Hoahy o Romanao

5 Satria fa nambara ho maregne tikagne amy izao noho itika manam-pinoagne, le andao tika hankamamy ty filongoagne* aman’Agnahare, amy ty alala i Jesosy Kristy Tompontikagne. 2 Amy ty alala ty finoagne aze ka ty ahafahantikagne magnarine an’Agnahare naho mahazo i hasoa fagnahy miambake fa aseho’e amy izaoy. Mifalea areke tikagne noho i fanantenagne hahazo ty voninahin’Agnaharey. 3 Tsy izay avao, fa mifalea ka tika naho fa miatreke haoreagne satria haintika tie, o haoreagneo le mahavy fiaretagne. 4 Le ty fiaretagne mahavy antikagne hankasitrahan’Agnahare. Le ty fankasitrahan’Agnahare, mahavy antikagne hanan-draha tamaegne; 5 i raha tamaentikagne rey, le tsy handiso tamà antikagne. Ty anto’e, fa natao am-pontikagne ao ty hatean’Andrianagnahare, tamy ty alala i fagnahy masigne nimea’e antikagney.

6 Tamy itika mbe nalemey, le nimate hoahy ty raty fagnahy ty Kristy tamy ty fotoagne fa tinondro. 7 Ndra tie va’e hisy aza ty ndaty hamoe ty fiai’e hoahy ty ndaty soa fagnahy; le tsy fitrea tihoe misy ndaty vognogne hamoe ty fiai’e hoahy ty ndaty maregne. 8 Faie natoron’Andrianagnahare tie tena tea’e tikagne, le nimate ho antika ty Kristy tamy itika mbe nimpanotay. 9 Satria tika fa nambara ho maregne amy hinane zao noho ty lio’e, le vao mainke tika afake matoky fa havotagne amy ty alala’e mba tsy hotra ty havigneran’Agnahare. 10 Ndra tie nifahavalon’Agnahare aza tika, le afake ty ho longo’e, amy ty alala ty nimateza i Ana-dahi’ey. Satria velogne o Ana-dahi’e iohoe, le vao mainke tika matoky tie ho avotse amy itika fa milongo ama’e zao. 11 Tsy izay avao, fa tena mahafale antikagne ka ty raha nataon’Agnahare tamy ty alala i Jesosy Kristy Tompontikagne, satria amy ty alala’e ty nahazoantika i filongoagne aman’Agnaharey.

12 Izay ty anto’e mahavy i tihoey, manahake ty nidira o otao tamy ty tontolo toy tamy ty alala ty lahilahy raike, ty nidira o fateo tamy ty alala o otao, hafarà’e niparitake amy ze kila ndaty iaby o fateo, satria fa nanota iareo iaby... 13 Fa tamy ty tontolo toy eto o otao taloha i Lalànay, faie tsy nisy ndaty nimelohegne ho nanao fahotagne tamy i lalànay mbe tsy nisỳ. 14 Faie ndra tie teo zay, le nanjaka o fateo nanomboke tamy i Adama hatrake amy i Mosesy. Mbe nanjakà o fateo avao ka aza, ndra ty ndaty tsy nanao i fahotagne natao i Adamay, i misy itoviza’e amy i ho avỳ.

15 Faie tsy mitovy i fagnomezagney naho i fahotagney. Fa naho ty fahota ty lahilahy raike ro nahavy ty ndaty maro homate, le vao mainke tena mahasoa ty ndaty maro i hasoa fagnahy miambake boake aman’Agnaharey naho i fagnomezagne maimaim-poagney, i nimeagne tamy ty alala ty lahilahy raikey, ndra i Jesosy Kristy noho ty hasoa fagnahi’e miambake. 16 Hoe izay ka, fa tsy mitovy amy ty voka i fahotagne natao i lahilahy raikey, ty voka i fagnomezagne maimaim-poagney. Nahavy fagnamelohagne ty fitsaragne i lahilahy raike nanotay, faie noho i fagnomezagne tafara i fahotagne maroy, le nambara ho maregne o ndatio. 17 Satria naho noho ty fahota i lahilahy raikey ro nanjakà o fateo tamy ty alala’e, le vao mainke matoky ze mahazo hasoa fagnahy miambake maro naho i fagnomezagne maimaim-poagne tihoe hambara ho maregney, fa hanjaka amy ty fiaignagne amy ty alala ty ndaty raike, ndra i Jesosy Kristy.

18 Nahazo fagnamelohagne areke ty karaza o ndaty iaby noho ty fahotagne natao ty ndaty raike, le hambara ho maregne ka ty karaza o ndaty iaby sady hahazo i havelogney noho ty asa fagnamaregnagne raike. 19 Ty anto’e, noho ty tsy fankatoava ty lahilahy raike ty nahavy ty ndaty maro ho mpanota, le hoe izay ka fa noho ty fankatoava ty ndaty raike ro nahavy ty ndaty maro ho maregne. 20 Naho fa niavy i Lalànay, le nihamaro o fahotagneo. Faie naho fa nitombo o fahotagneo, le vao mainke nitombo i hasoa fagnahy miambakey. 21 Ino ty tanjogne amy izay? Amy izay manahake ty nanjakà o otao naho o fateo ro hanjakà i hasoa fagnahy miambakey ka amy ty alala ty hamaregnagne, i mitarike mbamy i havelogne nainai’ey mbeoy, amy ty alala i Jesosy Kristy Tompontikagne.