Hoahy o Romanao
3 Ino areke ty tombo’e anagna o Jiosio, ndra ino ty soa azo boake amo o fanapahagneo? 2 Tena maro. Voaloha’e, iareo ty nagnankignagne i fagnambaragne masigne boake aman’Agnaharey. 3 Akore areke naho misy Jiosy tsy ampe finoagne? Midika vao zay tie tsy azo atokisagne sasa ty Andrianagnahare? 4 Sagnatria zay! Lava hotrea avao tie maregne ty Andrianagnahare, ndra tie hanjare ho mpavande iaby aza o ndatio, satria voasoratse tie: “Hotrea amy ty raha saontsie’o tie maregne rehe sady handrese ka rehe naho fa misy mitsara.” 5 Faie naho mampibaribary ty hamaregnan’Agnahare ty tsy hamaregnantika, le ino ty horehafentika? Manao ty tsy rare’e vao ty Andrianagnahare naho fa mampiseho ty havignera’e? (Ze raha rehafeko zay ty eretserete o ndatio.) 6 Aha’a, tsy izay! Naho manao ty tsy rare’e ty Andrianagnahare, le akore ty hitsara’e ty tontolo toy?
7 Faie naho ty vandeko ro vao mainke mampibaribary tie, maregne ty Andrianagnahare sady vao mainke hinday voninahitse ho aze zay, le nagnino raho ro mbe tsaraegne ho mpanota avao? 8 Nagnino areke tika ro tsy mirehake tie: “Andao hanao raha raty mba hiavia ty raha soa”? (Misy ndaty manao kitomboke antika tie nao mirehake ze raha zay tika.) Hosazeagne o ndaty rehoe sady ara-drare’e zay.
9 Mahazo tombo’e vao areke tika naho ampitahaegne amy ty hafa? Aha’a, tsy izay. Ty anto’e, fa nirehafentika teo tie sambe ambane fahefà ty ota iaby, ndra Jiosy ndra Grike, 10 arake i voasoratse tihoey tie: “Tsy misy ndaty maregne ndra raike aza. 11 Tsisy ndaty mandalegne sady tsisy ndaty mipay an’Agnahare. 12 Niamboho aze ze kila ndaty, le nanjare tsisy dika’e iareo iaby. Tsy misy mba soa fagnahy zao ndra raike aza.” 13 “Kibory misokake ty tenda iareo sady ty lela iareo ro amitaha’e.” “Misy poizy o meregneo ty am-bava iareo eo.” 14 “Feno ozogne naho fifankalaignagne ty am-bava iareo eo.” 15 “Meke hampite lio ty tombo iareo.” 16 “Fanjamanagne naho fandravagne ty amy ty lala iareo eo. 17 Tsy hay iareo ty lala i fiadagnagney.” 18 “Tsy trea iareo ty anto’e toko’e hatahoragne an’Agnahare.”
19 Haintika fa ze raha rehafe i Lalànay, le natao hoahy ze ambane i Lalànay. Amy izay hitsigne ty vava o ndatio iaby sady hotrea tie, meloke agnatrehan’Agnahare eo ty tontolo toy iaby, le fagneva ty hosazeagne. 20 A naho izay areke, le tsy hisy ndaty hambara tihoe maregne noho ty asa i lalànay. Naho ty maregne, le magnampe antika hahatakatse soa ty atao tihoe ota i lalànay.
21 Faie amy izao, le fa nabaribary ty hamaregnan’Agnahare, faie tsy tamy ty alala i lalànay, arake ty ambara i Lalànay naho o Mpaminanio. 22 Fa amy ty alala ty finoagne i Jesosy Kristy ro nampibaribariagne ty hamaregnan’Agnahare amy ze mino. Ty anto’e, mitovy iaby ze kila ndaty. 23 Sambe fa nanota ze kila ndaty, le tsy mahatratse ty voninahin’Agnahare. 24 Fagnomezagne maimaim-poagne tihoe nambara ho maregne iareo noho i hasoa fagnahi’e miambakey. Nasehon’Agnahare tamy ty alala i solovoigne naloa i Kristy Jesosy nagnafahagne iareoy zay. 25 Nimean’Andrianagnahare mba hatao fagnatetse fampilongoagne ty Kristy, amy izay ho afake hilongo ama’e ze ndaty mino i lio’ey. Nanao izay ty Andrianagnahare mba hampisehoagne i hamaregna’ey, satria bey fandeferagne reke, le namela ty fahotagne natao taloha. 26 Nanao izay ka reke tie amy izao mba hanoroagne i hamaregna’ey, naho fa magnambara ho maregne ze ndaty mino i Jesosy.
27 Aia areke i fireharehagney? Nafahagne. Tamy ty alala t’ino? Tamy ty alala ty lalàna ty asa vao? Aha’a, tsy izay, fa tamy ty alala ty lalà ty finoagne. 28 Ty anto’e, mieretseretse tika tie ambara ho maregne ty ndaty raike tsy noho ty asa i lalànay fa noho ty finoa’e. 29 Andrianagnahare o Jiosio avao vao ty Andrianagnahare? Tsy Andrianagnahare o ndaty boake amy ty firenena hafao ka vao reke? Ie, Andrianagnahare o ndaty boake amy ty firenena hafao ka reke. 30 Ty anto’e, raike avao ty Andrianagnahare. Hambara’e ho maregne o ndaty mitapakeo noho ty finoa’e, le hambara’e ho maregne ka o ndaty tsy mitapakeo noho ty finoa’e. 31 Tsy asiantika dika’e vao areke i lalànay satria tika manam-pinoagne? Aha’a, tsy izay. Itika aza manohagne i lalànay.