Hoahy o Romanao
4 Naho izay areke, ino ty horehafentika miomba ty raha niazo i Abrahama, i razambeintikagne arake ty nofotsey? 2 Naho nambara ho maregne ohatse ty Abrahama noho ty raha natao’e, le ho nanagne anto’e nireharehagne reke faie tsy afake ho nanao izay tagnatrehan’Agnahare eo. 3 Fa nagnino? Ino ty voarehake amy ty Soratse Masigne ao? “Natao ho agnisa ty ndaty maregne ty Abrahama, satria naneho finoagne i Jehovah.” 4 Amy ty ndaty miasa, le tsy hasoa fagnahy miambake aseho ama’e ty fagnomeagne karama aze, fa raha* tsy maintsy aloa ama’e. 5 Fa ty ndaty tsy miasa faie mino i magnambara ty ndaty raty fagnahy ho maregney, le hatao ho agnisa ty ndaty maregne noho i finoa’ey. 6 Nirehake ka ty Davida tie, sambatse ty ndaty raike heveren’Agnahare ho maregne, ndra tie tsy noho ty raha natao’e aza. Hoe reke: 7 “Sambatse ze avela ty hadisoa’e naho ze rongonagne ty fahota’e. 8 Sambatse ze ndaty tsy hisahe i Jehovah ty fahota’e.”
9 O ndaty mitapakeo avao vao ro afake ty ho sambatse hoe izay? Sa ndra o ndaty tsy mitapakeo ka aza? Ty anto’e, hoe tika: “Natao ho agnisa ty ndaty maregne ty Abrahama, satria nanam-pinoagne.” 10 Ombia reke ro natao agnisa ty ndaty maregne? Tamy ireke fa nitapakey vao sa tamy ireke mbe tsy nitapakey? Tamy ireke mbe tsy nitapakey. 11 Le nahazo famantaragne reke, tsy inogne zay fa i fanapahagney. Io ty antoke* tie ndaty maregne reke satria nanam-pinoagne, tamy ireke mbe tsy nitapakey. Izay ty nahavy i Abrahama ho rae ze ndaty iaby manam-pinoagne faie tsy mitapake, mba hatao ho agnisa ty ndaty maregne iareo. 12 Izay ka ty nahavy aze hanjare ho rae ty tarana o ndaty mitapakeo. Faie tsy o mipiteke amo o fanapahagneo avao ty manan-drae aze, fa ze maneho finoagne manahake ty nanagna i Abrahama raentikagne tamy ie mbe tsy nitapakey.
13 Ty anto’e, tsy tamy ty alala i lalànay ty nahavy i Abrahama ndra ty tarana’e hahazo i fampitamagne tihoey tie, handova tontolo raike, fa noho i Abrahama nanam-pinoagne, le nambara ho maregne reke. 14 Fa naho ze mipiteke amy i lalànay ro mpandova, le tsy misy ilagne aze o finoagneo sady foagne i fampitamagney. 15 Mahavy an’Agnahare ho vignetse vata’e i Lalànay, faie naho tsy misy i lalànay, le tsy misy ka ty fandikan-dalàna.
16 Izay ty anto’e mahavy tihoe amy ty alala ty finoagne ro nanehoagne hasoa fagnahy miambake, amy izay hatoky ze tarana i Abrahama iaby fa hahazo i fampitamagney. Tsy ze mipiteke amy i Lalànay avao fa ze manam-pinoagne manahake i Abrahama, i raentikagne iabỳ ka. 17 (Satria izao ty voasoratse: “Tinendreko ho rae ty firenena maro rehe.”) Natao tagnatreha i Andrianagnahare ninoa’ey eo zay, i mamelogne ty mate naho i misaontsy ty raha mbe tsy misy hoe fa misỳ.* 18 Tena natoky reke fa hanjare ho rae ty firenena maro, ndra tie fa tsy nitama aza reke tie mbe hanagn’anake. Ninoa’e i raha nisaontsien’Agnahare tama’e tihoey tie: “Ho maro manahake io ty tarana’o.” 19 Ndra tie tsy nihanaleme aza ty finoa’e, le nihevere’e tie fa mate i vata’ey (satria fa 100 taogne teo ho eo reke). Nihevere’e tie fa mate* ka i tro i Sarahay. 20 Faie noho i fampitaman’Agnaharey, le nanam-pinoagne reke fa tsy nisalasala. Ireke aza nanjare nahazo hery noho ty finoa’e, le nagnomey voninahitse an’Agnahare. 21 Tena nirese lahatse reke fa ho vitan’Agnahare ty hagnatanterake i raha nampitamae’ey. 22 Noho izay, le “natao ho agnisa ty ndaty maregne reke.”
23 Faie tsy nisorategne ho aze raike avao ty rehake tihoe “natao ho agnisa ty ndaty maregne reke”, 24 fa ho antikagne ka. Hatao ho agnisa ty ndaty maregne ka tika, satria mino i namelogne i Jesosy Tompontika tamy ty matey. 25 Natolotse mba hovonoegne reke noho ty fahotantikagne, le nivelomegne tamy ty mate reke, amy izay tika hambara ho maregne.