fara izay ty malaky ty Silasy naho i Timoty.
16 Tamy i Paoly nandigne iareo ta Atena taoy, le tena nisosotse reke naho fa nitrea’e tie feno sampy i tanàgney. 17 Le nanomboke nandrese lahatse o Jiosio naho ty ndaty hafa nivavake taman’Agnahare tamy i sinagogay ao reke. Nandrese lahatse ze ndaty nitrea’e ta bezara ey ka reke isan’andro. 18 Faie nialy hevetse tama’e o filozofa epikorianao naho o stoisianao, le nirehake ty ila’e tie: “Inogne o raha tea ty ndaty be rehake tiagne horehafegneo?” Fa ty ila’e nirehake tie: “Hoe raha andrianagnahare vaovao ze o torie’e zao!” Nirehake izay iareo satria nitory tamy iareo ty talily soa miomba i Jesosy naho ty famelomagne amy ty mate ty Paoly. 19 Nitsepahe iareo areke ty Paoly, le nente iareo ta Areopago agne sady hoe iareo: “Azo’o hazavaegne soa ama’ay vao ze o fampianaragne vaovao rehafe’o zao? 20 Tena vaovao amy ty sofi’ay ze o raha rehafe’o zao, le tea’ay hofantatse ty dika’e.” 21 Naho ty maregne, le nandany andro tagne ze ndaty ta Atena ao naho ze ambahiny nitoboke tao naho fa tsy nisy raha natao. Tao iareo ty nitalily ndra nitsanogne vaovao. 22 Le nitsangagne tam-pagnivoa i Areopago eo ty Paoly sady nirehake tie:
“Ry Ateniana, treako amy ze kila raha atao’areo fa tena matahotse o andrianagnahareo nareo naho ampitahaegne amy ty ndaty hafa. 23 Naho fa nandehandeha ey ohatse raho, le nandineke soa o raha ivavaha’areò, le nitreako fa nisy alitara raike zay misy soratse hoe izao: ‘Hoahy i Andrianagnahare Tsy Fantatsey.’ I Andrianagnahare tsy fanta’areo faie ivavaha’areoy o torieko ama’areò. 24 I Andrianagnahare namboatse ty tontolo toy naho ze kila raha misy ama’eoy, i Tompo i lagnitsey naho ty tane toỳ, le tsy miambesatse amy ty tempoly namboaregne tagnagne, 25 sady tsy mipay fagnampeagne boake amy ty tagna o ndatio reke manahake o ndaty misy raha tsy ampe ama’eo. Ty anto’e, ireke ty nagnomey aigne naho fofognaigne o ndatio iaby naho ze kila raha. 26 Boake amy ty ndaty raike ty nanoa’e o ndaty amy ty firenena sambe hafa mitoboke an-tane etoio. Fa nanondro fotoagne hoahy ze kila raha ty Andrianagnahare sady fa nifarita’e ka ty faritse hisy o ndatio, 27 amy izay hipay an’Agnahare iareo. Naho mikodebe aze mafe iareo, le hahatrea aze vata’e. Faie naho ty maregne, le tsy lavitse antikagne tsikiraidraike reke. 28 Ireke ty mahavy antikagne hovelogne naho hihetseke vaho hisy. Nisy mpanoratse ama’areo eo aza nirehake tie: ‘Ana’e* ka tikagne.’
29 “Satria areke tikagne anan’Agnahare,* le tsy toko’e hieretseretse tie manahake o volamenao, ndra o volafotsio ndra o sare sinokitse namboare o ndatio ty Andrianagnahare. 30 Maregne fa tsy mivazoho i raha nataontika noho ty tsy fahafantarantikagne rey ty Andrianagnahare. Faie amy izao reke, le misaontsy amy ze kila ndaty iaby tie toko’e hibebake iareo ndra aia ndra aia ty misy aze. 31 Ty anto’e, fa nanondro andro raike hitsara’e ara-drare’e ty tane toy iaby reke, amy ty alala ty lahilahy raike tinendre’e. Ty nameloman’Agnahare tamy ty mate o lahilahy iohoe ty antoke nimei’e hoahy ze kila ndaty iaby fa hiseho vata’e zay.”
32 Naho fa naharey miomba i famelomagne amy ty matey iareo, le nitsikike aze ty ila’e, fa ty ila’e nirehake tie: “Mbe hitsanogne ty miomba izay indraike zahay amy ty magnarake.” 33 Le niala tamy iareo teo ty Paoly, 34 faie nisy lahilahy ila’e nagnorike aze sady nanjare mpino. Agnisa izay ty Dionisio, mpitsara tamy ty fitsaragne tamy i Areopago teo, naho i ampela raike atao tihoe Damary zay vaho ty ndaty hafa.