Hoahy o Romanao
6 Ino areke ty horehafentikagne? Hanota avao vao tika, amy izay bey ty hasoa fagnahy miambake aseho amantikagne? 2 Sagnatria zay! Fa mate tikagne naho i otay ro rehafegne. Nagnino areke tika ro mbe miaigne agnate i otay ao avao? 3 Sa tsy fanta’areo vao fa itika iaby natao badisa tamy i Kristy Jesosy aoy, le natao badisa tamy i fate’ey ao? 4 Nalevegne niarake tama’e areke tika naho fa natao badisa amy i fate’ey ao. Amy izay tika hanagne fiaignagne vaovao manahake i Kristy, i nivelome i Rae tamy ty mate tamy ty alala ty voninahi’ey. 5 Naho nanjare tafaharo raike ama’e amy i fate’ey manahake aze areke tika, le azo antoka ka fa ho tafaharo raike ama’e naho fa hovelomegne amy ty mate, 6 satria haintika tie nipehegne tamy i boda-kataey ey niarake ama’e i toetsentika talohay. Amy izay tsy hofeheze ty hery o otao sasa ty vatantikagne mpanota toy, sady tsy hondevo i otay sasa ka tika. 7 Ty anto’e, ze mate le afake maliolio amy ty fahota’e.
8 Ankoatse izay, naho nimate miarake amy i Kristy tika, le matoky fa hovelogne miarake ama’e ka. 9 Satria haintika hinane zao fa tsy homate sasa ty Kristy amy ireke fa nivelomegne tamy ty matey. Tsy manan-kery ama’e sasa o fateo. 10 Nimate indraike avao reke mba hagnafahagne o otao. Faie naho fa nivelomegne reke, le velogne mba hanao ty zoton’arofon’Agnahare. 11 Hoe izay ka nareo. Hevero’areo tie fa mate nareo naho i otay ro rehafegne, faie velogne mba hanao ty zoton’arofon’Agnahare amy ty alala i Kristy Jesosy.
12 Ko enga’areo hanjaka amy i vata’areo mete matey sasa areke o otao, amy izay nareo tsy magnatanterake ty fagniria ty vata’areo. 13 Ko atolo’areo o otao ty vata’areo, amy izay tsy ho fitaovam-pialia ty tsy hamaregnagne. Atoloro’areo an’Agnahare i vata’areo hoe fa nimate faie fa nivelomegney. Atoloro aze i vata’areoy mba ho fitaovam-pialia ty hamaregnagne. 14 Ko engagne hifehe anareo o otao, satria tsy ambane i lalànay nareo fa nanehoagne hasoa fagnahy miambake.
15 Midika vao zay tie, hanota tika satria tsy ambane i lalànay fa nanehoagne hasoa fagnahy miambake? Sagnatria zay! 16 Tsy fanta’areo vao fa naho manolotse ty vata’areo hondevo ty ndaty raike nareo, le hanjare hondevo’e sady hanao ze raha tea’e hatao? Naho ndevo i otay areke nareo, le homate. Fa naho mankatò an’Andrianagnahare, le hambara ho ndaty maregne. 17 Faie isaoragne ty Andrianagnahare, fa ndra tie niondevo i otay aza nareo taloha, le nanjare mpankatò amy ty fo’areo i fampianaragne nimea’e anareoy. 18 Ie, nanjare mpanompo ty hamaregnagne nareo, satria fa nafahagne tamy i otay. 19 Mampiasa firehake azo o ndatio raho, satria maleme ty nofo’areo. Manahake ty nanolora’areo ty vata’areo ho mpanompo i fahalotoagney naho i fandikan-dalànay nahavy anareo ho mpandika lalànay, ro toko’e hanolora’areo ty vata’areo ka ho mpanompo i hamaregnagney, mba hahavy anareo ho masigne. 20 Tamy inareo mbe nindevo ty otay, le tsy nifehé i hamaregnagney.
21 Ino areke ty vokatse niazo’areo tamy ze fotoagne zay? Mahamegnatse anareo zay amy hinane zao. Ty anto’e, fate ty iafarà i raha rey. 22 Faie nafahagne tamy i otay nareo hinane zao sady nanjare mpanompon’Agnahare, le fahamasignagne naho fiaignagne nainai’e ty vokatse azo’areo boake amy izay. 23 Ty anto’e, fate ty karama azo boake amo o otao, fa havelogne nainai’e ty omein’Andrianagnahare antikagne amy ty alala i Kristy Jesosy Tompontikagne.