Hoahy o Romanao
2 Ndra ia ndra ia areke rehe, le tsy managne fialan-tsiny naho mitsara ndaty. Ty anto’e, magnameloke ty tegna’o rehe naho mitsara ndaty, satria ihe mitsara ndatio, le manao i raha atao’e rey avao ka. 2 Faie haintika tie naho fa mitsara ty ndaty manao o raha rehoe ty Andrianagnahare, le arake ty maregne ty fitsara’e.
3 Sa mihevetse vao rehe tie ho afake hilay ty fitsaran’Agnahare naho mitsara ty ndaty manao o raha rehoe, ie amy izao rehe manao i raha atao iareoy ka? 4 Sa tsy ahoa’o tie fara ty izay soa fagnahy, mandefetse vaho managne faharetagne reke? Tsy fanta’o vao tie noho ty hasoa fagnahi’e o mahavy aze mikezake mitarike azo mba hibebakeo? 5 Faie satria rehe mafe loha sady tsy mete mibebake ty fo’o, le hoe manontogne ty havigneran’Agnahare ama’o rehe. Habaribari’e ze havignera’e zay amy i andro hitsara’e arake ty rare’ey. 6 Hamale ty ndaty tsikiraidraike arakarake ty asa’e reke: 7 Ze ndaty mipay voninahitse naho haja vaho vatagne tsy mete lo, le manao ty soa lognandro, le hahazo havelogne nainai’e. 8 Fa ze tea mifandietse naho tsy magnorike ty hamaregnagne fa lava manao ty tsy maregne avao, le ho avy ama’e ty havigneragne naho ty habosehagne. 9 Ze ndaty manao raha raty, le ho ore naho hijale. O Jiosio hey ty voaloha’e vaho izay o Grikeo. 10 Fa ze ndaty manao ty soa ro hahazo voninahitse naho haja vaho fiadagnagne, le o Jiosio hey ty voaloha’e vaho izay o Grikeo. 11 Ty anto’e, tsy mifily volo ty Andrianagnahare.
12 Ze manota tsy managne lalàna, le homate tsy managne lalàna. Fa ze ambane i lalànay faie manota, le hotsaraegne arake i lalànay. 13 Ty anto’e, tsy ze mpaharey i lalànay ro maregne agnatrehan’Agnahare eo, fa ze mpankatò i lalànay ro hambara ho maregne. 14 Manao ty raha rehafe i lalànay o ndaty boake amy ty firenena hafa tsy managne lalànao, satria voajagnahare amy iareo zay. Ndra tie tsy managne lalàna aza o ndaty rehoe, le fa lalàna hoahy ty vata iareo. 15 Ty vatategna iareo ro mampiseho tie voasoratse am-po iareo ty foto i lalànay, le ty feo ty fieretsereta iareo ro vavolombelogne miarake amy iareo, sady ty eretsere iareo avao ro magnameloke ndra magnafa-tsiny iareo. 16 Izay ty raha hisy amy i andro hitsaran’Agnahare, amy ty alala i Kristy Jesosy, ty raha natao o ndatio amy ty mietaketake agney, arake i talily soa ambarakoy.
17 Tokavegne tie Jiosy ihe hinaneo, le mitoky amy i lalànay sady atao’o bohaboha’o ty Andrianagnahare. 18 Hai’o ka ty zoton’arofon’Agnahare naho ty magnambake ty raha tena fanjaka,* satria ampianare i Lalànay azo. 19 Rese lahatse ka rehe tie mpitari-dalagne o goao rehe sady fahazavagne hoahy ze agnate i iegney ao, 20 mpagnitsy ze tsy misaigne, mpagnanatse o ajajao, vaho mahatakatse ty foto ty fahalalagne naho ty hamaregnagne trea amy i Lalànay ao. 21 Faie izao, ihe mampianatse ty hafao vao mba mampianatse ty vata’o ka? Ihe mitory tie: “Ko mangalatse”, faie tena tsy mangalatse vao rehe? 22 Ihe mirehake tie: “Ko magnitsakitsa-baly”, tena tsy magnitsakitsa-baly vao rehe? Ihe mirehake tie, heje’o o sampio, tena tsy mangalatse raha amy i tempolỳ ao vao rehe? 23 Irehe mibohaboha noho i lalànay, tsy magnafa-baraka an’Agnahare vao ty tsy fagnoriha’o i Lalànay? 24 Ty anto’e, voasoratse tie: “Tivetivegne amo o firenena hafao eo ty tahinan’Andrianagnahare noho ty raha atao’areo.”
25 Naho fa magnorike i lalànay avao rehe vaho izay mahasoa azo ty nifanapahagne azo. Fa naho mpandika lalàna rehe, le manjare tsy mitapake ndra tie fa nitapake aza. 26 Naho manao i raha maregne také i Lalànaỳ areke o ndaty tsy mitapakeo, tsy fa agnisa ty ndaty mitapake ka vao iareo? 27 O ndaty tsy mitapake magnorike i Lalànaio, le hagnameloke azo ho mpandika lalàna ndra tie managne i lalàna voasoratsey aza rehe sady fa nitapake ka. 28 Tsy ty raha ivela’e etoy ty tena maha Jiosy ty ndaty raike, le tsy ty fanapahagne ty ndaty raike ro tena mampiseho tie mitapake vata’e reke. 29 Fa ty agnate’e ao ro tena maha Jiosy aze, sady ty fo’e ro mitapake. Le tsy i lalàna voasoratsey ty nanapake aze fa i fagnahỳ. Tsy o ndatio ty hidera ze ndaty zay fa Andrianagnahare.