Hoahy o Romanao

7 Tsy fanta’areo vao ry rahalahy fa feheze i Lalànay ty ndaty raike naho mbe velogne? (Inareo mahay i lalànaio o irehafako zao.) 2 Fehé i lalànay tsy hisarake amy ty vali’e, ohatse, ty ampela manambaly naho mbe velogne i vali’ey. Faie naho fa mate i vali’ey, le votsotse amy i lalàna i vali’ey reke. 3 Naho amy i vali’ey mbe velogney areke i ampelay ro manambaly lahilahy hafa, le magnitsakitsa-baly reke. Fa naho mate ty vali’e, le afake amy i lalàna i vali’ey reke. Naho amy izay reke ro manambaly lahilahy hafa, le tsy magnitsakitsa-baly.

4 Hoe izay ka ry rahalahiko, fa nafahagne* tamy i Lalànay tamy ty alala ty vata i Kristy nareo, amy izay nareo hanjare hoahy ty hafa, ndra hoahy i nivelomegne tamy ty matey. Toko’e hamoa voa soa ho an’Agnahare areke tika. 5 Tamy itika mbe nagnatanterake ty fagniria ty nofotsey, le niasa tagnate vatantikagne ao ty fagniriagne hanota, mba hahavy antikagne hanao ty raha mitarike mbamy i fatey mbeo. I Lalànay ro nanaitse ze fagnirian-draty amantikagne ao zay. 6 Faie amy izao tika fa nafahagne amy i Lalànay, satria fa nimate amo o Lalàna namehefehe antikagne iohoe tika. Amy izay tika ho mpanompo vaovao, le i fagnahỳ ro hitarike antika, fa tsy i lalàna voasoratsey manahake ty taloha.

7 Ino areke ty horehafentika? Ota vao i Lalànay? Sagnatria zay! Ty anto’e, tsy ho nihaiko ty atao tihoe ota naho tsy i Lalànay. Tsy ho nihaiko ohatse tie, tsy mete ty magniry mafe fanagna o ndaty naho tsy i Lalànay ro nirehake tie: “Ko magniry mafe fanagna o ndaty.” 8 Faie noho o lily iohoe, le nanjare nahita hirike o otao mba hampitiriagne ze karazam-pagniriagne mafe fanagna o ndaty tagnateko ao. Ty anto’e, mate o otao naho tsy nisy i lalànay. 9 Naho ty maregne, le velogne tsy nanagne lalàna raho tie taloha. Faie naho fa niavy i lilỳ, le nivelogne indraike i otay fa iraho nimate. 10 Le i lily ho nitarike mbamy i havelogney mbeoy ro ndra nitarike ahy mbamy i fatey mbeo. 11 Ty anto’e, noho i lilỳ le nanjare nahatrea hirike i otay mba hamitahagne ahy naho hamonoagne ahy amy ty alala’e. 12 Masigne areke i Lalànay, le masigne ka i lilỳ sady ara-drare’e ro soa.

13 Midika vao zay tie o raha soa iohoe ro nahavy ahy homate? Sagnatria zay! I otay ro nahavy ahy homate. Tamy ty alala i raha soay ty namonoa i otay ahy, amy izay hibaribary tie ino maregne ty atao tihoe ota. Nabaribary i lilỳ tie tena raty o otao. 14 Haintika fa boake amy i fagnahỳ i Lalànay, faie iraho nofotse navily hondevo ty ota. 15 Ty anto’e, tsy fantako ty raha ataoko, satria tsy ty raha teako* hatao ro ataoko fa ty raha hejeko hatao. 16 Faie, naho ty raha tsy teako hatao ro ataoko, le ekeko tie soa i Lalànay. 17 Faie tsy iraho sasa o manao ze raha zaio, fa i ota agnateko aoy. 18 Haiko fa tsy misy raha soa ty agnateko ao ndra ty amy i nofokoy ao. Ndra tie manam-pagniriagne hanao ty soa aza raho, le tsy vitako ty manao izay. 19 Tsy ty raha soa teako hatao ro ataoko fa ndra i raha raty tsy irieko hataoy ro ataoko. 20 Naho i raha tsy teako hataoy areke ro ataoko, le tsy izaho ty magnatanterake izay fa i ota agnateko aoy.

21 Izao areke ty lalàna tsapako agnateko ao: Naho fa te hanao ty soa raho, le agnateko ao avao ka ty fagniriagne hanao ty raty. 22 Naho ty am-poko ato ro rehafegne, le tena teako ty lalàn’Agnahare 23 faie treako tie, misy lalàna hafa ty agnate vatako ao mialy amy ty lalàna mifehe ty saiko sady mitarike ahy hondevo i lalà ty ota agnate vatako aoy. 24 Tena ndaty mampalahelo raho! Ia ty hagnafake ahy amy ty vatako mitarike ahy mbamy i fatey mbeo toy? 25 Isaoragne ty Andrianagnahare, satria nagnavotse ahy tamy ty alala i Jesosy Kristy Tompontikagne! Naho amy ty saiko areke, le mpanompo ty lalàn’Agnahare raho, fa naho amy ty nofoko, le ndevo ty lalà ty ota raho.